ຫຼາຍຄົນບໍ່ອາດປະຕິເສດໄດ້ວ່າ “ການເບິ່ງເຫັນ” ມີຄວາມສຳຄັນກັບຊີວິດ ນອກຈາກການເຮັດໃຫ້ເຮົາໄດ້ໃຊ້ຊີວິດປະຈຳວັນໄດ້ຢ່າງປົກກະຕິສຸກແລ້ວ ຍັງເຮັດໃຫ້ເຮົາໄດ້ເຫັນໜ້າຄົນທີ່ເຮົາຮັກໄດ້ເຫັນໂລກກວ້າງ ໄດ້ອ່ານປຶ້ມ ໄດ້ເດີນທາງທ່ອງທ່ຽວດ້ວຍຕົນເອງ ໂດຍບໍ່ຕ້ອງເປັນພາລະກັບໃຜ ຫຼາຍຄົນຈຶ່ງຢ້ານທີ່ຈະສູນເສຍການເບິ່ງເຫັນຫຼາຍຄົນຢ້ານ ຫາກຕ້ອງຢູ່ໃນໂລກມືດ ດັ່ງນັ້ນ ການດູແລສຸຂະພາບ “ດວງຕາ” ໃຫ້ດີຢູ່ສະເໝີ ຈຶ່ງເປັນເລື່ອງທີ່ສຳຄັນເພາະ “ດວງຕາ” ເປັນອະໄວຍະວະທີ່ບອບບາງ ແລະ ຫາກສູນເສຍມັນໄປແລ້ວ ບໍ່ສາມາດເອີ້ນກັບຄືນມາໄດ້.
“ພະຍາດແກ່ນຕາຂຸ້ນ” ເປັນສາເຫດອັນດັບໜຶ່ງທີ່ເຮັດໃຫ້ຕາບອດ ໂດຍຜູ້ທີ່ເປັນພະຍາດນີ້ຈະມີພາວະເລນຕາຂຸ່ນ ແລະ ຈະມີອາການຫຼັກຄື ຕາມົວ ເບິ່ງເຫັນພາບບໍ່ຊັດເຈນ ສາຍຕາເລືອນລາງ ເຊິ່ງລັກສະນະການເບິ່ງເຫັນພາບບໍ່ຊັດເຈນນັ້ນ ມີຫຼາຍແບບແຕ່ສ່ວນຫຼາຍແລ້ວ ອາການຕ່າງໆຈະຄ່ອຍເປັນຄ່ອຍໄປ ໃຊ້ເວລາເປັນເດືອນ ຫຼື ອາດເປັນປີ ເມື່ອມີອາການຫຼາຍຂຶ້ນ ຈະສົ່ງຜົນເຮັດໃຫ້ຄົນເຈັບບໍ່ສາມາດດຳເນີນຊີວິດປະຈຳວັນໄດ້ຕາມປົກກະຕິ ເຊິ່ງໃນເລື່ອງນີ້ ແພດຈະມາໃຫ້ຂໍ້ມູນທີ່ໜ້າສົນໃຈ ວິທີສັງເກດອາການ ແລະ ສັນຍານເຕືອນຂອງພະຍາດ ລວມໄປເຖິງແນວທາງການປິ່ນປົວມາຝາກກັນ.
ສາເຫດຂອງພະຍາດແກ່ນຕາຂຸ້ນ
ສາເຫດຂອງການເກີດພະຍາດແກ່ນຕາຂຸ້ນ ມາຈາກອາຍຸທີ່ຫຼາຍຂຶ້ນ ໂດຍສະເພາະ ໃນຜູ້ທີ່ມີອາຍຸຫຼາຍກວ່າ 50 ປີຂຶ້ນໄປ ຍິ່ງມີຄວາມສ່ຽງທີ່ຈະເປັນໄດ້ງ່າຍ ລວມໄປເຖິງຜູ້ທີ່ໃຊ້ຢາສະເຕຍຣອຍ (Steroid) ໂດຍກຸ່ມທີ່ມີໂອກາດໄດ້ຮັບຢາກຸ່ມນີ້ ໄດ້ແກ່ຄົນເຈັບໂລກພູມແພ້ ໂລກແພ້ພູມຕົວເອງ ຫຼື ໂລກເອສແອລອີ (SLE) ນອກຈາກນີ້ ຜູ້ທີ່ຮັບປະທານຢາຕົ້ມ ຢາໝໍ້ ຢາພື້ນເມືອງ ເຊິ່ງອາດມີສ່ວນປະສົມຂອງສານສະເຕຍຣອຍ ການໄດ້ຮັບອຸບັດເຫດທາງຕາ ແລະ ການໄດ້ຮັບແສງອຸນຕຣາໄວໂອເລດ (UV) ເຫຼົ່ານີ້ ລ້ວນເປັນສາເຫດຂອງການເກີດແກ່ນຕາຂຸ້ນ.
