ໂຄງການຮູບປັ້ນຫຼໍ່ ອະນຸສາວະລີພະເຈົ້າໄຊເຊດຖາ ແມ່ນບໍລິສັດ ວັງຕັດ ຂຸດຄົ້ນບໍ່ແຮ່ ຈຳກັດ ເປັນຜູ້ລິເລີ່ມໃຫ້ການສະໜັບສະໜູນກ່ອນ ຈາກນັ້ນ ກໍໄດ້ມີຜູ້ທີ່ມີຈິດໃຈເຫຼື້ອມໃສສັດທາ ປະກອບສ່ວນດ້ານທອງແດງເພື່ອຫຼອມຮູບປັ້ນໃຫ້ມີຄວາມສວຍງາມ ມູນຄ່າ 39 ຕື້ກີບ ປັດຈຸບັນ ຮູບປັ້ນຫຼໍ່ອະນຸສາວະລີພະເຈົ້າໄຊເຊດຖາທິລາດ ໄດ້ສຳເລັດ ແລະ ເລີ່ມຈັດງານສະເຫຼີມສະຫຼອງແຕ່ວັນທີ 21-26 ກໍລະກົດ 2020 ຢູ່ນະຄອນຫຼວງວຽງຈັນ ເພື່ອນຳໄປປະດິດສະຖານທີ່ສວນອະນຸສາວະລີເຈົ້າໄຊເຊດຖາ ບ້ານຫາດຊາຍຂາວ ເມືອງໄຊເສດຖາ ແຂວງອັດຕະປື.
ທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງອັດຕະປື ເປັນຜູ້ຮັບຜິດຊອບໂຄງການກໍ່ສ້າງອະນຸສາວະລີພະເຈົ້າໄຊເຊດຖາທິລາດ ຢູ່ແຂວງອັດຕະປື ໃຫ້ສຳພາດວັນທີ 17 ກໍລະກົດ 2020 ວ່າ: ໂຄງການກໍ່ສ້າງຮູບປັ້ນຫຼໍ່ພະເຈົ້າໄຊເຊດຖາທິລາດ ເປັນໂຄງການລະດັບຊາດ ໄດ້ເລີ່ມຄົ້ນຄວ້າດ້ານເນື້ອໃນ ຮູບແບບ ແລະ ການຄິດໄລ່ອອກແບບຕ່າງໆແຕ່ປີ 2014 ເປັນຕົ້ນມາ ປັດຈຸບັນ ການກໍ່ສ້າງພື້ນທີ່ສວນອະນຸສາວະລີຢູ່ແຂວງອັດຕະປື ສຳເລັດຂັ້ນພື້ນຖານ ໂດຍສະເພາະໄດ້ສ້າງແທ່ນຕັ້ງອະນຸສາວະລີພະເຈົ້າໄຊເຊດຖາທິລາດ ທີ່ເຮັດດ້ວຍການເທທອງຫຼໍ່ ຮູບປັ້ນຫຼໍ່ແມ່ນຊົງປະທັບຊ້າງປະທານພອນ ນັ່ງກ່ຽງຊ້າງ ຫຼື ນັ່ງເທິງແຍ່ງເທິງຫຼັງຊ້າງ ທີ່ມີນ້ຳໜັກທອງເຫຼືອງ 18 ໂຕນ ສຳເລັດ 100% ແລະ ກຳລັງກະກຽມເຄື່ອນຍ້າຍຮູບປັ້ນຫຼໍ່ໄປສູ່ແຂວງອັດຕະປື.
ຈຸດປະສົງການສ້າງຮູບປັ້ນຫຼໍ່ພະເຈົ້າໄຊເຊດຖາ ເພື່ອເປັນການຈາລຶກຄຸນງາມຄວາມດີ ວິລະກຳຂອງພະເຈົ້າໄຊເຊດຖາທິລາດ ທີ່ໄດ້ນຳພາຕໍ່ສູ້ປົກປັກຮັກສາອານາຈັກລ້ານຊ້າງ ໃນເວລາທີ່ສະພາບແວດລ້ອມມີຄວາມຫຍຸ້ງຍາກ ເຊິ່ງທ່ານເປັນຜູ້ໜຶ່ງທີ່ມີຄວາມປີຊາສາມາດ ກໍ່ສ້າງກຳລັງທັບ ສິລະປະຍຸດທະວິທີກໍ່ສ້າງກຳລັງ ສະແດງອອກໃນການປົກປ້ອງນະຄອນຫຼວງວຽງຈັນຈາກການຮຸກຮານຂອງສັກດີນາໃນເວລານັ້ນ ອັນພົ້ນເດັ່ນອີກອັນໜຶ່ງ ທ່ານໄດ້ເຮັດວຽກງານການເມືອງ ແລະ ການປົກຄອງທີ່ມີຄວາມເຂັ້ມແຂງ ສາມາດພົວພັນຮ່ວມມືກັບຕ່າງປະເທດຢ່າງກວ້າງຂວາງ ເພື່ອຮັດແໜ້ນຄວາມສາມັກຄີ ນອກນີ້ ເປັນບ່ອນສຶກສາຄົ້ນຄວ້າຮ່ຳຮຽນເອົາມູນເຊື້ອພິລາດອາດຫານໃຫ້ລູກແກ່ຫຼານທີ່ເກີດໃໝ່ໃຫຍ່ລຸນໄດ້ສືບທອດຕໍ່ໄປ.
