ທີມນັກວິໄຈຈາກມະຫາວິທະຍາໄລ Monash, Swinburne ແລະ RMIT ໃນ ອົດສະຕຣາລີ ອ້າງວ່າ ໄດ້ສ້າງສະຖິຕິການສົ່ງຜ່ານຂໍ້ມູນເທິງອິນເຕີເນັດທີ່ໄວທີ່ສຸດຢູ່ທີ່ 44,2 Tbps (ເທຣາບິດຕໍ່ວິນາທີ) ຊຶ່ງຄວາມໄວຂະໜາດນີ້ ສາມາດໃຊ້ດາວໂຫຼດຮູບເງົາທີ່ຄົມແຈ້ງລະດັບ HD ໄດ້ຫຼາຍກວ່າ 1.000 ເລື່ອງພາຍໃນເວລາບໍ່ເຖິງ 1 ວິນາທີ.
speedtest.net ໄດ້ສະແດງສະຖິຕິຄວາມໄວເນັດເຮືອນ (ຜູ້ໃຊ້ບໍລິການຢູ່ກັບທີ່) ຫຼື ເອີ້ນວ່າ Fixed Broadband ປະຈຳເດືອນເມສາ 2020 ໃນທົ່ວໂລກ ອັນດັບ 1 ຄື: ສິງກະໂປ ຄວາມໄວທີ່ 198,46 Mbps ອັນດັບ 2 ຮົງກົງ ຄວາມໄວທີ່ 176,70 Mbps ແລະ ອັນດັບ 3 ຄື ໄທ ຄວາມໄວທີ່ 159,87 Mbps ສ່ວນອົດສະຕຣາລີ ຢູ່ອັນດັບທີ 54 ຄວາມໄວທີ່ 55 Mbps ແຫຼ່ງຂ່າວ BBC ໃຫ້ຂໍ້ມູນເພີ່ມເຕີມວ່າ ການເຊື່ອມຕໍ່ອິນເຕີເນັດ ທີ່ອົດສະຕຣາລີ ມີຄວາມຫຼ້າຊ້າຈົນຖືກຮ້ອງຮຽນຈາກຜູ້ໃຊ້ທົ່ວໄປ (ຂໍສັນນິຖານວ່າ ນີ້ອາດເປັນເຫດຜົນໜຶ່ງທີ່ພວກເຂົາຢາກເຮັດໃຫ້ມີອິນເຕີເນັດທີ່ໄວຂຶ້ນ ບໍ່ແມ່ນບໍ່ເຊື່ອວ່າພວກເຂົາຈະເຮັດໄດ້).
ນັກວິໄຈໄດ້ເປີດເຜີຍເຖິງເບື້ອງຫຼັງການ ເຮັດສະຖິຕິອິນເຕີເນັດຄວາມໄວທີ່ສູງທີ່ສຸດວ່າ ພວກເຂົາໃຊ້ອຸປະກອນພຽງຊິ້ນດຽວ ຊຶ່ງເອີ້ນວ່າ Micro-comb ເຂົ້າມາແທນທີ່ອຸປະກອນເລເຊີ 80 ຊິ້ນ ທີ່ພົບໄດ້ໃນຮາດແວຣ໌ ອຸປະກອນການສື່ສານບາງຮຸ່ນ ໂດຍໄດ້ຕິດຕັ້ງ ແລະ ທົດສອບ Micro-comb ພາຍນອກຫ້ອງທົດລອງ ໂດຍໃຊ້ໂຄງສ້າງພື້ນຖານທີ່ຄ້າຍຄືກັບເຄືອຄ່າຍບຣອດແບນແຫ່ງຊາດຂອງອົດສະຕຣາລີ (NBN) ແລະ ໃຊ້ຊິບອອບຕິຄັລເຊັ່ນດຽວກັບໃນລະບົບບຣອດແບນໄຍແກ້ວນຳແສງ ທີ່ທັນສະໄໝທົ່ວໂລກໃຊ້ກັນ ຊຶ່ງພວກເຂົາເອົາຊິບມາໃຊ້ທົດລອງ ພຽງແຕ່ຊິ້ນດຽວຈົນສາມາດສົ່ງຜ່ານຂໍ້ມູນປະລິມານສູງສຸດໄດ້.
ທ່ານ Bill Corcoran ອາຈານຜູ້ສອນກ່ຽວກັບລະບົບໄຟຟ້າ ແລະ ຄອມພິວເຕີທີ່ມະຫາວິທະຍາໄລ Monash ກ່າວວ່າ ໃນທີ່ສຸດງານວິໄຈຊິ້ນນີ້ຈະຊ່ວຍປ່ຽນແປງອຸດສາຫະກຳຕ່າງໆໄດ້ຢ່າງກວ້າງຂວາງ ເນື່ອງຈາກຊີວິດສະໄໝໃໝ່ຍັງຄົງຕ້ອງການໂຄງສ້າງພື້ນຖານ ທີ່ມີແບນວິດເພີ່ມຂຶ້ນຢ່າງຕໍ່ເນື່ອງ ບໍ່ແມ່ນພຽງແຕ່ສຳລັບສະຕຣີມຮູບເງົາ ແຕ່ສາມາດໃຊ້ກັບລົດຍົນຂັບຂີ່ດ້ວຍຕົນເອງ ການຂົນສົ່ງໃນອະນາຄົດໄປຈົນເຖິງອຸດສາຫະກຳ ການຜະລິດຢາ ການສຶກສາ ການເງິນ ແລະ ອີຄອມເມິຊ ລວມທັງການຕິດຕໍ່ສື່ສານ ອ່ານປຶ້ມກັບລູກຫຼານໄດ້ຈາກໄລຍະໄກ.
ທ່າມກາງວິກິດຂອງ COVID-19 ເຮັດໃຫ້ໂຄງສ້າງພື້ນຖານອິນເຕີເນັດຖືກໃຊ້ງານຕັ້ງແຕ່ການເຮັດວຽກ ແລະ ຮຽນຈາກໄລຍະໄກ ລວມທັງການສຕຣີມ ວິດີໂອ ແລະ ເກມ ທີ່ຫຼວງຫຼາຍຢ່າງບໍ່ເຄີຍເກີດຂຶ້ນມາກ່ອນ ງານວິໄຈນີ້ ຊ່ວຍໃຫ້ສາມາດນຳໄຍແກ້ວນຳແສງທີ່ມີຢູ່ແລ້ວ ມາໃຊ້ເປັນແບັກໂບນຂອງການສື່ສານໃນປັດຈຸບັນ ແລະ ໃນອະນາຄົດໄດ້.
ສາສະດາຈານ David Moss ແຫ່ງມະຫາວິທະຍາໄລ Swinburne ໄດ້ອະທິບາຍວ່າ ເປັນການຄົ້ນພົບຄວາມກ້າວໜ້າທີ່ຍິ່ງໃຫຍ່ ຊຶ່ງ Micro-comb ຈະຊ່ວຍໃຫ້ເຮົາສາມາດຕອບສະໜອງຄວາມຕ້ອງການແບນວິດຂອງໂລກ ທີ່ມີເພີ່ມຂຶ້ນຢ່າງຕໍ່ເນື່ອງ ຫຼື ບໍ່ມີວັນພຽງພໍໄດ້ນັ້ນເອງ.