ແພດໄດ້ແນະນຳ 8 ວິທີໃຊ້ຢາໃນ “ຜູ້ອາຍຸສູງ” ຊ່ວຍຫຼຸດຜົນຂ້າງຄຽງ ເພາະຢ້ານວ່າຜູ້ອາຍຸສູງໃຊ້ຢາຫຼາຍ ສະເລ່ຍຢາແພດສັ່ງ 4-5 ຊະນິດ ຊື້ເອງອີກປະມານ 2 ຊະນິດ ພົບຜົນຂ້າງຄຽງຈາກການໃຊ້ຢາ 1 ໃນ 3 ມັກເປັນຜູ້ອາຍຸສູງ.
ອາຍຸສູງ ເປັນກຸ່ມປະຊາກອນທີ່ມີການໃຊ້ຢາໃນອັດຕາສ່ວນທີ່ສູງ ເມື່ອທຽບກັບປະຊາກອນທັງໝົດ ໂດຍອາດເປັນຢາທີ່ແພດສັ່ງ ແລະ ຢາຈາກແຫຼ່ງອື່ນໆ ເຊັ່ນ: ຢາທີ່ຊື້ຮັບປະທານເອງ ຢາພື້ນເມືອງ ດັ່ງນັ້ນ ແພດທີ່ດູແລຜູ້ອາຍຸສູງ ຈຶ່ງມີຄວາມຈຳເປັນທີ່ຈະຕ້ອງຮູ້ຫຼັກການ ແລະ ບັນຫາກ່ຽວກັບການໃຊ້ຢາໃນຜູ້ອາຍຸສູງ ຕະຫຼອດຈົນການສັ່ງຢາຢ່າງເໝາະສົມ ເນື່ອງຈາກຜູ້ອາຍຸສູງມີໂລກຮ່ວມຫຼາຍຢ່າງ ແລະ ມີໂອກາດໄດ້ຮັບຢາຫຼາຍຊະນິດ ໂດຍສະເລ່ຍ ຜູ້ອາຍຸສູງ 1 ຄົນ ຈະມີຢາຕາມແພດສັ່ງ 4-5 ຊະນິດ ແລະ ອາດມີ 2 ຊະນິດ ຈາກການຊື້ຢາມາຮັບປະທານເອງ ນອກຈາກນີ້ ຜູ້ອາຍຸສູງຈຳນວນບໍ່ໜ້ອຍ ມີບັນຫາກ່ຽວກັບການຈັດກຽມຢາເພື່ອຮັບປະທານ ເຊັ່ນ: ລືມກິນ ຫຼື ກິນຊ້ຳ ເຮັດໃຫ້ເປັນກຸ່ມມີຄວາມສ່ຽງສູງທີ່ຈະເກີດຜົນຂ້າງຄຽງຈາກການໃຊ້ຢາ ຊຶ່ງພົບວ່າຜູ້ປ່ວຍທີ່ເກີດຜົນຂ້າງຄຽງ 1 ໃນ 3 ເປັນຜູ້ອາຍຸສູງ ແລະ ຕ້ອງນອນປິ່ນປົວໃນໂຮງໝໍເຖິງ 10-20%.
