ສັນຍາ ແມ່ນນິຕິກຳທາງແພ່ງຊະນິດໜຶ່ງ ທີ່ມີຜູ້ເຂົ້າຮ່ວມແຕ່ສອງຄົນຂຶ້ນໄປ ຊຶ່ງມີສິດ ແລະ ພັນທະຕາມການຕົກລົງຂອງຄູ່ສັນຍາ ຫຼື ຕາມການກຳນົດໄວ້ໃນກົດໝາຍ ເມື່ອເວົ້າ ເຖິງສັນຍາ ພວກເຮົາຕ້ອງຄຳນຶງເຖິງບັນດາຫຼັກການຕ່າງໆ ທີ່ເປັນພື້ນຖານໃຫ້ແກ່ການ ເຮັດສັນຍາ ໂດຍສະເພາະແມ່ນ ຫຼັກການອິດສະຫຼະພາບໃນການເຮັດສັນຍາ ແລະ ຫຼັກການຄວາມສະເໝີພາບຂອງຜູ້ເຂົ້າຮ່ວມ ໃນສັນຍາ.
ມື້ນີ້ ຜູ້ຂຽນຈະນຳສະເໜີບາງບັນຫາທີ່ພົວພັນກັບສັນຍາ ໂດຍສະເພາະ ຄວາມຕ້ອງການຂອງຄູ່ສັນຍາຝ່າຍໃດຝ່າຍໜຶ່ງ ຢາກຈະປ່ຽນແປງເນື້ອໃນຈິດໃຈທີ່ສຳຄັນຂອງສັນຍາ ເພື່ອໃຫ້ທ່ານຜູ້ອ່ານໄດ້ຮູ້ຕື່ມ.
ການປ່ຽນແປງເນື້ອໃນສັນຍາ ໝາຍເຖິງການປ່ຽນແປງເນື້ອໃນສຳຄັນຂອງສິດ ແລະ ພັນທະທີ່ຄູ່ສັນຍາຕ້ອງປະຕິບັດຕໍ່ກັນດ້ວຍການເພີ່ມເຕີມ ຫຼື ຕັດອອກວັດຖຸປະສົງ ຫຼື ເປົ້າໝາຍຂອງສັນຍາ ລາຄາ ກຳນົດເວລາ ປະຕິບັດການຊຳລະການນຳສົ່ງ ຂອບເຂດ ປະລິມານ ແລະ ຄຸນນະພາບຂອງເປົ້າໝາຍ ສະຖານທີ່ປະຕິບັດສັນຍາ ແລະ ພັນທະ ໃນການແຈ້ງໃຫ້ກັນຊາບ.
ຕົວຢ່າງ: ທ້າວ ຂ ເຊົ່າທີ່ດິນ ເນື້ອທີ່ 2.200 ຕາແມັດຈາກ ນາງ ປ ຊຶ່ງຕັ້ງຢູ່ ບ້ານຫາດກ້ຽງ ໄຊທານີ ນະຄອນຫຼວງວຽງຈັນ ໃບຕາດິນເລກທີ 222 ລົງວັນທີ 9 ເດືອນກັນຍາ 2009 ອອກຊື່ ນາງ ປ ເພື່ອປຸກ ສ້າງບໍລິສັດ ກຳນົດເວລາເຊົ່າສິບປີ ເລີ່ມແຕ່ວັນທີ 1 ມັງກອນ 2010 ເຖິງວັນທີ 1 ມັງກອນ 2020 ລາຄາເຊົ່າ 10.000.000 ກີບຕໍ່ປີ ຝ່າຍ ຂ ຈະຕ້ອງໄດ້ຊຳລະຄ່າເຊົ່າລ່ວງໜ້າ 5 ປີ ໂດຍກຳນົດເອົາມື້ເຊັນສັນຍາເປັນມື້ຊຳລະ (1 ມັງກອນ 2013) ລວມທັງເປັນເງິນ 30.000.000 ກີບ ແລະ ອີກສ່ວນທີ່ເຫຼືອແມ່ນຈະຊຳລະໃນວັນທີ 1 ມັງກອນ 2015 ເມື່ອປະຕິບັດສັນຍາມາໄດ້ໄລຍະໜຶ່ງ ຝ່າຍ ທ້າວ ຂ ຕ້ອງການເພີ່ມເວລາຂອງການເຊົ່າ ແລະ ໄດ້ສະເໜີເພີ່ມໄລຍະເວລາເຊົ່າອີກຫ້າປີ ຈາກນາງ ປ ເປັນ 15 ປີ ແລະ ເຫັນດີໃຫ້ ທ້າວ ຂ ເພີ່ມຄ່າເຊົ່າໃໝ່ຕາມກຳນົດເວລາ ທີ່ເພີ່ມເປັນປີໜຶ່ງ 11.000.000 ກີບ ແລະ ຝ່າຍ ຂ ກໍຕົກລົງເຫັນດີຕາມການສະເໜີຂອງຝ່າຍ ນາງ ປ.
