ນອກຈາກຄວບຄຸມນ້ຳໜັກ ຊຶ່ງເປັນສາເຫດຫຼັກໆອັນດັບຕົ້ນໆຂອງການເຈັບປ່ວຍດ້ວຍໂລກ ຂໍ່ອັກເສບ ອັນເນື່ອງມາຈາກນ້ຳໜັກຕົວທີ່ຫຼາຍກວ່າເກນປົກກະຕິ ຄົນປົກກະຕິ ຫຼື ນັກກີລາທີ່ມີຮ່າງກາຍແຂງແຮງເອງກໍດີ ຕ່າງກໍຢູ່ໃນກຸ່ມສ່ຽງ ເພາະຮ່າງກາຍຈຳເປັນຢ່າງຍິ່ງທີ່ຕ້ອງໃຊ້ຂໍ່ຕໍ່ຕ່າງໆ ໂດຍສະເພາະທີ່ຫົວເຂົ່າ ແລະ ຂໍ່ຕີນ ໃນການດຳລົງຊີວິດ.
ວັນນີ້ ເຮົາຈຶ່ງນຳສາລະຄວາມຮູ້ໃນການເສີມສ້າງຄວາມແຂງແກ່ນໃຫ້ກັບຂໍ່ຕໍ່ໃນຮ່າງກາຍ ເພື່ອປ້ອງກັນການເຈັບປ່ວຍຈາກໂລກຂໍ່ກະດູກຕ່າງໆ ກ່ອນໄວອັນຄວນ.
ປາທະເລ ນອກຈາກເປັນແຫຼ່ງອາຫານໂປຣຕີນຊັ້ນດີ ສຳລັບການຄວບຄຸມນ້ຳໜັກ ສານອາຫານໃນປາທະເລ ຍັງອຸດົມໄປດ້ວຍກົດໄຂມັນຈຳເປັນຢ່າງ ໂອເມກາ 3 ຊັ້ນຍອດ ແຫຼ່ງຄໍລາເຈນ ແລະ ແຄວຊຽມຊັ້ນດີ ທີ່ຈະຊ່ວຍເສີມສ້າງກະດູກໃຫ້ແຂງແຮງ ອີກທັງຍັງມີບົດບາດສຳຄັນໃນການຮັກສາມວນກະດູກອີກດ້ວຍ ຊຶ່ງລາຍການອາຫານທີ່ປຸງແຕ່ງຈາກປາທີ່ມີປະໂຫຍດທີ່ວ່ານີ້ ກໍໄດ້ແກ່ ປາແຊວມອນ ປາທູ ແລະ ປາຊາດີນ.
ໄຂ່ ອາຫານພື້ນຖານ ແຕ່ວ່າຄຸນຄ່າບໍ່ພື້ນ ຢ່າງທີ່ເຮົາຮູ້ໆກັນວ່າ ໄຂ່ນັ້ນຖືເປັນຂຸມຊັບທາງຮ່າງກາຍ ເນື່ອງຈາກອຸດົມໄປດ້ວຍວິຕາມິນ D ວິຕາມິນ B1 ວິຕາມິນ B2 ວິຕາມິນ A ວິຕາມິນ E ວິຕາມິນ K ໄຂ່ ຍັງມີສານອາຫານທີ່ຈຳເປັນຕໍ່ຮ່າງກາຍ ຢ່າງ ໂປຣຕີນ ແຄວຊຽມ ໂຟເລດ ຟົສຟໍຣັສ ຊີລີນຽມ ສັງກະສີ ອັນດັບຕົ້ນໆຂອງອາຫານທັງໝົດທີ່ຮັບປະທານ ຊຶ່ງເປັນສ່ວນສຳຄັນໜຶ່ງ ໃນອົງປະກອບໜ້າທີ່ຂອງມວນກະດູກໃນຮ່າງກາຍທີ່ທັງເສີມ ແລະ ສ້າງການປ້ອງກັນໂລກໄຂຂໍ່ ຫຼື ຂໍ່ເສື່ອມຕ່າງໆກ່ອນໄວອັນຄວນ
