ໃນປັດຈຸບັນ ເຄື່ອງບິນແບບບໍ່ມີຄົນຂັບ ຫຼື ໂດຼນ ນັ້ນ ນິຍົມກັນໃຊ້ຢ່າງແຜ່ຫຼາຍ ເພື່ອເປົ້າໝາຍອະເນກປະສົງ ບໍ່ວ່າຈະເປັນໃຫ້ບໍລິການດ້ານພົນລະເຮືອນ ກໍຄື ທາງການທະຫານ ແລະ ຄວາມໝັ້ນຄົງ ຍ້ອນແນວນີ້ເອງ ຫຼາຍປະເທດຈຶ່ງໄດ້ອອກມາດຕະການຄຸ້ມຄອງການບິນໂດຼນ ເພື່ອນຳໃຊ້ໃຫ້ເກີດປະໂຫຍດສູງສຸດ ແລະ ບໍ່ໃຫ້ແຕະຕ້ອງເຖິງຄວາມໝັ້ນຄົງຂອງຊາດ.
ທີ່ການາດາ: ຂ່າວຕ່າງປະເທດໃຫ້ຮູ້ວ່າ ທາງການປະເທດການາດາ ໄດ້ປະກາດໃຊ້ຂໍ້ກຳນົດທີ່ເຄັ່ງຄັດກວ່າເກົ່າ ກ່ຽວກັບການນຳໃຊ້ເຄື່ອງບິນ-ອຸປະກອນການບິນທີ່ບໍ່ມີຄົນຂັບ ເຊິ່ງມີຜົນບັງຄັບໃຊ້ນັບແຕ່ວັນທີ 1 ມິຖຸນາ 2019 ເປັນຕົ້ນມາ ຂໍ້ກຳນົດກ່ຽວກັບຄຸ້ມຄອງນີ້ ກວມເອົາໂດຼນທີ່ມີນ້ຳໜັກແຕ່ 250 ກຣາມ ເຖິງ 25 ກິໂລກຣາມ ຂໍ້ກຳນົດໄດ້ລະບຸວ່າ ຜູ້ບັນຊາ ແລະ ນຳໃຊ້ໂດຼນ ຕ້ອງມີອາຍຸແຕ່ 14 ປີຂຶ້ນໄປ ຕ້ອງໄດ້ຜ່ານການທົດສອບຄວາມຮູ້ດ້ານໄອທີ-ອອນລາຍ ເພື່ອຮັບໃບຢັ້ງຢືນຄວາມຊຳນານງານໃນການບັງຄັບບັນຊາເຄື່ອງບິນໂດຼນ ຜູ້ບັນຊາ ແລະ ນຳໃຊ້ໂດຼນ ບໍ່ມີສິດດື່ມເຫຼົ້າ ຫຼື ໃຊ້ສານກະຕຸ້ນທຸກປະເພດໃນຂອບເວລາ 12 ຊົ່ວໂມງ ກ່ອນການນຳໃຊ້ໂດຼນ ຜູ້ນຳໃຊ້ ແລະ ບັນຊາເຄື່ອງບິນຊະນິດນີ້ຕ້ອງໄດ້ຈົດທະບຽນຄັກແນ່ ແລະ ມີປ້າຍລະບຸຊື່ ຂໍ້ຫ້າມສຳລັບໂດຼນມີດັ່ງນີ້: ຫ້າມບິນໃນວົງລັດສະໝີລະຫວ່າງ 5-6 ກິໂລແມັດ ອ້ອມຮອບສະໜາມບິນ ຫຼື ບ່ອນທີ່ມີເຫດໄຟໄໝ້ປ່າ ບ່ອນສະແດງດົນຕີກາງແຈ້ງ ແລະ ບ່ອນທີ່ກຳລັງມີການເດີນສວນສະໜາມ ສ່ວນລະດັບຄວາມສູງຂອງການບິນຂອງໂດຼນນັ້ນ ຕ້ອງຫຼຸດ 122 ແມັດ.
