ວັນທີ 16 ກໍລະກົດ 2020 ທີ່ກະຊວງການຕ່າງປະເທດ ໄດ້ມີພິທີລົງນາມໃນເອກະສານແລກປ່ຽນ ໂຄງການຊ່ວຍເຫຼືອລ້າຈາກລັດຖະບານຍີ່ປຸ່ນ ເພື່ອນຳໃຊ້ເຂົ້າໃນວຽກງານພັດທະນາຊັບພະຍາກອນມະນຸດຂອງລາວ ຕາງໜ້າຝ່າຍລາວຮ່ວມລົງນາມ ແລະ ກ່າວຮັບໂຄງການໂດຍທ່ານ ທອງສະຫວັນ ພົມວິຫານ ຮອງລັດຖະມົນຕີກະຊວງການຕ່າງປະເທດລາວ ແລະ ຕາງໜ້າຝ່າຍຍີ່ປຸ່ນ ໂດຍທ່ານ ທາເກວາກະ ເຄໂຊ ເອກອັກຄະລາຊະທູດຍີ່ປຸ່ນ ປະຈຳລາວ ມີພະນັກງານກ່ຽວຂ້ອງທັງສອງຝ່າຍເຂົ້າຮ່ວມ.
ໂຄງການຊ່ວຍເຫຼືອຄັ້ງນີ້ ແມ່ນໂຄງການທຶນການສຶກສາເພື່ອພັດທະນາຊັບພະຍາກອນມະນຸດ (ລະດັບປະລິນຍາໂທ ແລະ ປະລິນຍາເອກ) ມູນຄ່າ 317 ລ້ານເຢນ ຫຼື ປະມານ 27 ຕື້ກີບ ນັບແຕ່ປີ 2000-2019 ລັດຖະບານຍີ່ປຸ່ນ ໄດ້ສະໜອງທຶນການສຶກສາລະດັບປະລິນຍາໂທ ແລະ ປະລິນຍາເອກ (ທຶນ JDS) ລວມທັງໝົດ 414 ທຶນ ເພື່ອຊ່ວຍຍົກລະດັບຂີດຄວາມສາມາດຂອງພະນັກງານ-ລັດຖະກອນລາວ ໃຫ້ນັບມື້ນັບສູງຂຶ້ນ ພ້ອມນີ້ ຍີ່ປຸ່ນຍັງເປັນປະເທດອັນດັບແຖວໜ້າ ທີ່ໃຫ້ການຊ່ວຍເຫຼືອທາງການເພື່ອການພັດທະນາ (ODA) ແກ່ລາວ.
ໂອກາດນີ້ ທ່ານຮອງລັດຖະມົນຕີໄດ້ຕາງໜ້າລັດຖະບານ ແລະ ປະຊາຊົນລາວ ສະແດງຄວາມຂອບໃຈຢ່າງຈິງໃຈ ຕີລາຄາສູງຕໍ່ລັດຖະບານ ແລະ ປະຊາຊົນຍີ່ປຸ່ນ ທີ່ໄດ້ໃຫ້ການຊ່ວຍເຫຼືອ ແລະ ສະໜັບສະໜູນລາວຕະຫຼອດມາ ເຊິ່ງໄດ້ປະກອບສ່ວນອັນສຳຄັນ ເຂົ້າໃນການພັດທະນາເສດຖະກິດ-ສັງຄົມຂອງລາວເປັນແຕ່ລະໄລຍະ ພ້ອມທັງໃຫ້ຄຳໝັ້ນສັນຍາວ່າ ຈະນຳໃຊ້ໂຄງການຊ່ວຍເຫຼືອໃຫ້ເກີດປະໂຫຍດສູງສຸດ ເພື່ອພັດທະນາຂະແໜງການສຶກສາຂອງລາວ ໃຫ້ນັບມື້ມີຄຸນນະພາບສູງຂຶ້ນ ແລະ ຫວັງຢ່າງຍິ່ງວ່າ ລັດຖະບານຍີ່ປຸ່ນ ຈະສືບຕໍ່ໃຫ້ການສະໜັບສະໜູນ ແລະ ຊ່ວຍເຫຼືອລາວໃນຕໍ່ໜ້າ ອວຍພອນໃຫ້ສາຍພົວພັນມິດຕະພາບ ແລະ ການຮ່ວມມືອັນດີງາມ ກໍຄືການເປັນຄູ່ຮ່ວມຍຸດທະສາດລະຫວ່າງລາວ ແລະ ຍີ່ປຸ່ນ ໄດ້ຮັບການພັດທະນາຂຶ້ນຢ່າງບໍ່ຢຸດຢັ້ງ.
ໂອກາດດຽວກັນນີ້ ທ່ານທູດໄດ້ສະແດງຍິນດີທີ່ໄດ້ຕາງໜ້າໃຫ້ລັດຖະບານຍີ່ປຸ່ນ ຮ່ວມລົງນາມເອກະສານແລກປ່ຽນໂຄງການຊ່ວຍເຫຼືອຄັ້ງນີ້ ໂດຍເປັນການມອບທຶນການສຶກສາ 22 ທຶນໃຫ້ແກ່ລັດຖະກອນຜູ້ໜຸ່ມນ້ອຍ ເພື່ອສືບຕໍ່ສຶກສາໃນລະດັບປະລິນຍາໂທ ແລະ ປະລິນຍາເອກ ລັດຖະບານຍີ່ປຸ່ນ ໃຫ້ຄວາມສຳຄັນໃນຂະແໜງການສຶກສາ ແລະ ການພັດທະນາຊັບພະຍາກອນມະນຸດ ແລະ ຖືເປັນໜຶ່ງວຽກບູລິມະສິດ ໃນແຜນພັດທະນາເສດຖະກິດ-ສັງຄົມຂອງລາວ ພ້ອມນີ້ ທ່ານທູດຍັງສະແດງຄວາມຍິນດີສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ການເປັນຄູ່ຮ່ວມຍຸດທະສາດລະຫວ່າງ ລາວ-ຍີ່ປຸ່ນ ໃຫ້ນັບມື້ໄດ້ຮັບປະສິດທິຜົນສູງສຸດ.