ກອງປະຊຸມໃຫຍ່ຄັ້ງທີ V ຂອງອົງຄະນະພັກເມືອງປາກງື່ມ ນະຄອນຫຼວງວຽງຈັນ ຈັດຂຶ້ນວັນທີ 21-22 ກໍລະກົດ 2020 ທີ່ສຳນັກງານປົກຄອງເມືອງດັ່ງກ່າວ ເປັນປະທານຂອງສະຫາຍ ຄຳມູນ ຕຽງທະລາດ ກຳມະການພັກນະຄອນຫຼວງວຽງຈັນ ເລຂາພັກເມືອງ ເຈົ້າເມືອງປາກງື່ມ ໃຫ້ກຽດເຂົ້າຮ່ວມຂອງສະຫາຍ ສີຫຸນ ສິດທິລືໄຊ ຮອງເລຂາຄະນະພັກ ຮອງເຈົ້າຄອງນະຄອນຫຼວງວຽງຈັນ ພ້ອມດ້ວຍບັນດາສະຫາຍຄະນະການນຳ ອະດີດການນຳຂອງເມືອງ ພະນັກງານອະວຸໂສນັກຮົບແຂ່ງຂັນ ວິລະຊົນແຫ່ງຊາດ ສະມາຊິກພັກສົມບູນ ສຳຮອງ ແລະ ແຂກຖືກເຊີນເຂົ້າຮ່ວມ.
ສະຫາຍ ຄຳມູນ ຕຽງທະລາດກ່າວວ່າ: ກອງປະຊຸມຄັ້ງນີ້ມີຄວາມໝາຍສຳຄັນຫຼາຍ ຍ້ອນວ່າຈະໄດ້ພ້ອມກັນຕີລາຄາທົບທວນຄືນຢ່າງເລິກເຊິ່ງ ຕໍ່ກັບການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ IV ຜ່ານມາ ຕີລາຄາຜົນໄດ້ຮັບ ຂໍ້ຂາດຕົກບົກຜ່ອງ ແລະ ຖອດຖອນບົດຮຽນຈາກພຶດຕິກຳຕົວຈິງ ບົນພື້ນຖານດັ່ງກ່າວ ກໍຈະໄດ້ວາງທິດທາງໜ້າທີ່ວຽກງານໃນແຕ່ລະດ້ານ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ V (2020-2024) ແນໃສ່ປະຕິບັດຕາມທິດນຳ ສ້າງແຂວງເປັນຫົວໜ່ວຍຍຸດທະສາດ ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ສ້າງບ້ານເປັນຫົວໜ່ວຍພັດທະນາ ພ້ອມນັ້ນ ກອງປະຊຸມຄັ້ງນີ້ ໄດ້ປ່ອນບັດເລືອກຕັ້ງຄະນະບໍລິຫານງານພັກເມືອງປາກງື່ມ ສະໄໝທີ V ແນໃສ່ນຳພາທົ່ວເມືອງປາກງື່ມ ປະຕິບັດມະຕິກອງປະຊຸມໃຫຍ່ຄັ້ງນີ້ ໃຫ້ປາກົດຜົນເປັນຈິງ ແລະ ຈະໄດ້ປ່ອນບັດເອົາຜູ້ແທນໄປຮ່ວມກອງປະຊຸມໃຫຍ່ຄັ້ງທີ VII ຂອງອົງຄະນະພັກນະຄອນຫຼວງວຽງຈັນ ນອກນີ້ ຍັງຈະໄດ້ຮັບຟັງການໂອ້ລົມຂອງສະຫາຍ ສີຫຸນ ສິດທິລືໄຊ ເຊິ່ງຈະເປັນເຂັມທິດ ເປັນແສງສະຫວ່າງເຍືອງທາງ ໃຫ້ແກ່ການປະຕິບັດມະຕິກອງປະຊຸມໃຫຍ່ຄັ້ງນີ້ ໃຫ້ບັນລຸຢ່າງມີໄຊ.