ສະຫະພັນແມ່ຍິງລາວ ກໍຄື ແມ່ຍິງລາວບັນດາເຜົ່າ ໄດ້ອຸທິດຕົນເພື່ອພາລະກິດຕໍ່ສູ້ປົດປ່ອຍຊາດ ປົກປັກຮັກສາ ແລະ ສ້າງສາພັດທະນາປະເທດຊາດ ກໍຄື ພາລະກິດພັດທະນາແມ່ຍິງ ຕະຫຼອດໄລຍະ 65 ປີ ແມ່ຍິງລາວ ໄດ້ອຸທິດເລືອດເນື້ອເຫື່ອແຮງ ສະຕິປັນຍາ ຄຽງບ່າຄຽງໄຫຼ່ກັບເພດຊາຍ ໃນການຕໍ່ສູ້ກູ້ຊາດຍາດເອົາເອກະລາດອະທິປະໄຕ ແລະ ປະກອບສ່ວນ ສ້າງໜ້າປະຫວັດສາດອັນສະຫວ່າງສະໄຫວຂອງຊາດ.
ທ່ານນາງ ວິໄລວອນ ຈັນທະລາຕີ ຫົວໜ້າພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ (ຖວທ ນວ) ໄດ້ກ່າວວ່າ: ເນື່ອງໃນໂອກາດສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 65 ປີ ຂ້າພະເຈົ້າຂໍຕາງໜ້າໃຫ້ພະແນກ ຖວທ ນວ ກໍຄື ສະມາຊິກເພດຍິງຂໍສະແດງຄວາມຂອບໃຈ ແລະ ຮູ້ບຸນຄຸນຢ່າງສູງຕໍ່ການນຳພັກ-ລັດ ໂດຍສະເພາະ ການນຳເພດຍິງທີ່ໄດ້ຊີ້ນຳ-ນຳພາໃຫ້ເອື້ອຍນ້ອງແມ່ຍິງ ທົ່ວ ນວ ກໍຄື ທົ່ວປະເທດ ໄດ້ມີຄວາມເຂັ້ມແຂງໃນການເຄື່ອນໄຫວວຽກງານ ໄດ້ຮັບປະສິດທິພາບ ປະສິດທິຜົນສູງຂຶ້ນ ສະເພາະ ພະແນກ ຖວທ ນວ ຂອງພວກເຮົາ ໄດ້ຊີ້ນຳໃຫ້ເອື້ອຍນ້ອງແມ່ຍິງມີບົດບາດໃນການເຄື່ອນໄຫວວຽກງານ ໂດຍສະເພາະ ບັນດາວຽກງານທີ່ຕິດພັນກັບຂົງເຂດວັດທະນະທຳ ເຊິ່ງທີ່ຮັບຮູ້ນຳກັນດີແລ້ວວ່າ ວັດທະນະທຳຮີດຄອງປະເພນີຂອງລາວເຮົາມີຫຼາຍດ້ານ ທີ່ຕິດພັນກັບເອື້ອຍນ້ອງແມ່ຍິງ ໂດຍສະເພາະ ວັດທະນະທຳ ທາງດ້ານຮີດຄອງປະເພນີ ວັດທະນະທຳທາງດ້ານການກິນຢູ່ ວັດທະນະທຳທາງດ້ານການນຸ່ງຖື ສິ່ງທີ່ໂດດເດັ່ນທີ່ສຸດແມ່ນໄດ້ຊຸກຍູ້ສົ່ງເສີມໃຫ້ເອື້ອຍນ້ອງເພດຍິງ ຮັກສາມູນເຊື້ອວັດທະນະທຳອັນດີງາມ ໂດຍສະເພາະແມ່ນວັດທະນະທຳທາງດ້ານການນຸ່ງຖື ສາມາດເຫັນໄດ້ເອື້ອຍນ້ອງແມ່ຍິງຂອງພວກເຮົາສາມາດຮັກສາ ເອກະລັກທາງດ້ານການນຸ່ງຖື ແຕ່ກໍປາສະຈາກບໍ່ໄດ້ໃນຂົງເຂດວັດທະນະທຳຂອງພວກເຮົາ ໄດ້ມີຂໍ້ຂາດຕົກບົກພ່ອງ ແຕ່ພວກເຮົາກໍພະຍາຍາມຕີຖອຍບັນຫາຫຍໍ້ທໍ້ທີ່ເກີດຂຶ້ນ ໃນຂົງເຂດວັດທະນະທຳ ກໍຄືຂອງເອື້ອຍນ້ອງແມ່ຍິງ ໂດຍສະເພາະ ການຄ້າຂາຍໂສເພນີ ຈະພະຍາຍາມຕີຖອຍໃຫ້ນັບມື້ຫຼຸດໜ້ອຍຖອຍລົງ ຫຼຸດອອກຈາກຂົງເຂດເອື້ອຍນ້ອງແມ່ຍິງຂອງພວກເຮົາ.