ການປ່ຽນແປງຂອງຮ່າງກາຍໃນຜູ້ອາຍຸສູງ ມີຜົນຕໍ່ການໃຊ້ຢາ ເຮັດໃຫ້ການດູດຊຶມຢາຫຼຸດລົງ ການກະຈາຍຕົວຂອງຢາບໍ່ຄ່ອຍດີ ນອກຈາກນີ້ ອາດພົບປະລິມານຢາທີ່ຄ້າງໃນຮ່າງກາຍ ແລະ ພົບວ່າການກຳຈັດຢາທາງໝາກໄຂ່ຫຼັງເຮັດໄດ້ຫຼຸດລົງ ຜູ້ອາຍຸສູງຍັງມີການປ່ຽນແປງທາງຮ່າງກາຍອີກຫຼາຍຢ່າງທີ່ສົ່ງຜົນຕໍ່ການໃຊ້ຢາ ເຊັ່ນ: ມີຄວາມໄວຕໍ່ຢາບາງຊະນິດເພີ່ມຂຶ້ນ ໃນຂະນະທີ່ມີຄວາມໄວຕໍ່ຢາບາງຊະນິດຫຼຸດລົງ ສິ່ງເຫຼົ່ານີ້ກໍ່ໃຫ້ເກີດບັນຫາກັບການສັ່ງຢາໃນຜູ້ອາຍຸສູງຢ່າງຫຼວງຫຼາຍ ທັ້ງນີ້ ຜູ້ອາຍຸສູງສາມາດປ້ອງກັນການເກີດຜົນຂ້າງຄຽງຈາກການໃຊ້ຢາ ດ້ວຍການປະຕິບັດດັ່ງນີ້:
1. ເມື່ອພົບແພດ ຄວນມີລາຍລະອຽດຂອງຊື່ຢາທີ່ຮັບປະທານ ຊື່ໂລກ ແລະ ປະຫວັດການແພ້ຢາຕິດຕົວໄປດ້ວຍ.
2. ເລີ່ມຕົ້ນການປິ່ນປົວແບບບໍ່ໃຊ້ຢາ ເຊັ່ນ ຖອກທ້ອງຄວນດື່ມນ້ຳຫຼາຍໆ ແລະ ຮັບປະທານອາຫານທີ່ມີເສັ້ນໄຍອາຫານສູງ.
3 ຮັບປະທານຢາຕາມແພດສັ່ງຢ່າງສະໝ່ຳສະເໝີ ແລະ ຕິດຕາມການປິ່ນປົວກັບແພດເປັນໄລຍະ ຢ່ານຳຕົວຢ່າງຢາເດີມໄປຊື້ມາຮັບປະທານເອງ.
4. ນຳຢາທັງໝົດ ບໍ່ວ່າຈະໄດ້ຮັບຈາກບ່ອນໃດໄປໃຫ້ແພດກວດກາເປັນໄລຍະ.
5. ຫຼີກລ່ຽງການຊື້ຢາພື້ນເມືອງ ຢາໝໍ້ ແລະ ຢາລູກກອນມາຮັບປະທານເອງ ເນື່ອງຈາກອາດມີຜົນເສຍຕໍ່ຮ່າງກາຍ.
6. ຄວນກວດກາເບິ່ງວັນໝົດອາຍຸຂອງຢາ ແລະ ຢ່າເກັບຢາທີ່ເຫຼືອໄວ້ຮັບປະທານຄັ້ງຕໍ່ໄປ ເນື່ອງຈາກຢາອາດໝົດອາຍຸ ຫຼື ອາດບໍ່ໃຊ້ຢາຕົວເດີມ.
7. ຄວນປຶກສາແພດເຖິງສາເຫດທີ່ຈະຢຸດຢາ ເຊັ່ນ: ເກີດຜົນຂ້າງຄຽງ ຢາບໍ່ໄດ້ຜົນ ວິທີການໃຊ້ຢາຊັບຊ້ອນເກີນໄປ ຢາແພງເກີນໄປ.
8. ຮັບການປິ່ນປົວ ແລະ ຕິດຕາມກັບແພດຄົນເດີມ ຫາກຕ້ອງຮັກສາກັບແພດຫຼາຍກວ່າ 1 ຄົນ ຕ້ອງນຳປະຫວັດເກົ່າ ແລະ ລາຍການຢາທີ່ໃຊ້ຢູ່ມາແຈ້ງໃຫ້ແພດຊາບ ແພດທີ່ປິ່ນປົວຜູ້ອາຍຸສູງຕ້ອງກວດສອບຢາທັງໝົດທີ່ຜູ້ອາຍຸສູງໄດ້ຮັບທຸກແຫຼ່ງ ແລະ ພິຈາລະນາຢາທີ່ອາດມີປະຕິກິລິຍາຕໍ່ກັນ.
ວ. ດາລາວົງ – ນຳສະເໜີ