ກອງປະຊຸມບົດບາດຂອງສື່ມວນຊົນ ໃນການສະກັດກັ້ນ ແລະ ຕ້ານການຄ້າມະນຸດ ຈັດຂຶ້ນວັນທີ 22 ກໍລະກົດ 2020 ທີ່ສູນເຝິກອົບຮົມແນວລາວສ້າງຊາດ ນະຄອນຫຼວງວຽງຈັນ ເປັນປະທານຂອງທ່ານ ອິນປອນ ນະຄອນສີ ຮອງຫົວໜ້າກົມສື່ມວນຊົນ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ແລະ ທ່ານ ນາງ ຊູກຽດ ປັນຍານຸວົງ ຫົວໜ້າໂຄງການຫຼຸດຜ່ອນຄວາມທຸກຍາກ ບັນດາບັນນາທິການ ສື່ມວນຊົນ ແລະ ຜູ້ໃຫ້ທຶນເຂົ້າຮ່ວມ.
ກອງປະຊຸມຄັ້ງນີ້ ຜູ້ເຂົ້າຮ່ວມໄດ້ຮັບຟັງກ່ຽວກັບສະພາບການຄ້າມະນຸດ ແລະ ການເຄື່ອນຍ້າຍແຮງງານທີ່ຖືກຕ້ອງ ແລະ ເຮັດວຽກທີ່ປອດໄພ ການປະກອບສ່ວນຂອງສື່ມວນຊົນ ໃນການສະກັດກັ້ນ ແລະ ການຄ້າມະນຸດ ແຜນໂຄສະນາໃນວັນສາກົນຕ້ານການຄ້າມະນຸດ ແລະ ເຮັດວຽກຮ່ວມກັບນັກຂ່າວ ຈັນຍາບັນຂອງນັກຂ່າວ ໃນການເຮັດວຽກກັບຜູ້ຖືກເຄາະຮ້າຍຈາກການຄ້າມະນຸດ ສະເໜີໂດຍອົງການວິນຣອກສາກົນ ອົງການສຸພະນິມິດ ແລະ ຄູ່ຮ່ວມອົງການຈັດຕັ້ງສາກົນອື່ນໆ ທັງນີ້ເພື່ອໃຫ້ສື່ມວນຊົນມີສ່ວນຮ່ວມໃນການສົ່ງເສີມສະໜັບສະໜູນ ແລະ ຊ່ວຍໂຄສະນາຕ້ານການຄ້າມະນຸດ ເປັນຕົ້ນ ການປູກຈິດສຳນຶກໃຫ້ເຂົາເຈົ້າມີຄວາມເຂົ້າໃຈ ການຄ້າມະນຸດແມ່ນສິ່ງທີ່ຜິດກົດໝາຍ.
ການຄ້າມະນຸດແມ່ນມີຫຼາຍຮູບການ ດັ່ງນັ້ນ ສື່ມວນຊົນຕ້ອງມີຄວາມເຂົ້າໃຈບັນຫາດັ່ງກ່າວເປັນຢ່າງດີ ໃນການລົງໂຄສະນາຜ່ານສື່ຕ່າງໆ ເປັນຕົ້ນການໃຊ້ຄຳສັບ ພາສາ ແລະ ອື່ນໆ ເພື່ອບໍ່ໃຫ້ແຕະຕ້ອງຕໍ່ຜູ້ໄດ້ຮັບເຄາະຮ້າຍ ແລະ ການພົວພັນຮ່ວມມືກັບຕ່າງປະເທດ.
ຜ່ານການເຝິກອົບຮົມຄັ້ງນີ້ ໄດ້ເຮັດໃຫ້ສື່ມວນຊົນທຸກຂະແໜງການມີຄວາມເຂົ້າໃຈຫຼາຍຂຶ້ນຕື່ມ ຕໍ່ກັບບັນຫາດັ່ງກ່າວ ເພື່ອຈະໄດ້ຂໍ້ມູນນຳໄປໂຄສະນາເຜີຍແຜ່ຕ້ານການຄ້າມະນຸດໃຫ້ກວ້າງຂວາງ ແລະ ເລິກເຊິ່ງກວ່າເກົ່າ ເພື່ອໃຫ້ທຸກພາກສ່ວນໃນສັງຄົມມີສ່ວນຮ່ວມຕ້ານການຄ້າມະນຸດນຳກັນ.