ເນື່ອງໃນໂອກາດວັນສ້າງຕັ້ງສະຫະພັນແມ່ຍິງລາວ ຄົບຮອບ 65 ປີ ຂ້າພະເຈົ້າໃນນາມຕາງໜ້າສະມາຊິກເພດຍິງ ກໍຄື ຕາງໜ້າພະແນກ ຖວທ ນວ ຂໍອວຍພອນໃຫ້ສະມາຊິກທີ່ເປັນເພດຍິງທຸກຊັ້ນຄົນ ປ້າປະຕິວັດອາວຸໂສຢູ່ໃນທົ່ວປະເທດ ກໍຄື ໃນນະຄອນຫຼວງວຽງຈັນ ຈົ່ງມີສຸຂະພາບເຂັ້ມແຂງ ປະສົບຜົນສຳເລັດໃນໜ້າທີ່ວຽກງານ ສືບຕໍ່ພັດທະນາຕົນເອງ ພ້ອມກັນສືບຕໍ່ຮັກສາວັດທະນະທຳອັນດີງາມຂອງເອື້ອຍນ້ອງແມ່ຍິງໃຫ້ມີຄວາມຍືນຍົງ ພ້ອມທັງຕີຖ້ອຍທຸກປາກົດການຫຍໍ້ທໍ້ຕ່າງໆໃຫ້ນັບມື້ນັບຫຼຸດລົງ.
ທ່ານນາງ ວຽງພອນ ແກ້ວຄູນສີ ຫົວໜ້າອຳນວຍການໂຮງຮຽນທິດສະດີການເມືອງການປົກຄອງ ນະຄອນຫຼວງວຽງຈັນ ໄດ້ກ່າວວ່າ: ເນື່ອງໃນໂອກາດວັນສ້າງຕັ້ງສະຫະພັນແມ່ຍິງລາວ ຄົບຮອບ 65 ປີ ພາຍໃຕ້ການນຳພາຂອງພັກປະຊາຊົນປະຕິວັດລາວ ຕະຫຼອດໄລຍະຜ່ານມາ ພວມຈະກ້າວຂຶ້ນສູ່ຈຸດໝາຍສັງຄົມນິຍົມຢ່າງໜັກແໜ້ນໃນອະນາຄົດ ຂ້າພະເຈົ້າສຸດທີ່ເປັນກຽດ ແລະ ພາກພູມໃຈເປັນຢ່າງຍິ່ງໃນໂອກາດທີ່ມີຄວາມໝາຍຄວາມສຳຄັນ ແລະ ເປັນເຫດການປະຫວັດສາດ ໃນຄັ້ງນີ້ ຂ້າພະເຈົ້າຂໍລະນຶກເຖິງຄຸນງາມຄວາມດີ ແລະ ຜົນງານອັນໃຫຍ່ຫຼວງຂອງຮຸ່ນແມ່ເຖົ້າ ຮຸ່ນແມ່ ຮຸ່ນປ້າ ຮຸ່ນອາ ຮຸ່ນນ່າສາວ ກໍຄື ເອື້ອຍ ແລະ ແມ່ຍິງລາວບັນດາເຜົ່າທົ່ວປະເທດ ທີ່ໄດ້ອຸທິດຕົນເອງເພື່ອພາລະກິດການປະຕິວັດປົດປ່ອຍຊາດ ກໍຄື ພາລະກິດສ້າງສາ ແລະ ບູລະນະລະບອບປະຊາທິປະໄຕປະຊາຊົນ ສູ່ຈຸດໝາຍສັງຄົມນິຍົມ ໃນຖານະທີ່ເປັນສະມາຊິກສະຫະພັນແມ່ຍິງ ພະນັກງານເພດຍິງ ຄູ-ອາຈານ ເພດຍິງຂອງພັກພວກເຮົາຈົ່ງກ້າຫານ ບຸກທະລຸໃນການພັດທະນາຕົນເອງຮອບດ້ານ ເປັນຕົ້ນ ເພື່ອບັນລຸກໍ່ສ້າງພະນັກງານຮຸ່ນໜຸ່ມ ບຳລຸງກໍ່ສ້າງຄົນສືບທອດພາລະກິດອັນມີກຽດສະຫງ່າທີ່ປະເທດຊາດ ແລະ ປະຊາຊົນມອບໝາຍໃຫ້ ເປັນຕົ້ນ ພວກເຮົາຈົ່ງສູ້ຊົນກ້າຫານໃນການພັດທະນາປະເທດຊາດຂອງພວກເຮົາ ກ້າວຂຶ້ນຫຼຸດພົ້ນອອກຈາກຄວາມດ້ອຍພັດທະນາ ໃນໄລຍະ 5 ປີຂ້າງໜ້າຢ່າງໜັກແໜ້ນ ພ້ອມກັນນີ້ ກໍພັດທະນາຄອບຄົວຂອງຕົນເອງໃຫ້ກາຍເປັນຄອບຄົວຜາສຸກ ຢູ່ດີກິນດີ ສ້າງວິຖີການດຳລົງຊີວິດໃໝ່ ກ້າວໜ້າທັນສະໄໝ ພິເສດແມ່ນດຸໝັ່ນໃນການອອກແຮງງານ ປະຢັດມັດທະຍັດຜະລິດຮັບໃຊ້ພາຍໃນໃຫ້ຫຼາຍ ແລະ ເປັນສິນຄ້າສົ່ງອອກ.
ໃນໂອກາດທີ່ມີຄວາມໝາຍຄວາມສຳຄັນດັ່ງກ່າວ ຂໍອວຍພອນໄຊອັນປະເສີດມາຍັງຜູ້ນຳພັກ-ລັດ ພິເສດແມ່ນຜູ້ນຳທີ່ເປັນເພດຍິງ ການນຳແມ່ຍິງລາວທຸກຂັ້ນ ສະມາຊິກສະຫະພັນແມ່ຍິງ ແລະ ນັກສຶກສາການເມືອງການປົກຄອງ ຈົ່ງມີຄວາມເບີກບານມ່ວນຊື່ນ ມີຜົນສຳເລັດໃນພາລະກິດອັນມີກຽດ ແລະ ພິເສດ ກໍຂໍຮຽກຮ້ອງມາຍັງແມ່ຍິງທົ່ວ ນວ ນັກສຶກສາທຸກທົ່ວໜ້າ ພວກເຮົາຈົ່ງອາດຫານເຂັ້ມແຂງພັດທະນາຕົນເອງຮອບດ້ານ ເພື່ອປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຂອງພວກເຮົາ ໃຫ້ກ້າວໜ້າທັນກັບຍຸກສະໄໝປັດຈຸບັນ ເຮັດແນວໃດໃຫ້ປະເທດເຮົາກ້າວຂຶ້ນສູ່ຈຸດໝາຍສັງຄົມນິຍົມຢ່າງໜັກແໜ້ນ ສັງຄົມມີຄວາມຢູ່ດີກິນດີ ມີຄວາມສະຫງົບ ສີວິໄລ ແລະ ຍຸຕິທຳ.