ທີ່ເກາະໄຕ້ຫວັນ: ຂ່າວຕ່າງປະເທດເມື່ອ 3 ປີຜ່ານມາ ບອກວ່າ ວັດຫຼາຍໆແຫ່ງໃນເກາະແຫ່ງນີ້ ໄດ້ອອກມາດຕະການຈຳກັດ ເລື່ອງການຈູດທູບ-ທຽນບູຊາຮູບປັ້ນອິນທາຟ້າແຖນ ຫຼື ພະພຸດທະຮູບ ຈຸດປະສົງຂອງມາດຕະການຈຳກັດນີ້ ກໍແມ່ນເພື່ອບໍ່ໃຫ້ເກີດມີຄວັນປົກຄຸມຕາມບໍລິເວນວັດຄືເມື່ອກ່ອນ ຄວັນຈາກທູບ-ທຽນນີ້ ເມື່ອໂຮມເຂົ້າກັນຫຼາຍຕໍ່ຫຼາຍ ມັນກໍສາມາດກາຍເປັນມົນລະພິດໃນວົງກວ້າງໄດ້ ຂ່າວບອກໃຫ້ຮູ້ວ່າ ຊາວເກາະໄຕ້ຫວັນ ທີ່ເຂົ້າໄປວັດໃນປັດຈຸບັນນັ້ນ ໄດ້ພາກັນປ່ຽນພຶດຕິກຳ ຄື: ບໍ່ຈູດທູບ-ທຽນບູຊາ ຫຼື ຈູດເງິນເຈ້ຍບູຊາ ເພື່ອຂໍພອນອີກແລ້ວ ສິ່ງທີ່ຄົນເຫຼົ່ານີ້ກະທຳ ກໍຄື ຍົກມືໄຫວ້ຂາບລົງ ແລ້ວສູດມົນຂໍພອນຕາມທຳມະດາ ບົດຮຽນນີ້ໃຫ້ຮູ້ວ່າ ການປະກອບສ່ວນປົກປັກຮັກສາສິ່ງແວດລ້ອມນັ້ນ ສາມາດເລີ່ມຈາກສິ່ງເລັກໆນ້ອຍໆ ທີ່ຕິດພັນກັບພຶດຕິກຳປະຈຳວັນຂອງຄົນເຮົາ.
ທີ່ອີຕາລີ ແລະ ຊູແອດ: (ຫຼື ສະວີເດັນ) ມີຂ່າວທີ່ຄ້າຍຄຽງກັນຈາກ 2 ປະເທດອອກມາເມື່ອ 5 ປີຜ່ານມາ ກ່ຽວກັບການແກ້ໄຂມົນລະພິດທາງອາກາດ ດ້ວຍການຫັນມາໃຊ້ລົດຖີບແທນລົດໃຫຍ່ສ່ວນຕົວ ນັ້ນກໍຄື ຢູ່ປະເທດອີຕາລີ ແລະ ປະເທດຊູແອັດ ສອງປະເທດນີ້ຕັ້ງຢູ່ທະວີບເອີຣົບ ສຳລັບຢູ່ອີຕາລີ ທາງການຂອງມີລານ ນະຄອນທີ່ເປັນສູນກາງດ້ານເສດຖະກິດ ໄດ້ທົດລອງໃຊ້ລົດຖີບໂດຍສານແທນລົດໃຫຍ່ ເປັນເວລາ 3 ວັນ ຄື: ແຕ່ວັນຈັນຮອດວັນພຸດ ໃນອາທິດທ້າຍເດືອນທັນວາ ປີ 2015 ໂດຍເລີ່ມແຕ່ 10 ໂມງເຊົ້າເຖິງ 4 ໂມງຕອນບ່າຍ ໃນ 3 ວັນທີ່ມີການທົດລອງນັ້ນ ທາງການຂອງນະຄອນມີລານ ໄດ້ສັ່ງຫ້າມລົດໃຫຍ່ສ່ວນຕົວອອກແລ່ນຕາມຖະໜົນເດັດຂາດ ຜົນຈາກການທົດລອງໄດ້ສ້າງຄວາມພໍອົກພໍໃຈໃຫ້ແກ່ຊາວນະຄອນ ຍ້ອນວ່າ ມົນລະພິດທາງອາກາດໄດ້ຫຼຸດລົງທັນຕາເຫັນ ທ່ານ ປິເອ ຟຼານເຊສະໂກ ອາຣານ ອຳນວຍການຫ້ອງການຂົນສົ່ງຂອງນະຄອນມີລານ ອອກມາມີຄຳເຫັນກ່ຽວກັບຜົນຂອງການທົດລອງໃຊ້ລະບົບໂດຍສານທາງເລືອກ ແທນການໃຊ້ລົດໃຫຍ່ສ່ວນຕົວນີ້ວ່າ: “ບັນຍາກາດຂອງນະຄອນໃນໄລຍະໃຊ້ລົດຖີບ ໃຊ້ຕີນຍ່າງ ແລະ ການໃຊ້ລົດໂດຍສານສາທາລະນະນັ້ນ ສຸດແສນວິເສດວິໂສເອົາແທ້ໆ” ຂ່າວໃຫ້ຮູ້ຕື່ມວ່າ ມົນລະພິດຢູ່ນະຄອນມີລານນັ້ນ ເຄິ່ງໜຶ່ງແມ່ນມາຈາກຄວັນລົດໃຫຍ່ ສ່ວນຢູ່ປະເທດຊູແອັດ ຫຼື ສະວີເດັນ ນັ້ນ ການໃຊ້ລົດຖີບໄດ້ກາຍເປັນລະບົບໂດຍສານທາງເລືອກແທນລົດໃຫຍ່ມາຫຼາຍປີແລ້ວ ແຕ່ເພື່ອຈູງໃຈໃຫ້ພົນລະເມືອງຫັນມາໃຊ້ລົດຖີບຫຼາຍຂຶ້ນ ຈົນເປັນນິໄສຫຼາຍຂຶ້ນ ທາງການຂອງປະເທດນີ້ ໄດ້ມີນະໂຍບາຍແຈກລົດຖີບໃຫ້ຄົນເອົາໄປຂີ່ເປັນເວລາ 6 ເດືອນ ໂດຍບໍ່ເສຍຄ່າ ແຕ່ມີຂໍ້ກຳນົດວ່າ ລົດຖີບທີ່ໄດ້ໄປນັ້ນ ຕ້ອງນຳໃຊ້ຢ່າງໜ້ອຍ 3 ຄັ້ງຕໍ່ອາທິດ ເປົ້າໝາຍຕົ້ນຕໍຂອງການແຈກລົດຖີບໃຫ້ຂີ່ລ້າໆນັ້ນ ກໍແມ່ນເພື່ອປ່ຽນພຶດຕິກຳຂອງນັກຮຽນ ຊາວໜຸ່ມ ຜູ້ປົກຄອງ ຜູ້ໂດຍສານ ແລະ ອື່ນໆ ໃຫ້ຫັນມາໃຊ້ລົດຖີບແບບຖາວອນ ທາງການຂອງຊູແອັດເຊື່ອວ່າ ໄລຍະ 6 ເດືອນນັ້ນ ພຽງພໍທີ່ຈະປ່ຽນນິໄສໃຫ້ຄົນນິຍົມໃຊ້ລົດຖີບ ຂ່າວບອກວ່າ ພາຍຫຼັງ 6 ເດືອນ ຜູ້ນຳໃຊ້ລົດຖີບສາມາດໄດ້ຮັບສ່ວນຫຼຸດໃນການຊື້ເອົາລົດຄັນດັ່ງກ່າວມາໃຊ້ແບບຖາວອນ ຢູ່ຊູແອດ ຄົນທີ່ເລືອກໃຊ້ລົດຖີບທຽວການ ຫຼື ໄປທຸລະຕ່າງໆນັ້ນ ມີຫຼາຍກວ່າ 50% ຂອງຈຳນວນພົນລະເມືອງຂອງປະເທດ.