ສະໂມສອນບານບ້ວງລາວ ໃນນາມທີມຫຼວງພະບາງ ຕົວແທນໜຶ່ງດຽວຈາກປະເທດລາວ ເຂົ້າຮ່ວມການແຂ່ງຂັນບານບ້ວງລະດັບລີກ ຢູ່ປະເທດໄທ ລາຍການ Thailand Basketball Super League 2020 ໃນນີ້ທີມບານບ້ວງຈາກເມືອງມໍລະດົກໂລກຫຼວງພະບາງ ສາມາດຄວ້າອັນດັບ 3 ມາຄອງ 2 ປີຕິດຕໍ່ກັນ ຫຼັງເອົາຊະນະທີມ ອະດອຍທ໌ຈາກສິງກະໂປ 82-53 ຄະແນນ ໄດ້ຮັບເງິນລາງວັນ 600.000 ບາດ ຫຼື ປະມານ 171 ລ້ານກີບ ຂະນະທີ່ອັນທີ 4 (ສິງກະໂປ) ໄດ້ຮັບເງິນລາງວັນ 500.000 ບາດ ສ່ວນອັນດັບ 1 ເປັນຂອງແຊັມເກົ່າທີມ ໄຮເທັກ (Hi-Tech) ຈາກໄທ ໄດ້ຮັບຂັນແຊັມ ພ້ອມເງິນລາງວັນ 1,2 ລ້ານບາດ ອັນດັບ 2 ທີມ Dunkin’ Raptors ຈາກໄທ ໄດ້ຮັບເງິນລາງວັນ 700.000 ບາດ.
ການແຂ່ງຂັນລາຍການນີ້ ມີ 10 ທີມເຂົ້າຮ່ວມ ຄື: ຈາກໄທ 2 ທີມ ຟີລິບປິນ 2 ທີມ ສິງກະໂປ ມາເລເຊຍ ອິນໂດເນເຊຍ ຫວຽດນາມ ບຣູໄນ ແລະ ລາວ ປະເທດລະ 1 ທີມ ສຳລັບທີມບານບ້ວງຫຼວງພະບາງ ເຂົ້າຮ່ວມແຂ່ງຂັນໂດຍມີນັກກີລາທີ່ເປັນຄົນແຂວງຫຼວງພະບາງ ແລະ ຄົນລາວທີ່ຖືສັນຊາດຕ່າງປະເທດ ບວກກັບນັກກີລາຕ່າງປະເທດຈຳນວນໜຶ່ງ ເຊິ່ງການຊີງອັນດັບ 3 ຄັ້ງນີ້ ນັກກີລາຕົວຈິງທີ່ເປັນຕ່າງຊາດທີມຂອງຫຼວງພະບາງ ບໍ່ສາມາດເດີນທາງໄປຮ່ວມແຂ່ງຂັນໄດ້ ເນື່ອງຈາກປະເທດໄທຍັງບໍ່ອະນຸຍາດໃຫ້ຄົນຕ່າງຊາດເຂົ້າປະເທດ ເພາະຍັງມີການລະບາດຂອງພະຍາດໂຄວິດ-19 ເຮັດໃຫ້ທີມຫຼວງພະບາງ ຈຳເປັນຕ້ອງໄດ້ເອົານັກກີລາຢູ່ພາຍໃນປະເທດໄທ ທີ່ເຄີຍຫຼີ້ນໃຫ້ທີມຫຼວງພະບາງໃນລະດູການຜ່ານມາແຂ່ງຂັນແທນ.