4 ອາການສ່ຽງແກ່ນຕາຂຸ້ນ
1. ເບິ່ງເຫັນພາບບໍ່ຊັດເຈນ
2. ເບິ່ງເຫັນພາບຊ້ອນ
3. ເບິ່ງເຫັນພາບມົວໃນບ່ອນທີ່ມີແສງຈ້າ
4. ສາຍຕາປ່ຽນເລື້ອຍ ໄປວັດແທກແວ່ນຕາຍາມໃດບໍ່ຊັດເຈນຈັກເທື່ອ ເມື່ອມີອາການດັ່ງກ່າວຂ້າງຕົ້ນ ຢ່ານິ່ງນອນໃຈ ຄວນຮີບໄປຫາແພດທັນທີ ຫຼື ເຖິງແມ່ນຈະບໍ່ມີສັນຍານເຕືອນ ແຕ່ເຮົາກໍຄວນທີ່ຈະກວດສຸຂະພາບຕາຢ່າງໜ້ອຍປີລະ 1 ຄັ້ງ ເພື່ອຄົ້ນຫາພາວະຜິດປົກກະຕິ.
ພາວະແຊກຊ້ອນ ອັນຕະລາຍທີ່ຕ້ອງເຝົ້າລະວັງ
ໃນຄົນເຈັບທີ່ເປັນພະຍາດແກ່ນຕາຂຸ້ນມາດົນນານ ອາດເກີດພາວະແຊກຊ້ອນນັ້ນຄື “ພາວະຕໍ້ຫີນຈາກແກ່ນຕາຂຸ້ນທີ່ບວມ (Phacomorphic Glaucoma)” ເກີດຈາກເລນຕາສຸກເຕັມທີ່ແລ້ວບວມ ຈົນປິດທາງລະບາຍນ້ຳໃນໜ່ວຍຕາ ເຮັດໃຫ້ນ້ຳໃນໜ່ວຍຕາລະບາຍບໍ່ໄດ້ ເຮັດໃຫ້ຄົນເຈັບຈະມີອາການປວດຕາວ່ອງໄວ ຕາແດງ ເມື່ອສ່ອງໄຟຈະເຫັນເລີຍວ່າ ຕາດຳຈະຂາວຜິດປົກກະຕິ ຫາກປວດ ໃນກໍລະນີນີ້ ບໍ່ມີຢາທີ່ສາມາດລະງັບອາການປວດໄດ້ ແລະ ຖືວ່າອັນຕະລາຍຫຼາຍ.
ຜ່າຕັດປ່ຽນເລນຕາ ວິທີປິ່ນປົວທີ່ປອດໄພ ແລະ ມີປະສິດທິພາບ
ພະຍາດແກ່ນຕາຂຸ້ນ ມີວິທີການປິ່ນປົວພຽງວິທີດຽວ ຄື: ການຜ່າຕັດປ່ຽນເລນຕາ ເຊິ່ງຖືວ່າເປັນວິທີການປິ່ນປົວມາດຕະຖານໃນປັດຈຸບັນທົ່ວໂລກ ແລະ ວິທີທີ່ນິຍົມຫຼາຍທີ່ສຸດ ຄື: ການເຮັດເຟໂກອີມັລຊິຟິເຄຊັ່ນ (Phacoemulcification) ດ້ວຍການໃຊ້ເຄື່ອງສຽງຄວາມຖີ່ສູງເຂົ້າໄປສະຫຼາຍເລນຕາເກົ່າໃຫ້ມີຂະໜາດນ້ອຍ ແລ້ວໃສ່ເລນຕາໃໝ່ເຂົ້າໄປ ເຮັດໃຫ້ມີແຜຜ່າຕັດຂະໜາດນ້ອຍຫຼາຍພຽງ 3 ມິນລິແມັດ ສ່ວນໃຫຍ່ຈຶ່ງບໍ່ຕ້ອງມີການຫຍິບປິດແຜ ນັບເປັນວິທີທີ່ຂ້ອນຂ້າງມີປະສິດທິພາບ ແລະ ປອດໄພ ໂດຍໃຊ້ເວລາສະເລ່ຍພຽງ 10-30 ນາທີເທົ່ານັ້ນ ທັງນີ້ຂຶ້ນຢູ່ກັບປະສົບການຂອງແພດຜູ້ເຮັດການຜ່າຕັດ ແລະ ຄວາມຍາກຂອງກໍລະນີ.
ຊີວິດໃໝ່ຫຼັງຜ່າຕັດແກ່ນຕາຂຸ້ນ
ຫຼັງຈາກໄດ້ຮັບການຜ່າຕັດແກ່ນຕາຂຸ້ນແລ້ວ ສ່ວນຫຼາຍຄົນເຈັບຈະຮູ້ສຶກເໝືອນໄດ້ຊີວິດໃໝ່ ເນື່ອງຈາກສາມາດເບິ່ງເຫັນໄດ້ຊັດເຈນຫຼາຍຂຶ້ນກວ່າເກົ່າ ເຊິ່ງການຜ່າຕັດບໍ່ພຽງແຕ່ເຮັດໃຫ້ກັບມາເບິ່ງໂລກສົດໃສ ແຕ່ຍັງເປັນການແກ້ໄຂພາວະສາຍຕາສັ້ນ ຍາວ ອ່ຽງ ຫຼື ສາຍຕາເບິ່ງໃກ້ທີ່ຜິດປົກກະຕິໄດ້ ລວມທັງຊ່ວຍຫຼຸດຄວາມດັນຕາໃນຄົນເຈັບຕໍ້ຫີນອີກດ້ວຍ.
ຊາວບ້ານ – ນຳສະເໜີ