ສະຫາຍ ທອງລຸນ ສີສຸລິດ ນາຍົກລັດຖະມົນຕີ ສປປ ລາວ ໄດ້ນຳພາຄະນະຜູ້ແທນລາວ ປະຊຸມແບບທາງໄກກັບສະຫາຍ ຫຼີ ເຄີ້ສຽງ ນາຍົກລັດຖະມົນຕີ ສປ ຈີນ ວັນທີ 21 ກໍລະກົດ 2020 ຢູ່ສຳນັກງານນາຍົກລັດຖະມົນຕີ ເພື່ອເສີມຂະຫຍາຍການພົວພັນຮ່ວມມືແບບຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ (ສະຫາຍທີ່ດີ ເພື່ອນມິດທີ່ດີ ບ້ານໃກ້ເຮືອນຄຽງທີ່ດີ ແລະ ຄູ່ຮ່ວມມືທີ່ດີ) ລະຫວ່າງສອງພັກ ສອງລັດ ແລະ ປະຊາຊົນສອງຊາດ ແລະ ຜັນຂະຫຍາຍແຜນແມ່ບົດຄູ່ຮ່ວມຊະຕາກຳ ລາວ-ຈີນ ຈີນ-ລາວ ໃຫ້ປາກົດຜົນເປັນຈິງ.
ສະຫາຍ ທອງລຸນ ສີສຸລິດ ໄດ້ສະແດງຄວາມຍິນດີທີ່ໄດ້ມີໂອກາດພົບປະກັບສະຫາຍ ຫຼີ ເຄີ້ສຽງ ຜ່ານລະບົບທາງໄກ ເຊິ່ງເປັນກົນໄກອັນໃໝ່ ຍ້ອນການລະບາດຂອງພະຍາດໂຄວິດ-19 ໂອກາດນີ້ສະຫາຍ ທອງລຸນ ສີສຸລິດ ກໍໄດ້ສະແດງຄວາມເຫັນໃຈ ແລະ ເສົ້າສະຫຼົດໃຈຢ່າງສຸດຊຶ້ງ ຕໍ່ລັດຖະບານ ແລະ ປະຊາຊົນຈີນ ໂດຍສະເພາະຕໍ່ຍາດຕິພີ່ນ້ອງ ແລະ ຜູ້ໄດ້ຮັບເຄາະຮ້າຍຈາກເຫດການນ້ຳຖ້ວມຢູ່ຫຼາຍແຂວງຂອງ ສປ ຈີນ ເຊິ່ງໄດ້ສ້າງຄວາມສູນເສຍດ້ານຊີວິດ ແລະ ຊັບສິນເປັນຈຳນວນຫຼວງຫຼາຍ ພ້ອມນີ້ສອງຝ່າຍຍັງໄດ້ຕີລາຄາຄືນການພົວພັນຮ່ວມມືສອງຝ່າຍ ລາວ-ຈີນ ໂດຍສະເພາະໃນໄລຍະການແຜ່ລະບາດຂອງພະຍາດໂຄວິດ-19 ແລະ ການປະຕິບັດຜົນຂອງການພົບປະຂອງສອງນາຍົກ ໃນຕົ້ນເດືອນມັງກອນຜ່ານມາ ຢູ່ນະຄອນຫຼວງປັກກິ່ງ ສະຫາຍ ທອງລຸນ ສີສຸລິດ ໄດ້ສະແດງຄວາມຊົມເຊີຍຕໍ່ຜົນສຳເລັດ ໃນການໃຊ້ມາດຕະການປ້ອງກັນການແຜ່ລະບາດຂອງພະຍາດໂຄວິດ-19 ຂອງ ສປ ຈີນ ເຊິ່ງເປັນໄຊຊະນະອັນໃຫຍ່ຫຼວງ ທັງເປັນບົດຮຽນສຳຄັນໃຫ້ໂລກອີກດ້ວຍ ນອກນີ້ສະຫາຍຍັງໄດ້ສະແດງຄວາມຄວາມຂອບໃຈ ສປ ຈີນ ທີ່ໄດ້ໃຫ້ການຊ່ວຍເຫຼືອ ສປປ ລາວ ໃນການປ້ອງກັນ ແລະ ຕໍ່ສູ້ກັບພະຍາດໂຄວິດ-19 ນັບແຕ່ຕົ້ນຈົນເຖິງປັດຈຸບັນ ເຊິ່ງເຮັດໃຫ້ ສປປ ລາວ ບໍ່ມີຜູ້ຕິດພະຍາດດັ່ງກ່າວ ເປັນເວລາຫຼາຍກວ່າ 3 ເດືອນແລ້ວ.