ທັນຍະພືດທີ່ບໍ່ຂັດສີ ເຊັ່ນ ເຂົ້າກ້ອງ ເຂົ້າຈີ່ໂອສວີດ ໝາກສາລີ ຫຼື ໝາກຖົ່ວຕ່າງໆ ເນື່ອງຈາກອຸດົມໄປດ້ວຍໄຟເບີ ແລະ ສານຕໍ່ຕ້ານອະນຸມູນອິດສະຫຼະ ນອກຈາກນີ້ ຍັງມີວິຕາມິນ D ແລະ ທາດແຄວຊຽມສູງອີກດ້ວຍ ທີ່ສຳຄັນ ຄຸນຄ່າສານອາຫານຂອງອາຫານເຫຼົ່ານີ້ ຍັງເປັນແຫຼ່ງຂອງໂຟເລດທີ່ມີບົດບາດສຳຄັນ ໃນການເຕີບໂຕຂອງເມັດເລືອດແດງ ອັນສົ່ງຜົນດີຕໍ່ໃນສ່ວນຂອງການຊ່ວຍບຳລຸງຮັກສາກະດູກໄດ້ຢ່າງດີ.
ໝາກໄມ້ ຜັກໃບຂຽວ ໝາກແອັບເປິນ ໝາກກ້ຽງ ເຊີຣີ ສະຕຣໍເບີຣີ ຫຼື ໝາກເລ່ນ ຜັກຕະກູນກະຫຼ່ຳ ເພາະພືດຜັກເຫຼົ່ານີ້ມີສານອາຫານ ແລະ ວິຕາມິນ C ຊຶ່ງເປັນສານຕ້ານອະນຸມູນອິດສະຫຼະ ທີ່ຊ່ວຍບຳລຸງເອັນຂໍ່ຕໍ່ ມີເບຕາແຄໂຣທີນ ເປັນສານຕ້ານອະນຸມູນອິດສະຫຼະປະສິດທິພາບສູງອີກຊະນິດໜຶ່ງ ຊຶ່ງຊ່ວຍກຳຈັດສານອະນຸມູນອິດສະຫຼະ ທີ່ອາດມີສ່ວນທຳລາຍຂໍ່ຕໍ່ກະດູກຕ່າງໆ ສານກຸ່ມໄບໂອຟລາໂວນອຍ (Bioflavonoid) ເຊັ່ນ: ເຄີຊິທິນ (Quercetin) ແລະ ແອນໂທໄຊຢານິດິນ (Anthocyanidins) ຊຶ່ງມີລິດຕ້ານການອັກເສບຄ້າຍຢາແອສໄພຣິນ ແລະ ໄອບູໂພຣເຟນ ໂດຍສະເພາະ ກ້ວຍ ທີ່ຖືເປັນເປັນແຫຼ່ງໂປຣແຕສຊຽມຊັ້ນດີ ທີ່ມາພ້ອມກັບໄຍອາຫານວິຕາມິນ A ວິຕາມິນ C ວິຕາມິນ E ທາດເຫຼັກ ທາດໂປຕັສຊຽມ ແລະ ທາດແມກນີຊຽມ ຊຶ່ງຊ່ວຍຄວບຄຸມການຈະເລີນເຕີບໂຕຂອງໂຄງສ້າງກະດູກຄົບຖ້ວນ ນອກຈາກນີ້ຍັງຊ່ວຍໃຫ້ຮ່າງກາຍດູດຊຶມແຄວຊຽມ ແລະ ສານອາຫານອື່ນໆ ທີ່ມີສ່ວນຊ່ວຍໃຫ້ກະດູກແຂງແຮງອີກດ້ວຍ.
ດາລາວົງ – ນຳສະເໜີ