ກອງປະຊຸມໃຫຍ່ ຄັ້ງທີ V ຂອງອົງຄະນະພັກເມືອງປາກງື່ມ ນະຄອນຫຼວງວຽງຈັນ (ນວ) ໄຂຂຶ້ນ ວັນທີ 21 ກໍລະກົດ 2020 ຢູ່ສຳນັກງານປົກຄອງເມືອງດັ່ງກ່າວ ໂດຍເປັນປະທານຂອງສະຫາຍ ຄຳໝູນ ຕຽງທະລາດ ກຳມະການພັກ ນວ ເລຂາພັກເມືອງ ເຈົ້າເມືອງປາກງື່ມ ມີສະຫາຍ ສີຫຸນ ສິດທິລືໄຊ ຮອງເລຂາຄະນະພັກ ຮອງເຈົ້າຄອງ ນວ ພ້ອມດ້ວຍຄະນະປະຈຳພັກ ຄະນະພັກ ນວ ແລະ ພາກສ່ວນກ່ຽວ ຂ້ອງ ເຂົ້າຮ່ວມ.
ສະຫາຍ ຄຳໝູນ ຕຽງທະລາດ ກ່າວວ່າ: ເສດຖະກິດເມືອງປາກງື່ມ ສືບຕໍ່ຂະຫຍາຍຕົວຕໍ່ເນື່ອງ ສະ ເລ່ຍ 7,21% ຕໍ່ປີ ລວມຍອດຜະລິດຕະພັນພາຍໃນບັນລຸ 1.252,82 ຕື້ກີບ ລາຍຮັບຕໍ່ຄົນຕໍ່ປີ ບັນລຸ 22.305.721 ກີບ ໂຄງປະກອບເສດຖະກິດມີການຫັນປ່ຽນຕາມທິດທີ່ກອງປະຊຸມໃຫຍ່ກຳນົດໄວ້ ໃນນີ້ ກະສິກຳ-ປ່າໄມ້ ກວມ 36% ເພີ່ມຂຶ້ນ 3,8% ອຸດສາຫະກຳ-ຫັດຖະກຳ ກວມ 51% ເພີ່ມຂຶ້ນ 9,7% ການບໍລິການ ກວມ 13% ເພີ່ມຂຶ້ນ 7,8% ການລົງທຶນຂອງລັດ ອະນຸມັດ 53 ໂຄງການ ປັດຈຸບັນ ປະຕິບັດສຳເລັດ 100% ການຄຸ້ມຄອງລາຍຮັບ-ລາຍຈ່າຍທີ່ເປັນພື້ນຖານ ໄດ້ຫັນເປັນທັນສະໄໝ ໃນນີ້ເກັບລາຍເຂົ້າງົບປະມານໄດ້ 30,58 ຕື້ກີບ ທຽບໃສ່ແຜນການປະຕິບັດໄດ້ລື່ນຄາດໝາຍ 16% ທຽບໃສ່ແຜນການທີ່ຂັ້ນເທິງມອບໃຫ້ ປະຕິບັດໄດ້ 96,94% ການຜະລິດກະສິກຳ-ປ່າໄມ້ ສືບຕໍ່ຂະຫຍາຍຕົວທັງປະລິມານ ແລະ ຄຸນນະພາບ ສະເລ່ຍ 36% ຕໍ່ປີ ການພັດທະນາຊົນນະບົດ ແລະ ແກ້ໄຂຄວາມທຸກຍາກ ສາມາດບັນລຸໄດ້ 6 ມາດຖານ 8.638 ຄອບຄົວ 5 ມາດຖານ 918 ຄອບຄົວ 4 ມາດຖານ 421 ຄອບຄົວ ຕ່ຳກວ່າ 4 ມາດຖານ 296 ຄອບຄົວ ສຳເລັດການຂຶ້ນທະບຽນທີ່ດິນລັດຄຸ້ມຄອງ 16 ຕອນ ເນື້ອທີ່ 1.493,2 ເຮັກຕາ ສຳຫຼວດວັດແທກອອກໃບຕາດິນຖາວອນໄດ້ 