ທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ພ້ອມດ້ວຍຄະນະ ລົງຢ້ຽມຢາມສະຖານທີ່ທ່ອງທ່ຽວ ສວນວັດທະນະທຳຊຽງຄວນ ວັນທີ 18 ກໍລະກົດ 2020 ໂດຍໄດ້ຮັບການຕ້ອນຮັບຈາກທ່ານນາງ ສ້ອຍສຸດາ ອິນເມືອງໄຊ ຜູ້ສຳປະທານສວນວັດທະນະທຳຊຽງຄວນ ແລະ ພາກສ່ວນກ່ຽວຂ້ອງ.
ທ່ານຮອງລັດຖະມົນຕີ ພ້ອມຄະນະ ໄດ້ທ່ຽວຊົມແຕ່ລະຈຸດຢູ່ພາຍໃນສວນ ໂດຍສະເພາະຈຸດທີ່ໄດ້ຮັບການປັບປຸງ ແລະ ກຳລັງປັບປຸງບູລະນະຄືນໃໝ່ ເປັນຕົ້ນການກໍ່ສ້າງປະຕູໂຂງ ກຳແພງອ້ອມສວນ ການປະຕິສັງຂອນພະພຸດທະຮູບ ວັດຖຸບູຮານ ປັບປຸງ ແລະ ກໍ່ສ້າງເສັ້ນທາງຍ່າງພາຍໃນສວນ ກໍ່ສ້າງສວນສາທາລະນະ ຮ້ານອາຫານ ບ່ອນຫຼີ້ນເດັກນ້ອຍ ຕູບພັກເຊົາ ສະຖານທີ່ຈອດລົດ ແລະ ອື່ນໆ ເຊິ່ງປັດຈຸບັນ ວຽກການປັບປຸງມີຄວາມຄືບໜ້າ 70% ໂດຍໄລຍະການລະບາດຂອງພະຍາດໂຄວິດ-19 ສວນກໍໄດ້ປິດບໍລິການຊົ່ວຄາວ ແລະ ໄດ້ເປີດບໍລິການຄືນວັນທີ 30 ມິຖຸນາ 2020 ມີນັກທ່ອງທ່ຽວເຂົ້າມາທ່ຽວຊົມຫຼາຍສົມຄວນ ສະເພາະເທສະການບຸນເຂົ້າພັນສາມີນັກທ່ອງທ່ຽວພາຍໃນເຂົ້າທ່ຽວຊົມ 800 ຄົນ ສ່ວນວັນເສົາ-ວັນທິດ ປະມານ 400-500 ຄົນ.
ທ່ານນາງ ສ້ອຍສຸດາ ອິນເມືອງໄຊ ກ່າວວ່າ: ສວນວັດທະນະທຳຊຽງຄວນ ມີເອກະລັກພິເສດ ແລະ ແຕກຕ່າງຈາກສະຖານທີ່ທ່ອງທ່ຽວອື່ນ ເປັນຕົ້ນມີພະພຸດທະຮູບປາງຕ່າງໆທີ່ມີຄວາມເກົ່າແກ່ເປັນຈຳນວນຫຼາຍ ມີທັງພະພຸດທະຮູບນ້ອຍ ແລະ ໃຫຍ່ ນອກນີ້ຍັງມີຮູບປັ້ນຈຳລອງກ່ຽວກັບນະລົກ ສະຫວັນ ທີ່ເປັນເອກະລັກ ແລະ ຫຼາຍຄົນໃຫ້ຄວາມສົນໃຈເຂົ້າມາທ່ຽວຊົມ ແລະ ຖ່າຍຮູບຢູ່ຊັ້ນສູງສຸດ.
ໂອກາດນີ້ ທ່ານຮອງລັດຖະມົນຕີ ກໍໄດ້ສະແດງຄວາມຊົມເຊີຍຕໍ່ການພັດທະນາສວນ ທີ່ສອດຄ່ອງກັບລວດລາຍ ແລະ ວັດທະນະທຳທີ່ເປັນເອກະລັກຂອງລາວ ແລະ ກົມກືນກັບພື້ນທີ່ມໍລະດົກເກົ່າ ພ້ອມນີ້ ທ່ານຍັງໄດ້ແນະນຳໃຫ້ບູລະນະສ້ອມແປງພະພຸດທະຮູບອົງທີ່ມີຄວາມຊຸດໂຊມ ແຕກຫັກ ໃຫ້ກັບຄືນສູ່ສະພາບເດີມ ເພື່ອກະກຽມນຳເອົາສະຖານທີ່ສວນວັດທະນະທຳຊຽງຄວນ ເຂົ້າເປັນມໍລະດົກລະດັບຊາດໃນໄວໆນີ້.