ຖ້າເວົ້າເຖິງການສັນຈອນແລ້ວ ຫຼາຍທ່ານກໍຄົງຄິດວ່າມີແຕ່ຍວນຍານພາຫະນະທີ່ຕ້ອງປະຕິບັດລະບຽບການສັນຈອນ ແຕ່ຄວາມເປັນຈິງແລ້ວ ຄົນຍ່າງເອງກໍຕ້ອງປະຕິບັດລະບຽບເຊັ່ນດຽວກັນ ເພື່ອຫຼີກລ່ຽງບໍ່ໃຫ້ເກີດອຸບັດເຫດທີ່ອາດຈະເກີດຂຶ້ນ ເນື່ອງຈາກໃນໄລຍະຜ່ານມາ ກໍເຄີຍມີຂ່າວອອກຜ່ານສື່ຕ່າງໆວ່າມີອຸບັດເຫດທີ່ຄູ່ກໍລະນີເປັນຄົນຍ່າງ.
ດັ່ງນັ້ນ ໃນຄໍລຳຈະລາຈອນມື້ນີ້ ຜູ້ຂຽນຂໍນຳສະເໜີ ລະບຽບສຳລັບຄົນຍ່າງທີ່ຕ້ອງປະຕິບັດ ເຊິ່ງລະບຽບດັ່ງກ່າວນີ້ ແມ່ນໄດ້ກຳນົດໃນກົດໝາຍວ່າດ້ວຍການຈະລາຈອນທາງບົກ ໃນມາດຕາ 10 ເຊິ່ງໃນມາດຕາດັ່ງກ່າວລະບຸເຖິງການຍ່າງຕາມທາງ ແລະ ຍ່າງຂ້າມທາງ ໃນຕົວເມືອງ ແລະ ເທສະບານ ໃຫ້ປະຕິບັດດັ່ງນີ້:
ຍ່າງໄປຕາມທາງທີ່ໄດ້ກຳນົດໄວ້ສຳລັບໃຫ້ຄົນຍ່າງ ຖ້າຫາກບໍ່ມີທາງສຳລັບຄົນຍ່າງ ກໍໃຫ້ຍ່າງລຽບຕາມແຄມທາງເບື້ອງຊ້າຍ ເພື່ອສາມາດແນມເຫັນລົດທີ່ແລ່ນເຂົ້າມາຫາຕົນເອງ ຖ້າຫາກມີຫຼາຍຄົນຍ່າງນຳກັນ ໃຫ້ຍ່າງຕາມຫຼັງກັນເປັນແຖວດຽວ ແລະ ແນບເຂົ້າແຄມທາງ ຍົກເວັ້ນການສວນສະໜາມ ຂະບວນທາງການ ຂະບວນແຫ່ພິທີທາງສາສະໜາ ສົ່ງສະການ ຫຼື ຂະບວນຍ່າງອື່ນໆທີ່ໄດ້ຮັບອະນຸຍາດ.
ຍ່າງຂ້າມຕາມທາງມ້າລາຍ ບ່ອນມີໄຟສັນຍານ ຂົວຂ້າມທາງ ອຸໂມງ ຫຼື ບ່ອນທີ່ກຳນົດໄວ້ ຖ້າຫາກບໍ່ມີບ່ອນຂ້າມທາງ ອຸມົງ ຫຼື ບ່ອນທີ່ກຳນົດໄວ້ ຖ້າຫາກບໍ່ມີບ່ອນຂ້າມຕາມທີ່ໄດ້ກຳນົດໄວ້ນີ້ ໃຫ້ຍ່າງຂ້າມທາງຢູ່ບ່ອນທີ່ເຫັນວ່າມີຄວາມປອດໄພ.
ພ້ອມນັ້ນ ໃນມາດຕາດັ່ງກ່າວຍັງລະບຸວ່າ ທຸກຄົນມີໜ້າທີ່ຊ່ວຍເຫຼືອເດັກນ້ອຍ ຜູ້ເຖົ້າ ຄົນພິການ ແລະ ຜູ້ບໍ່ສາມາດຊ່ວຍຕົນເອງໄດ້ໃນເວລາຍ່າງຂ້າມທາງ.
ຖ້າເບິ່ງຕາມສະພາບຕົວຈິງ ຄົນຍ່າງຕາມເສັ້ນທາງຕ່າງໆ ອາດຍັງບໍ່ທັນຮູ້ແຈ້ງໃນລະບຽບດັ່ງກ່າວ ເຊິ່ງເຫັນໄດ້ວ່າຍັງບໍ່ທັນປະຕິບັດໄດ້ດີ ຄົນສ່ວນຫຼາຍຍັງຍ່າງແນວຂວາ ຂ້າມທາງໃນຈຸດທີ່ມີຄວາມສ່ຽງເຊັ່ນ ທາງໂຄ້ງ ທາງແຍກ ທີ່ບໍ່ສາມາດເບິ່ງເຫັນລົດທີ່ຈະເຂົ້າມາຫາຕົນເອງ ບາງກໍລະນີກໍຍ່າງລຽບດອນກາງທາງ ແລະ ອື່ນໆ ເບິ່ງແລ້ວບໍ່ມີຄວາມປອດໄພ.
ຢ່າງໃດກໍຕາມ ນອກຈາກລະບຽບສຳລັບຄົນຍ່າງ ທີ່ໄດ້ກຳນົດໄວ້ໃນກົດໝາຍແລ້ວ ຄົນຍ່າງເອງກໍຕ້ອງມີສະຕິຕື່ມອີກ ເພື່ອຄວາມປອດໄພຂອງຕົນເອງ.
ໂດຍ: ເມັດຝົນ