ລະຫວ່າງວັນທີ 13-16 ກໍລະກົດ 2020 ທ່ານ ຄຳເຜີຍ ແກ້ວກິນນາລີ ຮອງປະທານຜູ້ປະຈຳການຄະນະກຳມະການຮ່ວມມື ລາວ-ຫວຽດນາມ ໄດ້ນຳພາຄະນະໄປຢ້ຽມຢາມເຮັດວຽກ ເພື່ອກວດກາຕິດຕາມການຈັດຕັ້ງປະຕິບັດ ບັນດາກິດຈະການໂຄງການນຳໃຊ້ທຶນຊ່ວຍເຫຼືອລ້າ ແລະ ໂຄງການລົງທຶນຈຳນວນໜຶ່ງ ຢູ່ແຂວງຊຽງຂວາງ ແລະ ແຂວງຫົວພັນ.
ໃນໂອກາດນີ້ ຄະນະດັ່ງກ່າວ ໄດ້ເຂົ້າຢ້ຽມຄຳນັບທ່ານ ບຸນຕົ້ນ ຈັນທະພອນ ເຈົ້າແຂວງຊຽງຂວາງ ແລະ ພົບປະເຮັດວຽກກັບທ່ານ ພູໂຊນ ທຳມະວິໄຊ ຮອງເຈົ້າແຂວງຫົວພັນ ການນຳຂອງສອງແຂວງ ໄດ້ແຈ້ງໃຫ້ຊາບກ່ຽວກັບສະພາບການພັດທະນາເສດຖະກິດ-ສັງຄົມ ການພົວພັນຮ່ວມມືຂອງຫວຽດນາມ ເວົ້າລວມ ເວົ້າສະເພາະ ການຊ່ວຍເຫຼືອເຊິ່ງກັນ ແລະ ກັນຂອງບັນດາແຂວງແຮກສ່ຽວ ກໍຄືບັນດາແຂວງທີ່ມີຊາຍແດນຕິດຈອດກັບສອງແຂວງດັ່ງກ່າວ ເນື່ອງຈາກການແຜ່ລະບາດຂອງພະຍາດໂຄວິດ-19 ເຮັດໃຫ້ການເຄື່ອນໄຫວຢ້ຽມຢາມຂອງບັນດາແຂວງຕິດຈອດ ແລະ ແຮກສ່ຽວ ກໍຄືການໄປມາຄ້າ-ຂາຍ ລະຫວ່າງປະຊາຊົນທ້ອງຖິ່ນດ້ວຍກັນ ພົບຄວາມຫຍຸ້ງຍາກ ການຈັດຕັ້ງປະຕິບັດບັນດາກິດຈະການ ໂຄງການທີ່ນຳໃຊ້ທຶນຊ່ວຍເຫຼືອເຊັ່ນ: ໂຄງການກໍ່ສ້າງໂຮງໝໍມິດຕະພາບແຂວງຊຽງຂວາງ ແຂວງຫົວພັນ ກໍຄືໂຄງການລົງທຶນກໍ່ສ້າງສະໜາມບິນໜອງຄ້າງ ບໍ່ສາມາດສຳເລັດຕາມແຜນການທີ່ວາງໄວ້ ເຖິງຢ່າງໃດກໍດີ ການລົງທຶນຂອງບັນດາວິສາຫະກິດຫວຽດນາມຢູ່ແຂວງຊຽງຂວາງ ເຊິ່ງມີມູນຄ່າ 83 ກວ່າລ້ານໂດລາສະຫະລັດ (2011 ຮອດປັດຈຸບັນ) ແຂວງຫົວພັນ 64 ກວ່າລ້ານໂດລາສະຫະລັດ (2006 ຮອດປັດຈຸບັນ) ກໍໄດ້ປະກອບສ່ວນອັນສຳຄັນ ເຂົ້າໃນການພັດທະນາເສດຖະກິດ-ສັງຄົມຂອງສອງແຂວງ.
ໃນເວລາລົງກວດກາຕົວຈິງ ເຈົ້າຂອງໂຄງການຂອງສອງຝ່າຍ ເປັນຕົ້ນ ໂຄງການກໍ່ສ້າງໂຮງໝໍມິດຕະພາບຢູ່ແຂວງຊຽງຂວາງ ສຳເລັດໂດຍພື້ນຖານ ແລະ ພວມລໍຖ້າການປະກອບຕິດຕັ້ງອຸປະກອນການແພດ ສ່ວນແຂວງຫົວພັນ ການກໍ່ສ້າງສະໜາມບິນແມ່ນປະຕິບັດໄດ້ 92% ກໍໄດ້ຢືນຢັນຈະສຸມກຳລັງ ເພື່ອເຮັດໃຫ້ໂຄງການສຳເລັດພາຍຫຼັງໂຄວິດ-19 ນອກນັ້ນ ຄະນະຍັງໄປຢ້ຽມຢາມສະຖານທີ່ກໍ່ສ້າງໂຮງຮຽນກິນນອນຊົນເຜົ່າແຂວງຊຽງຂວາງ ສູນບໍລິການເຕັກນິກກະສິກຳ 2 ແຫ່ງ ຢູ່ແຂວງຊຽງຂວາງ ແລະ ແຂວງຫົວພັນ ໂຮງຮຽນມັດທະຍົມສຶກສາສົມບູນພອນສະຫວັນ ແຂວງຊຽງຂວາງ ໂຮງຮຽນມັດທະຍົມສົມບູນ ເມືອງຫົວເມືອງ ແຂວງຫົວພັນ ຫໍວັດທະນະທຳແຂວງຫົວພັນ ໂດຍການຊ່ວຍເຫຼືອຈາກແຂວງບັກນິງ ນອກຈາກນັ້ນ ກໍໄດ້ຢ້ຽມຢາມໂຄງການລົງທຶນຂອງຫວຽດນາມ ເຊັ່ນ: ໂຄງການຜະລິດກະສິກຳລ້ຽງງົວພັນນົມວີນາມິວ ຢູ່ແຂວງຊຽງຂວາງ ສະໜາມບິນໜອງຄ້າງ ແຂວງຫົວພັນ ການລົງມາເຮັດວຽກຂອງຄະນະໃນຄັ້ງນີ້ ເພື່ອແນໃສ່ເສີມຂະຫຍາຍສາຍພົວພັນພິເສດ ຄວາມສາມັກຄີອັນຍິ່ງໃຫຍ່ ການຮ່ວມມືຮອບດ້ານຂອງສອງພັກ ສອງລັດ ເວົ້າລວມ ເວົ້າສະເພາະ ກໍຄືການພົວພັນຮ່ວມມືຂອງສອງແຂວງ ຫົວພັນ ແລະ ຊຽງຂວາງ ກັບບັນດາແຂວງ ນະຄອນ ສສ ຫວຽດນາມ.