ການຍົກເລີກສັນຍາ ໝາຍເຖິງການຢຸດເຊົາ ບໍ່ສືບຕໍ່ປະຕິບັດສັນຍາຕາມການຕົກລົງຂອງຄູ່ສັນຍາ ຫຼື ກໍລະນີທີ່ມີການລະເມີດສັນຍາ ຄູ່ສັນຍາທີ່ໄດ້ຮັບຄວາມອັບປະໂຫຍດນັ້ນ ຈະຍົກເລີກສັນຍາຝ່າຍດຽວກໍໄດ້, ເວັ້ນເສຍແຕ່ຄູ່ສັນຍາຫາກຕົກລົງກັນໄວ້ຢ່າງອື່ນ.
ເຖິງຢ່າງໃດກໍຕາມການຍົດເລີກສັນຍາກໍຕ້ອງໄດ້ປະຕິບັດຕາມເງື່ອນໄຂດັ່ງນີ້:
- ສັນຍາທີ່ເກີດຂຶ້ນ ແລະ ມີຜົນບັງຄັບໃຊ້ໄດ້ແລ້ວ;
ສັນຍາທີ່ຈະຖືກຍົກເລີກນັ້ນ ຕ້ອງເປັນສັນຍາທີ່ເກີດຂຶ້ນ ແລະ ມີຜົນບັງຄັບໃຊ້ແລ້ວສາມາດຍົກເລີກໄດ້. ສ່ວນສັນຍາທີ່ເປັນໂມຄະນັ້ນ ຈະບໍ່ສາມາດຍົກເລີກໄດ້ ເນື່ອງຈາກສັນຍາດັ່ງກ່າວເຮັດຂຶ້ນໂດຍບໍ່ຖືກຕ້ອງຕາມເງື່ອນໄຂຂອງການເຮັດສັນຍາ.
2.ມີການຍົກເລີກໂດຍຄູ່ສັນຍາ ຫຼື ຝ່າຍທີ່ໄດ້ຮັບຄວາມອັບປະໂຫຍດ;
ການຍົກເລີກໂດຍຄູ່ສັນຍາ ໝາຍເຖິງ ຄູ່ສັນຍາທັງສອງຝ່າຍໄດ້ຕົກລົງເຫັນດີໃຫ້ຢຸດເຊົາ ບໍ່ສືບຕໍ່ປະຕິບັດສັນຍາ. ການຍົກເລີກສັນຍາໂດຍຝ່າຍດຽວ ໝາຍເຖິງຝ່າຍທີ່ໄດ້ຮັບຄວາມອັບປະໂຫຍດ ບໍ່ເຫັນດີໃຫ້ສືບຕໍ່ປະຕິບັດສັນຍາ.
ຕົວຢ່າງ: ພໍ ໄດ້ຕົກລົງເຮັດສັນຍາໃຫ້ບໍລິສັດ ຊໍ ປຸກສ້າງເຮືອນໃຫ້ໂດຍໃຫ້ໃຊ້ເຫຼັກຂະໜາດ 16 ມີລິແມັດ ແຕ່ເວລາປຸກສ້າງຕົວຈິງ ຊໍພັດໃຊ້ເຫຼັກຂະໜາດ 12 ມີລິແມັດ, ພໍ ເຫັນວ່າ ຊໍ ໄດ້ລະເມີດສັນຍາຊຶ່ງເຮັດໃຫ້ຕົນອັບປະໂຫຍດເນື່ອງຈາກການໃຊ້ເຫຼັກທີ່ບໍ່ຖືກຕາມສັນຍາທີ່ໄດ້ຕົກລົງກັນໄວ້.
- ຮູບການຍົກເລີກສັນຍາສາມາດເຮັດເປັນລາຍລັກອັກສອນ.