ສອງນາຍົກລັດຖະມົນຕີ ຍັງໄດ້ແລກປ່ຽນ ແລະ ປຶກສາຫາລືກ່ຽວກັບການຮ່ວມມືສອງຝ່າຍ ເປັນຕົ້ນ ການຈັດຕັ້ງປະຕິບັດແຜນແມ່ບົດຄູ່ຮ່ວມຊະຕາກຳ ລາວ-ຈີນ ຈີນ-ລາວ ທີ່ສອງສະຫາຍເລຂາທິການໃຫຍ່ ປະທານປະເທດ ໄດ້ຮ່ວມລົງນາມກັນໃນເດືອນເມສາ 2019 ການຮ່ວມມືດ້ານເສດຖະກິດ ການຄ້າ ການລົງທຶນ ການເປີດຊ່ອງທາງດ່ວນ ເພື່ອອຳນວຍຄວາມສະດວກໃນການໄປ-ມາຫາສູ່ເຊິ່ງກັນ ແລະ ກັນ ການກະກຽມຈັດກອງປະຊຸມແມ່ນ້ຳຂອງ-ແມ່ນ້ຳລ້ານຊ້າງ ຄັ້ງທີ 3 ການກະກຽມແຜນການເດີນທາງຢ້ຽມຢາມ ສປ ຈີນ ຂອງການນຳຂັ້ນສູງຂອງ ສປປ ລາວ ໃນທ້າຍປີ 2020 ການເຂົ້າຮ່ວມງານວາງສະແດງ ຈີນ-ອາຊຽນ ຢູ່ນະຄອນໜານໜິງ ໃນເດືອນພະຈິກ 2020 ພ້ອມນີ້ປີ 2021 ຈະເປັນປີຄົບຮອບ 60 ປີ ວັນສ້າງຕັ້ງສາຍພົວພັນການທູດລະຫວ່າງ ລາວ-ຈີນ (ວັນທີ 25 ເມສາ 1961-25 ເມສາ 2021) ແລະ ເປັນປີມິດຕະພາບ ລາວ-ຈີນ ໂດຍສອງຝ່າຍໄດ້ເຫັນດີຮ່ວມກັນ ຈັດຕັ້ງສະເຫຼີມສະຫຼອງຢ່າງມີບັນຍາກາດ ແລະ ມີຄວາມໝາຍເລິກເຊິ່ງ.
ສະຫາຍ ທອງລຸນ ສີສຸລິດ ໄດ້ອວຍພອນໃຫ້ສະຫາຍ ຫຼີ ເຄີ້ສຽງ ຈົ່ງມີພາລະນາໄມສົມບູນ ມີຄວາມຜາສຸກ ແລະ ປະສົບຜົນສຳເລັດ ໃນພາລະກິດອັນສູງສົ່ງຂອງສະຫາຍ ແລະ ອວຍພອນສາຍພົວພັນມິດຕະພາບ ແລະ ການຮ່ວມມືລະຫວ່າງສອງຊາດ ລາວ-ຈີນ ໃຫ້ນັບມື້ໝັ້ນຄົງທະນົງແກ່ນ ຕາມທິດ 4 ດີ ບົນພື້ນຖານການເປັນຄູ່ຮ່ວມຊະຕາກຳດຽວກັນ ນອກນີ້ສະຫາຍ ທອງລຸນ ສີສຸລິດ ຍັງໄດ້ນຳເອົາຄວາມຢື້ຢາມຖາມຂ່າວຈາກສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດ ສປປ ລາວ ເຖິງສະຫາຍ ສີ ຈິ້ນຜິງ ເລຂາທິການໃຫຍ່ ປະທານປະເທດ ສປ ຈີນ ພ້ອມນີ້ສະຫາຍ ຫຼີ ເຄີ້ສຽງ ກໍໄດ້ນຳເອົາຄວາມຢື້ຢາມຖາມຂ່າວຈາກສະຫາຍ ສີ ຈິ້ນຜິງ ເຖິງສະຫາຍ ບຸນຍັງ ວໍລະຈິດ ອີກດ້ວຍ.