ວັນທີ 14-17 ກໍລະກົດ ຢູ່ພະແນກສຶກສາທິການ ແລະ ກີລາແຂວງໄຊສົມບູນ ສະຫະພັນບານເຕະແຫ່ງຊາດລາວ (ສຕລ) ໄດ້ຈັດເຝີກອົບຮົມຄູເຝີກ ແລະ ກຳມະການຕັດສິນຂັ້ນພື້ນຖານຂຶ້ນ ມີທ່ານ ພຸດລຳໄພ ທຽມພະສອນ ຮອງຫົວໜ້າພະແນກສຶກສາທິການ ແລະ ກີລາ ແຂວງໄຊສົມບູນ ທ່ານ ພູຂົງ ພົມມະໄຊລີ ຮອງປະທານສະຫະພັນບານເຕະແຂວງໄຊສົມບູນ ທ່ານ ກັນລະຍາ ສີສົມຫວັງ ຫົວໜ້າເຝີກສອນຄູເຝີກ ສຕລ ທ່ານ ສີປະເສີດ ສິນບັນດິດ ຫົວໜ້າເຝີກສອນກຳມະການຕັດສິນ ສຕລ ພ້ອມດ້ວຍຄະນະຄູເຝີກ ແລະ ສຳມະນາກອນ 44 ຄົນເຂົ້າຮ່ວມ.
ການເຝີກອົບຮົມຄູເຝີກ ແມ່ນແບ່ງອອກເປັນ 2 ພາກ ປະກອບມີ ພາກທິດສະດີ ແລະ ການປະຕິບັດຕົວຈິງໃນພາກສະໜາມ ເຊິ່ງຜູ້ເຂົ້າຮ່ວມຈະໄດ້ຮຽນຮູ້ກ່ຽວກັບການພັດທະນາຄູເຝີກ ຄວາມຕ້ອງການຄູເຝີກຂອງ AFC ພາລະບົດບາດ ແລະ ໜ້າທີ່ຮັບຜິດຊອບ ເຕັກນິກ ແລະ ຍຸດທະວິທີຂອງການບານເຕະ ຄວາມສຳພັນກັບບານ ການສົ່ງບານ ການຈັບບານ ການຍິງບານ ຫຼັກການຂອງການເຝີກສອນ ບານເຕະຟຸດຊໍ ກະຕິກາຂອງກີລາບານເຕະ ອາຫານ ແລະ ສຸຂະພາບ ການເຝີກແອບ ການເຝີກແອບຜູ້ຮັກສາປະຕູ ການວາງແຜນ ບົດບາດສຳຄັນຂອງຜູ້ຮັກສາປະຕູ ການຈະເລີນເຕີບໃຫຍ່ ແລະ ການປະຖົມພະຍາບານ ພ້ອມນັ້ນຍັງໄດ້ແນະນຳພາກປະຕິບັດກິດຈະກຳບານເຕະພື້ນຖານ ການຫຼີ້ນບານໃນເກມ ແລະ ກິດຈະກຳກີລາບານເຕະຂັ້ນພື້ນຖານ ເຍົາວະຊົນຮຸ່ນອາຍຸ 10-12 ປີ.
ສ່ວນການເຝີກອົບຮົມກຳມະການຂັ້ນພື້ນຖານ ກໍໄດ້ແບ່ງອອກເປັນ 2 ພາກເຊັ່ນກັນ ເຊິ່ງມີພາກທິດສະດີ ແລະ ການປະຕິບັດຕົວຈິງ ນັກສຳມະກອນ ຈະໄດ້ຮຽນຮູ້ກົດລະບຽບ ຟີຟາ ປັບປຸງໃໝ່ ທັງນີ້ເພື່ອສ້າງຮຸ່ນສືບທອດ ເພື່ອແລກປ່ຽນບົດຮຽນລະຫວ່າງກຳມະການດ້ວຍກັນ ຖ້າຫາກວ່າສຳມະນາກອນມີຜົນງານດີ ກໍມີໂອກາດໄດ້ຕັດສິນການແຂ່ງຂັນລາຍການຕ່າງໆ ທີ່ທາງ ສຕລ ຈັດຂຶ້ນ.
ສຳລັບປີ 2019 ສຕລ ໄດ້ຈັດເຝີກອົບຮົມຄູເຝີກບານເຕະຂັ້ນພື້ນຖານ ແລະ ກຳມະການຕັດສິນບານເຕະຂັ້ນພື້ນຖານ ແລະ ຈັດກິດຈະກຳບານເຕະຂອງເຍົາວະຊົນ ກໍໄດ້ຈັດມາຫຼາຍຄັ້ງຢູ່ 10 ແຂວງຄື: ແຂວງຊຽງຂວາງ ຫົວພັນ ຜົ້ງສາລີ ແຂວງຫຼວງນ້ຳທາ ອຸດົມໄຊ ບໍ່ແກ້ວ ໄຊຍະບູລີ ຫຼວງພະບາງ ວຽງຈັນ ແລະ ແຂວງບໍລິຄຳໄຊ ສ່ວນປີ 2020 ສຕລ ໄດ້ອົບເຝີກຮົມມາແລ້ວ ແຂວງສະຫວັນນະເຂດ ແລະ ຄຳມ່ວນ ຂະນະທີ່ ສາລະວັນ ເຊກອງ ຈຳປາສັກ ແລະ ອັດຕະປື ແມ່ນຈະຝຶກອົບຮົມໃນທ້າຍປີ 2020.