ຈາກຕົວຢ່າງຂ້າງເທິງນັ້ນ ສະແດງໃຫ້ເຫັນວ່າ ຖ້າຝ່າຍໜຶ່ງຫາກບໍ່ຕົກລົງເຫັນດີ ການສະເໜີປ່ຽນແປງນັ້ນກໍຈະບໍ່ມີຜົນສັກສິດ ອີກດ້ານໜຶ່ງສາມາດເວົ້າໄດ້ວ່າ ສິ່ງທີ່ສະເໜີປ່ຽນແປງເປັນຂໍ້ສະເໜີນັ້ນເປັນຂໍ້ສະເໜີໃໝ່ ຖ້າຂໍ້ສະເໜີໃໝ່ນີ້ຫາກບໍ່ຖືກຮັບຮອງ ຫຼື ມີການຕົກລົງເຫັນດີ ພັນທະທີ່ໄດ້ຕົກລົງກັນແລ້ວຍັງມີຜົນສັກສິດຢູ່.
ການປ່ຽນແປງສັນຍາ ອາດຈະມີຫຼາຍຮູບການ ຊຶ່ງສາມາດສັງລວມໄດ້ດັ່ງນີ້:
1. ຝ່າຍໃດໜຶ່ງໄດ້ສະເໜີ ຫຼື ແຈ້ງການປ່ຽນແປງສັນຍາ ໃຫ້ອີກຝ່າຍໜຶ່ງຢ່າງເປັນລາຍລັກອັກສອນ ຊຶ່ງຝ່າຍສະເໜີອາດຈະກຳນົດເວລາໃຫ້ຕອບກັບ ຫຼື ຕົກລົງຕາມການສະເໜີນັ້ນ ໃນກໍລະນີຝ່າຍສະເໜີບໍ່ໄດ້ກຳນົດເວລາຕອບຮັບ ຝ່າຍທີ່ໄດ້ຮັບຄຳສະເໜີຕ້ອງຕອບກັບພາຍໃນກຳນົດສາມສິບວັນ ນັບແຕ່ວັນໄດ້ຮັບຄຳສະເໜີເປັນຕົ້ນໄປ.
ການພົວພັນຄ້າຂາຍ ການດຳເນີນທຸລະກິດ ສ່ວຍຫຼາຍນິຍົມໃຊ້ການສື່ສານຫາກັນດ້ວຍການສົ່ງເອກະສານທາງເອເລັກໂຕຣນິກ ເຊັ່ນ: ໂທລະສານ ຫຼື ຈົດໝາຍເອເລັກໂຕຣນິກ ຊຶ່ງຝ່າຍໜຶ່ງອາດຈະສົ່ງໃຫ້ອີກຝ່າຍໜຶ່ງພິຈາລະນາ ພ້ອມທັງເວລາຕອບກັບ ສ່ວນຫຼາຍມັກຈະໃຊ້ຄຳວ່າ: ຖ້າບໍ່ຕອບກັບພາຍໃນກຳນົດເວລາທີ່ສະເໜີມານີ້ ໃຫ້ຖືວ່າຝ່າຍທີ່ໄດ້ຮັບການສະເໜີນັ້ນຕົກລົງເຫັນດີ.