ທີ່ກຳປູເຈຍ: ໃນທ້າຍປີ 2016 ທາງການກຳປູເຈຍ ໄດ້ອອກຄຳສັ່ງຫ້າມບິນໂດຼນຈຳລອງປະເພດເຄື່ອງຫຼິ້ນ ເຊິ່ງບັນຊາໂດຍຣີໂມດຢູ່ນ່ານຟ້າ ບໍລິເວນອັງກໍວັດ ແຂວງສຽມຣຽບ ທ່ານ ລອງໂກສານ ຮອງອຳນວຍການຫ້ອງການຄົມມະນາຄົມຂອງຄະນະກຳມະການອັບສາລາ ທີ່ຮັບຜິດຊອບຄຸ້ມຄອງເຂດອັງກໍວັດ ໄດ້ໃຫ້ຮູ້ວ່າ ຈຸດປະສົງຂອງຄຳສັງຫ້າມ ແມ່ນເພື່ອຮັບປະກັນຄວາມປອດໄພຂອງນັກທ່ອງທ່ຽວພາຍໃນ ແລະ ຕ່າງປະເທດ ທີ່ເຂົ້າຊົມອັງກໍວັດ ເພື່ອປ້ອງກັນບໍ່ໃຫ້ມີຜົນກະທົບຕໍ່ສະຖານທີ່ທ່ອງທ່ຽວອັນລືຊື່ແຫ່ງນີ້ ແລະ ເພື່ອປ້ອງກັນຄວາມສະຫງົບ ຄວາມປອດໄພ ໃນສະຖານທີ່ແຫ່ງນີ້ ຄຳສັ່ງຍັງໄດ້ກຳນົດໂທດຕັກເຕືອນຕໍ່ຜູ້ລະເມີດ ຫຼື ຖືກຢຶດໂດຼນ ໃນກໍລະນີຈຳເປັນ ຜູ້ໃຊ້ໂດຼນປະເພດເຄື່ອງຫຼິ້ນ ຍັງຕ້ອງໄດ້ຂໍໃບອະນຸຍາດຈາກຄະນະກຳມະການອັບສາລາ.
ທີ່ອາຣາບີຊາອຸດິດ: ໃນວັນທີ 22 ເມສາ 2018 ໜ່ວຍປ້ອງກັນຄວາມໝັ້ນຄົງຂອງ ອາຣາບີຊາອຸດິດ ໄດ້ຍິງໂດຼນນ້ອຍລຳໜຶ່ງຕົກ ໃນຂະນະທີ່ໂດຼນດັ່ງກ່າວຮ່ອນຕົວລົງໃກ້ໆກັບສຳນັກລາຊະວັງ ຢູ່ນະຄອນຫຼວງຣີຢາດ ການຖະຫຼົ່ມຍິງໄດ້ສ້າງຄວາມແຕກຕື່ນກົນລະຫົນໃນບໍລິເວນທີ່ເກີດເຫດ ເຮັດໃຫ້ຫຼາຍຄົນຄິດວ່າມີເຫດການລັດຖະປະຫານ ຫຼັງຈາກເຫດການດັ່ງກ່າວ ທາງການຂອງປະເທດນີ້ ກໍໄດ້ອອກກົດລະບຽບຄວບຄຸມການບິນໂດຼນ ເພື່ອເປົ້າໝາຍພັກຜ່ອນຢ່ອນອາລົມ ກົດລະບຽບສະບັບນີ້ ໄດ້ກຳນົດໃຫ້ຜູ້ຕ້ອງການບິນໂດຼນ ເພື່ອການພັກຜ່ອນຕ້ອງມີໃບອະນຸຍາດຈາກເຈົ້າໜ້າທີ່ຕຳຫຼວດ ແລະ ຕ້ອງບິນໃນເຂດທີ່ທາງການອະນຸຍາດໃຫ້ເທົ່ານັ້ນ.