ຈີນ ພາໂລກຕະລຶງອີກຮອບ ກັບການພັດທະນາຫຼ້າສຸດ “ເຮລິຄອບເຕີໄຮ້ຄົນຂັບ” ພ້ອມກຽມໃຊ້ງານຈິງ “ດັບໄຟປ່າ ຄົ້ນຫາ ແລະ ກວດກາພື້ນທີ່”.
ໂລກເຄີຍໄດ້ເຫັນວ່າ ມະນຸດສາມາດພັດທະນາສັກກະຍະພາບຂອງຕົວເອງໄດ້ຫຼາຍພຽງໃດ ກັບການຜະລິດປະດິດສິ່ງໃດສິ່ງໜຶ່ງຂຶ້ນມາ ທີ່ມີປະໂຫຍດຕໍ່ມະນຸດຊາດດ້ວຍກັນເອງ ຕົວຢ່າງເຊັ່ນລົດໄຮ້ຄົນຂັບ ທີ່ເຮົາໄດ້ເຫັນການພັດທະນາຈົນອອກມາແລ່ນຢູ່ເທິງຖະໜົນ ເຖິງແມ່ນວ່າຈະເປັນພຽງການທົດສອບກໍຕາມ ແຕ່ກໍບໍ່ໜ້າຍາກທີ່ຈະເດົາໄດ້ວ່າໂລກການເຄື່ອນທີ່ການຄົມມະນາຄົມໃນອະນາຄົດ ໜ້າຕາຂອງມັນຈະເປັນເຊັ່ນໃດ.
ແຕ່ຫາກວ່າລົດໄຮ້ຄົນຂັບເຮັດໃຫ້ທ່ານຕື່ນເຕັ້ນໄດ້ແລ້ວ ການພັດທະນາຈາກເມືອງຈີນໃນຄັ້ງນີ້ ຈະຍິ່ງເຮັດໃຫ້ຫົວໃຈໄດ້ຕື່ນເຕັ້ນຫຼາຍກວ່າເດີມ ເພາະຫຼ້າສຸດ ຜູ້ພັດທະນາເອອາຣ໌ 500 ຊີ (AR 500C) ຫຼື “ເຮລິຄອບເຕີໄຮ້ຄົນຂັບ” ສຳລັບໃຊ້ງານບໍລິເວນທີ່ຮາບສູງລຳທຳອິດຂອງຈີນ ໄດ້ອອກມາລະບຸຜ່ານສຳນັກຂ່າວຊິນຮວາວ່າ AR500C ຫາກໍສຳເລັດ ການບິນຮອບປະຖົມມະລຶກໄປເມື່ອບໍ່ນານມານີ້ ໃນມົນທົນຈຽງຊີ ທາງຕາເວັນອອກຂອງຈີນ ສະຖາບັນວິໄຈເຮລິຄອບເຕີໃນເມືອງຈິ່ງເຕີເຈິ້ນ ມົນທົນຈຽງຊີ ສັງກັດບໍລິສັດອຸດສາຫະກຳການບິນແຫ່ງປະເທດຈີນ (AVIC) ຊຶ່ງເປັນຜູ້ພັດທະນາ AR500C ລະບຸວ່າ AR500C ໄດ້ດຳເນີນການບິນຄັ້ງທຳອິດເມື່ອວັນທີ 20 ພຶດສະພາທີ່ຜ່ານມາ ໂດຍຂຶ້ນບິນເປັນເວລາປະມານ 20 ນາທີ ບໍ່ນັບລວມເວລານຳເຮືອບິນຂຶ້ນ-ລົງ.
AR500C ໄດ້ຮັບການພັດທະນາມາຈາກເຮລິຄອບເຕີໄຮ້ຄົນຂັບ AR500B ໂດຍ AR500C ມີນ້ຳໜັກແລ່ນຂຶ້ນສູງສຸດ (MTOW) 500 ກິໂລກຣາມ ຄວາມສູງໃນການບິນຂຶ້ນ 5.000 ແມັດ ແລະ ມີເພດານບິນປົກກະຕິ 6.700 ແມັດ ເຮລິຄອບເຕີຮຸ່ນນີ້ສາມາດບິນໄດ້ 5 ຊົ່ວໂມງຕໍ່ການສາກ 1 ຄັ້ງ ດ້ວຍຄວາມໄວລະດັບສູງສຸດ 170 ກິໂລແມັດຕໍ່ຊົ່ວໂມງ ແລະ ເດີນທາງດ້ວຍຄວາມໄວ 165 ກິໂລແມັດຕໍ່ຊົ່ວໂມງ.
ທັງນີ້ AR500C ຈະຖືກນຳໄປໃຊ້ໃນການລາດຕະເວນ ແລະ ການຕິດຕໍ່ສື່ສານ ໂດຍສາມາດໃຊ້ປະໂຫຍດໄດ້ໃນຫຼາຍດ້ານເຊັ່ນ ການລົບກວນທາງໄຟຟ້າ ການສະໜັບສະໜູນການຄົ້ນຫາ ການຄວບຄຸມໄຟ ແລະ ຄວາມປອດໄພ ການປ້ອງກັນໄຟປ່າ ການກວດກາທາງທະເລ ແລະ ການຂົນສົ່ງອຸປະກອນ.