ເພື່ອສົ່ງເສີມສຸຂະພາບຂອງແມ່ຍິງໃນໄລຍະຖືພາ ເກີດ ແລະ ຫຼັງເກີດລູກ ທັງເປັນການໃຫ້ຄວາມຮູ້ແກ່ແມ່ໃນໄລຍະຖືພາ ສາມີ ຄອບຄົວໄດ້ຮູ້ ແລະ ເຂົ້າໃຈກ່ຽວກັບການກັນ ຕອບໂຕ້ ແລະ ຄວບຄຸມພະຍາດອັກເສບປອດທີ່ເກີດຈາກເຊື້ອຈຸຣະໂລກສາຍພັນໃໝ່ ແລະ ເພື່ອເປັນການແລກປ່ຽນປະສົບການລະຫວ່າງຜະດຸງຄັນ ແມ່ຖືພາ ຄອບຄົວ ກ່ຽວກັບການລ້ຽງລູກດ້ວຍນົມແມ່ ແລະ ໂພຊະນາການໃນແມ່ຍິງຖືພາ ແລະ ສະເຫຼີມສະຫຼອງວັນຜະດຸງຄັນສາກົນ ກໍຄືວັນຜະດຸງຄັນລາວ ຄົບຮອບ 10 ປີ ທີ່ຈະມາເຖິງ.
ໂຮງໝໍແມ່ ແລະ ເດັກ ຮ່ວມກັບອົງການສະຫະປະຊາຊາດ ເພື່ອປະຊາກອນ ກົມການສຶກສາສາທາລະນະສຸກ ກະຊວງສາທາລະນະສຸກ ໄດ້ຈັດກິດຈະກຳບໍລິການສຸຂະພາບຂອງແມ່ ແລະ ເດັກ ໃຫ້ແມ່ຍິງຖືພາ ແລະ ແມ່ຫຼັງເກີດລູກ ຂຶ້ນວັນທີ 23 ກໍລະກົດ 2020 ຢູ່ໂຮງໝໍດັ່ງກ່າວ ໂດຍມີທ່ານ ຜາສຸກ ວົງວິຈິດ ຫົວໜ້າກົມການສຶກສາສາທາລະນະສຸກ ພ້ອມດ້ວຍແພດຜະດຸງຄັນ ແມ່ຍິງຖືພາ ເຂົ້າຮ່ວມ.
ທ່ານ ຜາສຸກ ວົງວິຈິດ ກ່າວວ່າ: ມື້ນີ້ ເປັນມື້ທີ່ມີຄວາມໝາຍຄວາມສຳຄັນ ທີ່ຜະດຸງຄັນທົ່ວປະເທດໄດ້ຮ່ວມແຮງຮ່ວມໃຈ ເຕົ້າໂຮມຄວາມສາມັກຄີເປັນຈິດໜຶ່ງໃຈດຽວ ຈັດກິດຈະກຳນີ້ຂຶ້ນ ເພື່ອເປັນການສັນລະເສີນຜົນງານການເຄື່ອນໄຫວຂອງຜະດຸງຄັນໃນໄລຍະຜ່ານມາ ຜະດຸງຄັນແມ່ນບຸກຄົນທີ່ສຳຄັນໃນການດູແລສຸຂະພາບແມ່ ແລະ ເດັກ ຄອບຄົວ ແລະ ຊຸມຊົນ ເພື່ອຫຼຸດຜ່ອນອັດຕາການຕາຍຂອງແມ່ ແລະ ເດັກໃຫ້ຕ່ຳລົງ ເຊິ່ງໄລຍະຜ່ານມາຕົວເລກອັດຕາການຕາຍຂອງແມ່ຢູ່ປະເທດລາວ ແມ່ນສູງທີ່ສຸດທຽບໃສ່ປະເທດໃນອາຊີຕາເວັນອອກສ່ຽງໃຕ້ ອັດຕາການຕາຍຂອງແມ່ ສາເຫດຫຼັກແມ່ນການຕົກເລືອດຫຼັງເກີດ ຮອງລົງມາແມ່ນເລືອດອອກໃນໄລຍະຖືພາ ພາວະຊັກກະຕຸກ ການຕິດເຊື້ອຫຼັງເກີດ ການຫຼຸລູກ ແລະ ອື່ນໆ.
ເພື່ອຫຼຸດຜ່ອນບັນຫາດັ່ງກ່າວ ຜະດຸງຄັນຕ້ອງເນັ້ນໃສ່ການກວດ ແລະ ກັ່ນຕອງສຸຂະພາບຂອງແມ່ໃນໄລຍະຖືພາ ເກີດລູກ ແລະ ຫຼັງເກີດ ຖ້າມີການກັ່ນຕອງທີ່ດີແຕ່ເລີ່ມຕົ້ນຈະເຮັດໃຫ້ປ້ອງກັນການເກີດພາວະແຊກຊ້ອນຕໍ່ແມ່ ແລະ ເດັກ ພ້ອມນີ້ຄະນະບໍລິຫານຂອງຜະດຸງຄັນທົ່ວປະເທດ ຕ້ອງສຸມທຸກກຳລັງແຮງໃນການໃຫ້ບໍລິການສຸຂະພາບແມ່ຍິງຖືພາ ເກີດລູກ ຫຼັງເກີດລູກ ເດັກເກີດໃໝ່ ເດັກນ້ອຍ ແລະ ຍິງໄວຈະ ເລີນພັນ ເພື່ອຊ່ວຍຫຼຸດຜ່ອນອັດຕາການຕາຍຂອງແມ່ ແລະ ເດັກ ໃນ ສປປ ລາວ.