ພິເປີດໂຕບໍລິສັດ ລາວໂມບາຍມັນນີ ຈຳກັດຜູ້ດຽວ ແລະ ບໍລິການ M-Money ການເງິນດິຈີຕອນເທິງມືຖື ຈັດຂຶ້ນວັນທີ 17 ກໍລະກົດ 2020 ທີ່ນະຄອນຫຼວງວຽງຈັນ ມີທ່ານ ທັນສະໄໝ ກົມມະສິດ ລັດຖະມົນຕີກະຊວງໄປສະນີ ໂທລະຄົມມະນາຄົມ ແລະ ການສື່ສານ ຄູ່ຮ່ວມທຸລະກິດ ແລະ ແຂກຖືກເຊີນເຂົ້າຮ່ວມ.
ທ່ານ ທັນສະໄໝ ຊາມຸນຕີ ຜູ້ອຳນວຍການບໍລິສັດ ລາວໂມບາຍມັນນີ ຈຳກັດຜູ້ດຽວ ກ່າວວ່າ: ການເປີດບໍລິການແອັບພລີເຄຊັນ M Money ກະເປົາເງິນເທິງມືຖື ທີ່ສາມາດໃຊ້ກັບການໃຊ້ຊີວິດປະຈຳວັນແບບໃໝ່ ທີ່ເນັ້ນຄວາມສະດວກສະບາຍໃນການຈ່າຍເງິນ ໂດຍບໍ່ຕ້ອງພົກພາເງິນສົດ M Money ສາມາດຈ່າຍຄ່ານ້ຳ ຄ່າໄຟຟ້າ ຄ່າໂທລະສັບ ຄ່າບິນຕ່າງໆ ແລະ ສາມາດໂອນເງິນໄປທະນາຄານຕ່າງໆໄດ້ພຽງປາຍນີ້ວ ຫຼື ຕ້ອງການເອົາເງິນເຂົ້າໃນ M Money ກໍສາມາດເຮັດໄດ້ດ້ວຍທີງ່າຍໆທີ່ຈຸດບໍລິການທົ່ວປະເທດ.
ສຳລັບຜູ້ຮ່ວມທຸລະກິດ ມີບໍລິສັດ ລາວໂທລະຄົມມະນາຄົມມະຫາຊົນ ບໍລິສັດ T Plus ດີຈີຕອນ ຈຳກັດ ທະນາຄານການຄ້າຕ່າງປະເທດລາວມະຫາຊົນ ທະນາຄານອຸດສາຫະກຳ ແລະ ການຄ້າຈີນ ຈຳກັດ ທະນາຄານພັດທະນາລາວ ທະນາຄານສົ່ງເສີມກະສິກຳ ທະນາຄານຮ່ວມພັດທະນາ ທະນາຄານເອັສທີ ທະນາຄານຮ່ວມທຸລະກິດລາວຫວຽດ ທະນາຄານອິນດູຈີນ ຈຳກັດ ທະນາຄານເອຊີລີດາລາວ ຈຳກັດ ທະນາຄານມາລູຮານເຈແປນລາວ ບໍລິສັດ NCC ຈຳກັດຜູ້ດຽວ ບໍລິສັດ ລັດວິສາຫະກິດຫວຍພັດທະນາລາວ ບໍລິສັດ ຮຸ່ງອາລຸນໂລຈິດສະຕິກ ຈຳກັດຜູ້ດຽວ ແລະ ບໍລິສັດ ໂກເທັກດີ້ ຈຳກັດຜູ້ດຽວ.
ພາຍຫຼັງບໍລິສັດເປີດເປັນທາງການ ຈະຂະຫຍາຍການບໍລິການ 3 ໄລຍະຄື: ໄລຍະທີ 1 ເລີ່ມກໍລະກົດ 2020 ເປັນຕົ້ນໄປ ຈະໄດ້ໃຫ້ບໍລິການເຂດນະຄອນຫຼວງວຽງຈັນ ໄລຍະທີ 2 ເລີ່ມທ້າຍເດືອນສິງຫາ 2020 ຈະຂະຫຍາຍບໍລິການໄປອີກ 9 ແຂວງຄື: ບໍ່ແກ້ວ ອຸດົມໄຊ ຫຼວງນ້ຳທາ ໄຊຍະບູລີ ຫຼວງພະບາງ ແຂວງວຽງຈັນ ບໍລິຄຳໄຊ ຄຳມ່ວນ ສະຫວັນນະເຂດ ຈຳປາສັກ ແລະ ຄູ່ຮ່ວມທຸລະກິດຕ່າງໆ. ໄລຍະທີ 3 ເລີ່ມເດືອນກັນຍາ 2020 ຂະຫຍາຍບໍລິການໄປທົ່ວປະເທດ M Money App ສະໝັກງ່າຍ ພຽງແຕ່ທ່ານລົງທະບຽນດ້ວຍໂທລະສັບມືຖື ແລະ ບັດປະຈຳຕົວຂອງທ່ານ ກໍສາມາດໃຊ້ໄດ້ເລີຍ. M Money ມີຄວາມປອດໄພໃນການເຂົ້າໃຊ້ໂດຍການ scan ລາຍມີ ຫຼື scan ໃບໜ້າຂອງທ່ານ ແລະ ມີໂປຣໂມຊັນແຈ້ງເຕືອນທຸກຄັ້ງທີ່ມີການໃຊ້ຈ່າຍ ທ່ານສາມາດດາວໂຫຼດ App Store ແລະ Play Store.