ອີກກໍລະນີໜຶ່ງທີ່ເຄີຍປະຕິບັດທົ່ວໄປ ແມ່ນການສົ່ງຮ່າງເນື້ອໃນທີ່ກຳນົດຂໍ້ສະເໜີໃໝ່ ແລະ ຖ້າຫາກຝ່າຍທີ່ສະເໜີເບື້ອງຕົ້ນຕົກລົງເຫັນດີ ກໍໃຫ້ລົງລາຍເຊັນ ແລະ ສົ່ງກັບຄືນ ໃນກໍລະນີນີ້ ຖືວ່າຂໍ້ສະເໜີໃໝ່ມີຜົນສັກສິດ ນັບແຕ່ເວລາສົ່ງກັບເປັນຕົ້ນໄປ ຍົກເວັ້ນກົດໝາຍໄດ້ມີການກຳນົດໄວ້ຢ່າງອື່ນ ເຊັ່ນ: ໃນກໍລະນີທີ່ຈຳເປັນຕ້ອງໄດ້ຈົດທະບຽນ ຫຼື ຢັ້ງຢືນຈາກນາຍທະບຽນສານ.
2. ການສະເໜີປ່ຽນແປງສັນຍາອາດຈະດຳເນີນທາງປາກເປົ່າກໍໄດ້ ຖ້າໄດ້ບອກເວລາໄວ້ກໍໃຫ້ປະຕິບັດຕາມນັ້ນ ຖ້າຫາກວ່າບໍ່ໄດ້ກຳນົດເວລາ ກໍໃຫ້ປະຕິບັດຕາມກົດໝາຍ.
ຜົນຂອງການປ່ຽນແປງເນື້ອໃນຂອງສັນຍາ ເມື່ອສັນຍາໄດ້ຕົກລົງຮັບຮອງເອົາການປ່ຽນແປງເນື້ອໃນຂອງສັນຍາ ກໍຖືວ່າສັນຍານັ້ນມີຜົນສັກສິດນັບແຕ່ເວລາໄດ້ຕົກລົງເຫັນດີນຳກັນເປັນຕົ້ນໄປ ຫຼື ຕາມທີ່ໄດ້ກຳນົດໄວ້ໃນສັນຍານັ້ນ.
ໂດຍທົ່ວໄປແລ້ວ ສັນຍາທີ່ຕົກລົງເຫັນດີ ໂດຍຄູ່ສັນຍາ ມີຜົນສັກສິດນັບແຕ່ເວລາລົງລາຍເຊັນ ຫຼື ຕາມທີ່ໄດ້ກຳນົດໄວ້ໃນສັນຍາ ຫຼື ຕາມກົດໝາຍເຖິງຢ່າງໃດກໍຕາມ ເພື່ອເຮັດໃຫ້ການຕົກລົງປ່ຽນແປງເນື້ອໃນສັນຍາ ດັ່ງກ່າວໃຫ້ມີຄວາມໜັກແໜ້ນທາງດ້ານກົດໝາຍ ຄວນມີການຢັ້ງຢືນຄວາມຖືກຕ້ອງຈາກທະບຽນສານ ສິດ ແລະ ພັນທະເກົ່າທີ່ຖືກປ່ຽນແປງແລ້ວນັ້ນຖືວ່າສີ້ນສຸດລົງ.
ສຳລັບສັນຍາກ່ຽວກັບຊັບສິ່ງຂອງທີ່ຕ້ອງໄດ້ຈົດທະບຽນ ຖ້າມີການປ່ຽນແປງເນື້ອໃນຂອງສັນຍາກ່ຽວກັບຊັບນັ້ນ ກໍຕ້ອງໄດ້ຈົດທະບຽນເຊັ່ນດຽວກັນ.
ໂດຍ: ໄມ້ງັດ