940 ຕອນ ເທົ່າກັບ 120,53% ນອກນີ້ ຍັງໄດ້ຫັນລົງກໍ່ສ້າງຮາກຖານການເມືອງ ຕິດພັນກັບນະໂຍບາຍ 3 ຫຼຸດ 3 ເພີ່ມ 3 ຂະບວນການຢ່າງຕໍ່ເນື່ອງ ສາມາດສ້າງບ້ານປ້ອງກັນຊາດເຂັ້ມແຂງ 6 ບ້ານ ບ້ານປ້ອງກັນຄວາມສະຫງົບ 22 ບ້ານ ວຽກງານກໍ່ສ້າງພັກດ້ານການຈັດຕັ້ງໄດ້ຮັບການຈັດຕັ້ງປະຕິບັດທີ່ມີລັກສະນະເປັນລະບົບຄົບຊຸດ ແລະ ຮອບດ້ານ ສາມາດລົບລ້າງໜ່ວຍພັກໜຶ່ງຊີ້ນຳຫຼາຍບ້ານສຳເລັດ 100% ຂະຫຍາຍການຈັດຕັ້ງພັກເຂົ້າສູ່ຫົວໜ່ວຍການຈັດຕັ້ງຕ່າງໆ ປັດຈຸບັນທົ່ວເມືອງມີ 10 ຄະນະພັກຮາກຖານ 93 ໜ່ວຍພັກ ທຽບໃສ່ປີ 2015 ເພີ່ມຂຶ້ນ 10 ໜ່ວຍ ສ້າງໜ່ວຍພັກປອດໃສເຂັ້ມແຂງໜັກແໜ້ນໄດ້ 82 ໜ່ວຍ ເທົ່າກັບ 88,17% ຂອງແຜນການ.
ສຳລັບຈຸດສຸມໃນການພັດທະນາເມືອງປາກງື່ມ ປີ 2020-2025 ຈະສຸມໃສ່ສ້າງເມືອງປາກງື່ມໃຫ້ເປັນຫົວໜ່ວຍເຂັ້ມແຂງຮອບດ້ານ ຕາມ 5 ມາດຖານ ສ້າງເມືອງກາຍເປັນເມືອງໜ້າຢູ່ດ້ວຍຕົວຊີ້ວັດ 3 ຕົວຊີ້ວັດໃນ 6ສ (ສ ສະຫງົບ ສ ສະອາດ ສ ສີຂຽວ) ພັດທະນາເມືອງໃຫ້ເປັນເມືອງທີ່ມີລະບົບການເມືອງປະ ຊາທິປະໄຕປະຊາຊົນ ແຕ່ຂັ້ນເມືອງລົງຮອດຮາກຖານບ້ານໜັກແໜ້ນ ພັດທະນາເສດຖະກິດໃຫ້ຂະຫຍາຍ ຕົວຕາມທິດສີຂຽວ ລວມຍອດຜະລິດພັນພາຍໃນເພີ່ມຂຶ້ນຕໍ່ເນື່ອງ ສະເລ່ຍບໍ່ໃຫ້ຫຼຸດ 7-8% ຕໍ່ປີ ລາຍໄດ້ 31 ລ້ານກວ່າກີບຕໍ່ຄົນ ບູລະນະພະທາດເຈດີສາມັກຄີທຳຖິ່ນຊ້ອຍ ຕິດພັນກັບການປັບປຸງແຫຼ່ງທ່ອງທ່ຽວທຳມະຊາດ ປະຫວັດສາດ ແລະ ວັດທະນະທຳ ເພື່ອດຶງດູດນັກທ່ອງທ່ຽວພາຍໃນ ແລະ ຕ່າງປະເທດ ເຂົ້າມາທ່ຽວເພີ່ມຂຶ້ນ ແລະ ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນໃຫ້ໄດ້ 90% ຕໍ່ປີ ຂອງຈຳນວນໜ່ວຍພັກທັງໝົດ.