ພຣະຍອດຄຳພັດທະຣະເກສີ ດຳຣົງ ພິມມະຈັກ ຄະນະບໍລິຫານງານປະຈຳການ ຫົວໜ້າຫ້ອງການບໍລິຫານງານ ຫົວໜ້າກຳມາທິການຕ່າງປະເທດ ສູນກາງອົງການພຸດທະສາສະໜາສຳພັນ ສປປ ລາວ ກ່າວວ່າ: ກ່ອນຈະເຄື່ອນຍ້າຍຮູບປັ້ນຫຼໍ່ພະເຈົ້າໄຊເຊດຖາ ໄປປະດິດສະຖານຢູ່ເທິງແທ່ນອະນຸສາວະລີພະເຈົ້າໄຊເຊດຖາຢູ່ແຂວງອັດຕະປື ຈະໄດ້ຈັດບຸນສະເຫຼີມສະຫຼອງຄົບງັນຢູ່ໜ້າຫໍທຳມະສະພາ (ວັດທາດຫຼວງເໜືອ ນະຄອນຫຼວງວຽງຈັນ) ວັນທີ 21-25 ກໍລະກົດ ແຕ່ເວລາ 8:00 ໂມງເປັນຕົ້ນໄປ ຮັບໂມທະນາທານ ເວລາ 17:00 ໂມງ ສູດປະລິມຸງຄຸນ ຟັງທຳມະເທສະໜາ ເວລາ 19:00 ໂມງ ໄຫວ້ພະສູດມົນ ຟັງທຳມະເທດສະນາ ແລະ ວັນທີ 26 ກໍລະກົດ ເວລາ 7:00 ໂມງ ພິທີໃສ່ບາດຖວາຍທານ ພະສົງ 39 ອົງ ຈາກນັ້ນ ໃນບັນດາແຂວງທີ່ຜ່ານໄປນັ້ນ ຈະມີການປະກອບບຳເພັນກຸສົນ 1 ຄືນ ຄື: ວັນທີ 27 ກໍລະກົດ ເຄື່ອນຍ້າຍໄປແຂວງບໍລິຄຳໄຊ ວັນທີ 28 ກໍລະກົດ ເຄື່ອນຍ້າຍໄປແຂວງຄຳມ່ວນ ວັນທີ 29 ກໍລະກົດ ເຄື່ອນຍ້າຍໄປທີ່ແຂວງສະຫວັນນະເຂດ ວັນທີ 30 ກໍລະກົດ ເຄື່ອນຍ້າຍໄປແຂວງຈຳປາສັກ ແລະ ວັນທີ 31 ກໍລະກົດ ເຄື່ອນຍ້າຍໄປທີ່ແຂວງອັດຕະປື ແລະ ຍົກຂຶ້ນພຣະແທ່ນປະດິດສະຖານໄວ້ພ້ອມບຳເພັນກຸສົນວັນທີ 1 ສິງຫາ 2020 ຈຶ່ງຂໍເຊີນຊວນປະຊາຊົນ ແລະ ການຈັດຕັ້ງທຸກພາກສ່ວນ ທຸກແຂວງທີ່ຈະຜ່ານໄປ ເປັນເຈົ້າພາບເຈົ້າສັດທາຮ່ວມກັນ ໃນການຕ້ອນຮັບພິທີສະເຫຼີມສະຫຼອງດັ່ງກ່າວ ສຳລັບທ່ານໃດທີ່ມີຈິດໃຈຢາກໂມທະນາປະກອບສ່ວນ ສາມາດໂມທະນາໄດ້ຕາມເຫື່ອແຮງ ແລະ ສັດທາ.