ເນື່ອງໃນໂອກາດວັນສ້າງຕັ້ງສື່ມວນຊົນ ແລະ ການພິມຈຳໜ່າຍ ຄົບຮອບ 70 ປີ (13/8/1955-13/8/2020) ທ່ານ ທອງສະຫວັນ ມີບຸນ ປະທານບໍລິສັດ ພັນເພັດ ພັດທະນາກະສິກຳຈຳກັດຜຸ້ດຽວ ປະທານສະມາຄົມໂຮງສີເຂົ້ານະຄອນຫຼວງວຽງຈັນ ສະມາຊິກສະພາປະຊາຊົນນະຄອນຫຼວງວຽງຈັນ ຊຸດທີ 1 ໃຫ້ສຳພາດວັນທີ 24 ກໍລະກົດ 2020 ວ່າ: ຂ້າພະເຈົ້າເປັນຜູ້ໜຶ່ງທີ່ໄດ້ໃຊ້ບໍລິການສື່ມວນຊົນ ກໍຄືນັກຂ່າວມາເຮັດຂ່າວການດຳເນີນທຸລະກິດຂອງບໍລິສັດ ແລະ ບໍລິໂພກຜະລິດຕະພັນສື່ ບໍ່ວ່າຈະເປັນສື່ແບບເກົ່າ ໂທລະພາບ ວິທະຍຸ ໜັງສືພິມ ແລະ ວາລະສານຕ່າງໆ ແລະ ສື່ແບບໃໝ່ ກໍຄືສື່ອອນລາຍຕ່າງໆ ເຫັນວ່າສື່ມວນຊົນມີບົດບາດສຳຄັນຫຼາຍໃນການໂຄສະນາເຜີຍແຜ່ຂໍ້ມູນຂ່າວສານ ແລະ ເຫດການຕ່າງໆທີ່ເກີດຂຶ້ນຢູ່ພາຍໃນ ແລະ ຕ່າງປະເທດ ຖ້າບໍ່ມີສື່ນຳສະເໝີເຜີຍແຜ່ແລ້ວ ພວກເຮົາກໍຈະບໍ່ຮູ້ ຄືກັບເປັນຄົນປາກກຶກ ຫູໜວກ ຕາບອດ ນອກນີ້ ສື່ຍັງເຮັດໜ້າທີ່ການເມືອງຊ່ວຍພັກ-ລັດຕື່ມອີກ ໃນການນຳເອົາແນວທາງນະໂຍບາຍຂອງພັກ ກົດໝາຍຂອງລັດ ແລະ ມະຕິຄຳສັ່ງຕ່າງໆລົງເຜີຍແຜ່ຢູ່ໃນຜະລິດຕະພັນສື່ຕ່າງໆທີ່ມີຫຼາຍຊ່ອງທາງໃຫ້ພະນັກງານ ທະຫານ ຕຳຫຼວດ ນັກທຸລະກິດ ຊາວຄ້າຂາຍ ແລະ ປະຊາຊົນບັນດາເຜົ່າ ໄດ້ຮັບຮູ້ເຊື່ອມຊືມຢ່າງກວ້າງຂວາງທົ່ວເຖິງ ເພື່ອພ້ອມກັນເປັນຈິດໜຶ່ງໃຈດຽວ ສາມັກຄີກັນຮັກຫອມປະເທດຊາດ ແລະ ພ້ອມກັນປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຈະເລີນຮຸ່ງເຮືອງສີວິໄລເປັນກ້າວໆ.