ການຍົກເລີກສັນຍາທີ່ເປັນລາຍລັກອັກສອນ ຕ້ອງເຮັດເປັນລາຍລັກອັກອນ. ການຍົກເລີກສັນຍາທີ່ຕ້ອງເຮັດເປັນລາຍລັກອັກສອນ ອາດຈະຂຽນດ້ວຍມື, ພິມດີດ ຫຼື ພິມດ້ວຍເຄື່ອງເອເລັກໂຕຣນິກ ໂດຍຄູ່ສັນຍາເອງ ຫຼື ບຸກຄົນໃດໜຶ່ງ. ເນື້ອໃນຂອງການຍົກເລີກຕ້ອງລົງວັນທີ, ເດືອນ, ປີ, ມີລາຍເຊັນຂອງຄູ່ສັນຍາ ເພື່ອຢັ້ງຢືນຄວາມແນ່ນອນ ອາດຈະແປະໂປ້ມືໃສ່ຕື່ມກໍໄດ້. ການຍົກເລີກສັນຍາອາດຈະມີການເຂົ້າຮ່ວມຂອງນາຍບ້ານ ພ້ອມດ້ວຍພະຍານທີ່ໜ້າເຊື່ອຖືຢ່າງໜ້ອຍ ສາມຄົນ ຫຼື ອາດຈະນຳໄປຢັ້ງຢືນຢູ່ຫ້ອງການທະບຽນສານ.
ເມື່ອມີການຍົກເລີກສັນຍາ ໂດຍການຕົກລົງຂອງຄູ່ສັນຍາ ຫຼື ໂດຍຝ່າຍທີ່ໄດ້ຮັບຄວາມອັບປະໂຫຍດ ສິ່ງທີ່ໄດ້ປະຕິບັດຕໍ່ກັນມາກໍໃຫ້ແລ້ວກັນໄປ, ຖ້າວ່າຝ່າຍໜຶ່ງຫາກໄດ້ປະຕິບັດພັນທະຂອງຕົນກ່ອນແລ້ວ ຝ່າຍທີ່ຍັງຄ້າງຄານັ້ນ ຕ້ອງໄດ້ປະຕິບັດຕອບແທນ. ສຳລັບພັນທະທີ່ຍັງບໍ່ທັນໄດ້ປະຕິບັດຕໍ່ກັນນັບແຕ່ວັນຍົກເລີກສັນຍານັ້ນ ກໍໃຫ້ເລີກແລ້ວກັນໄປ.
ຕົວຢ່າງ: ຄໍ ໄດ້ຕົກລົງເຮັດສັນຍາຈ້າງ ຕໍ ເພື່ອປຸກສ້າງເຮືອນ, ວຽກທີ່ຕ້ອງເຮັດມີຄື: ບຸກເບີກເນື້ອທີ່ດິນໃນມູນຄ່າ 10.000.000 ກີບ, ປຸກເຮືອນມູນຄ່າ 100.000.000 ກີບ, ຕິດຕັ້ງໄຟຟ້າ ແລະ ນ້ຳປະປາໃນມູນຄ່າ 10.000.000 ກີບ ໃຫ້ສຳເລັດພາຍໃນກຳນົດເວລາ 1 ປີ. ຜ່ານການປະຕິບັດສັນຍາ ຕໍ ໄດ້ບຸກເບີກເນື້ອທີ່ດິນ ແລະ ປຸກເຮືອນສຳເລັດແລ້ວໃນໄລຍະຜ່ານມາ ຄໍ ກໍໄດ້ຈ່າຍເງິນຄ່າບຸກເບີກໃຫ້ ຕໍ ແລ້ວ, ສ່ວນເງິນປຸກເຮືອນຍັງບໍ່ທັນໄດ້ຈ່າຍ. ຕໍ່ມາມີການຍົກເລີກສັນຍາ ຄໍ ຕ້ອງຈ່າຍເງິນຄ່າປຸກເຮືອນໃຫ້ ຕໍ ຕາມຈຳນວນທີ່ໄດ້ຕົກລົງກັນໄວ້. ສ່ວນການຕິດຕັ້ງໄຟຟ້າ ແລະ ນ້ຳປະປາກໍໃຫ້ເລີກແລ້ວກັນໄປ.
ໂດຍ:ໄມ້ງັດ