ທ່ານ ນາງ ສຸພາລັກ ພໍບຸຜາ ປະຊາຊົນບ້ານໜອງແຄນ ເມືອງປາກງື່ມ ນະຄອນຫຼວງວຽງຈັນ ໄດ້ຂຶ້ນປະກອບຄຳເຫັນຄອບຄົວຕົວແບບການຜະລິດແບບຄົບວົງຈອນ ຕໍ່ກອງປະຊຸມໃຫຍ່ຜູ້ແທນຄັ້ງທີ V ອົງຄະນະພັກເມືອງປາກງື່ມວັນທີ 21 ກໍລະກົດ 2020 ວ່າ: ຕົນເປັນພະນັກງານຢູ່ບໍລິສັດແຫ່ງໜຶ່ງມາໄດ້ 7 ປີ ເງິນເດືອນທີ່ໄດ້ຮັບບໍ່ພຽງພໍຕໍ່ການໃຊ້ຈ່າຍພາຍໃນຄອບຄົວ ແລະ ເປັນອີກອາຊີບທີ່ບໍ່ໝັ້ນຄົງ ພາຍຫຼັງໄດ້ເຊື່ອມຊຶມແນວທາງປ່ຽນແປງໃໝ່ຂອງພັກ-ລັດ ທີ່ເປີດໂອກາດໃຫ້ພົນລະເມືອງລາວທຸກຄົນໄດ້ປະກອບອາຊີບອິດສະຫຼະ ໂດຍສະເພາະມະຕິກອງປະຊຸມໃຫຍ່ຄັ້ງທີ IV ຂອງອົງຄະນະພັກເມືອງປາກງື່ມ ໄດ້ກຳນົດແຜນສູ້ຊົນສ້າງເມືອງປາກງື່ມ ໃຫ້ເປັນເມືອງແຫ່ງການຜະລິດກະສິກຳປູກຝັງ-ລ້ຽງສັດ ຕິດພັນກັບອຸດສະຫະກຳປຸງແຕ່ງ ຫັດຖະກຳ ແລະ ການບໍລິການ ສຸມໃສ່ແກ້ໄຂຄວາມທຸກຍາກໃຫ້ສຳເລັດໃນປີ 2020.
ຈາກເນື້ອໃນດັ່ງກ່າວ ໄດ້ຊຸກຍູ້ໃຫ້ຕົນຢາກຫັນປ່ຽນອາຊີບ ດັ່ງນັ້ນຈຶ່ງໄດ້ປຶກສາກັບຄອບຄົວ ມາເຮັດການຜະລິດກະສິກຳແບບຄົບວົງຈອນ ມາຮອດປີ 2010 ໄດ້ຊື້ດິນຢູ່ບ້ານໜອງແຄນ ໃນເນື້ອທີ່ 14 ເຮັກຕາ ແລະ ໃນປີ 2011 ໄດ້ເລີ່ມບຸກເບີກເນື້ອທີ່ປູກຕົ້ນໄຜ່ລ້ຽງນ້ອງ 100 ຕົ້ນ ໃນເນື້ອທີ່ 1 ໄລ່ ເຫັນວ່າໄດ້ຮັບຜົນຕອບຮັບທີ່ດີ ມີລາຍໄດ້ ຈຶ່ງໄດ້ສືບຕໍ່ຂະຫຍາຍພັນ ແລະ ເນື້ອທີ່ປູກຕື່ມ ມາຮອດປີ 2014 ໄດ້ມີຄວາມສົນໃຈຢາກປູກໝາກມ່ວງ ຈຶ່ງໄດ້ໄປສຶກສາຮຽນຢູ່ສວນໝາກມ່ວງປະເທດເພື່ອນບ້ານເປັນເວລາ 1 ປີ ຫຼັງຈາກນັ້ນຈຶ່ງກັບມາພັດທະນາເຮັດຕົວຈິງຢູ່ສວນຂອງຕົນເອງ ເບື້ອງຕົ້ນປູກໝາກມ່ວງ 2.700 ຕົ້ນ ມີ 64 ສາຍພັນ ໝາກມີ້ 25 ຕົ້ນ ໃນນີ້ໄດ້ເນັ້ນໜັກການຂະຫຍາຍພັນເພື່ອຂາຍອອກເປັນຕົ້ນຕໍ ປັດຈຸບັນ ສາມາດຂະຫຍາຍເບ້ຍໄມ້ໄດ້ 35.000 ເບ້ຍຕໍ່ປີ ສ້າງລາຍຮັບໄດ້ 150.000.000-200.000.000 ກີບຕໍ່ປີ ໄປຄຽງຄູ່ກັບການຂາຍຜົນຜະລິດ ແລະ ເບ້ຍໄມ້ເປັນສິນຄ້າຫຼັກແລ້ວ ຢູ່ສວນຍັງລ້ຽງປາທຳມະຊາດ ລ້ຽງກົບ 5 ພັນໂຕ ລ້ຽງຄວາຍ 11 ໂຕ ງົວ 13 ໂຕ ລ້ຽງໄກ່ 100 ໂຕ ເພື່ອເປັນອາຫານ ແລະ ຂາຍເປັນລາຍໄດ້ເສີມຕື່ມອີກ.
ສຳລັບຜົນຜະລິດສ່ວນຫຼາຍແມ່ນມີແມ່ຄ້າໄປຊື້ຢູ່ກັບສວນ ແລະ ສົ່ງໃຫ້ລູກຄ້າຈຳນວນໜຶ່ງ ພ້ອມນັ້ນ ຍັງໄດ້ໂຄສະນາຂາຍຜ່ານສື່ອອນລາຍ ເຂົ້າຮ່ວມວາງສະແດງສິນຄ້າ ແລະ ຕະຫຼາດນັດຕ່າງໆເພື່ອຊອກຫາລູກຄ້າ.
ທ່ານ ນາງ ສຸພາລັກ ເພບຸຜາ ໃຫ້ຮູ້ຕື່ມວ່າ: ຈາກການສູ້ຊົນຜ່ານຜ່າດ້ວຍຄວາມຫຍຸ້ງຍາກລຳບາກ ຈາກຊາວກະສິກອນທີ່ບໍ່ມີຄວາມຮູ້ຄວາມສາມາດ ກາຍເປັນຜູ້ທີ່ມີຄວາມຮູ້ ແລະ ປະສົບການ ມາຮອດປັດຈຸບັນ ຖືໄດ້ວ່າປະສົບຜົນສຳເລັດຂັ້ນໜຶ່ງຂອງຊີວິດ ຈາກຜົນງານດັ່ງກ່າວ ໄດ້ກາຍເປັນຄອບຄົວຕົວແບບ ການຜະລິດກະສິກຳຄົບວົງຈອນຂອງເມືອງປາກງື່ມ.