ໃນນາມຂ້າພະເຈົ້າເຮັດທຸລະກິດກ່ຽວກັບກະສິກຳ ມີບໍລິສັດຕັ້ງຢູ່ບ້ານນາໄຮ່ ເມືອງຫາດຊາຍຟອງ ນະຄອນຫຼວງວຽງຈັນ ຜ່ານມາ ບໍລິສັດໄດ້ນຳໃຊ້ສື່ມວນຊົນມາເຮັດຂ່າວໃຫ້ຫຼາຍຄັ້ງ ເປັນຕົ້ນເຮັດຂ່າວການດຳເນີນທຸລະກິດຂອງບໍລິສັດ ການນຳຂັ້ນສູງ ແຂກຕ່າງປະເທດ ແລະ ຄະນະຜູ້ແທນຂັ້ນຕ່າງໆທັງພາຍໃນ ແລະ ຕ່າງປະເທດມາຢ້ຽມຢາມບໍລິສັດ ການປະກອບສ່ວນຊ່ວຍເຫຼືອສັງຄົມຂອງບໍລິສັດ ການນຳສະເໜີຜະລິດຕະພັນໃໝ່ຂອງບໍລິສັດ ແລະ ອື່ນໆ ອັນໄດ້ເຮັດບໍລິສັດຂອງຂ້າພະເຈົ້າເປັນທີ່ຮູ້ຈັກຂອງສັງຄົມ ແລະ ວົງການທຸລະກິດທັງພາຍໃນ ແລະ ຕ່າງປະເທດຫຼາຍຂຶ້ນ ບວກກັບຜົນງານທີ່ພົ້ນເດັ່ນຂອງບໍລິສັດ ຈຶ່ງເຮັດໃຫ້ບໍລິສັດກາຍເປັນຕົວແບບແຫ່ງຊາດດ້ານກະສິກຳ ເປັນຕົ້ນການສົ່ງເສີມຊາວກະສິກອນຫັນມານຳໃຊ້ກົນຈັກທັນສະໄໝເຂົ້າໃນການຜະລິດກະສິກຳແບບຄົບວົງຈອນ ເພື່ອຫຼຸດຜ່ອນແຮງງານຄົນ ເວລາ ແລະ ຕົ້ນທຶນການຜະລິດ ລົບລ້າງໄຮ່ນານ້ອຍເປັນໄຮ່ນາໃຫຍ່ຕາມແນວທາງຂອງພັກ-ລັດ ແລະ ປະຕິບັດນະໂຍບາຍສົ່ງເສີມສອງບວກສາມກັບຊາວກະສິກິກອນ ໂດຍລວມແລ້ວ ສື່ມວນຊົນມີບົດບາດສຳຄັນຕໍ່ທຸກຂົງເຂດວຽກງານ ເວົ້າລວມແລ້ວ ບໍ່ສາມາດຂາດສື່ມວນຊົນໄດ້.
ຄຽງຄູ່ກັບຜົນງານທີ່ສື່ມວນຊົນຍາດມາໄດ້ໃນຜ່ານມານັ້ນ ກໍຍັງມີບາງສິ່ງບາງຢ່າງທີ່ສື່ຈະຕ້ອງໄດ້ປັບປຸງແກ້ໄຂ ເພື່ອເຮັດໃຫ້ວຽກງານວິຊາສະເພາະຂອງຕົນໃຫ້ດີຂຶ້ນໃນອະນາຄົດຂ້າງໜ້າ ເນື່ອງຈາກປັດຈຸບັນ ສື່ອອນລາຍໄດ້ເຂົ້າມາມີບົດບາດສູງ ເປັນຕົ້ນການນຳສະເໜີຂ່າວຕ້ອງວ່ອງໄວທັນເວລາ ສາມາດແຂ່ງຂັນກັບສື່ໃໝ່ ພ້ອມນີ້ ກໍໃຫ້ສື່ສືບຕໍ່ເປັນກະບອກສຽງໃນການໂຄສະນາປະຊາສຳພັນໃຫ້ບັນດາຫົວໜ່ວຍທຸລະກິດ ໂດຍສະເພາະທຸລະກິດຂອງບໍລິສັດ ພັນເພັດພັດທະນາກະສິກຳ ຈຳກັດຜູ້ດຽວ ໃຫ້ເປັນທີ່ຮູ້ຈັກຂອງສັງຄົມນັບມື້ກວ້າງຂວາງ ແລະ ເຮັດໃຫ້ທຸລະກິດມີຜົນສຳເລັດເປັນກ້າວໆ.
ໂອກາດນີ້ ໃນນາມປະທານບໍລິສັດ ຂໍອວຍພອນໄຊມາຍັງການນຳສື່ ແລະ ບັນດາສື່ມວນຊົນທຸກຂະແໜງ ການຈົ່ງປະສົບຜົນສຳເລັດໃນໜ້າທີ່ວຽກງານ.