ເມືອງຈັນທະບູລີ ນະຄອນຫຼວງວຽງຈັນ ໄດ້ຈັດສອບເສັງຈົບຊັ້ນປະຖົມສຶກສາສົມບູນ (ປ5) ສົກຮຽນ 2019-2020 ຂຶ້ນວັນທີ 16-17 ກໍລະກົດ 2020 ທີ່ໂຮງຮຽນປະຖົມ ແລະ ມັດທະຍົມສົມບູນສິນໄຊ ມີທ່ານ ບຸນໜາ ຜາທຸມມະວົງ ເຈົ້າເມືອງຈັນທະບູລີ ທ່ານ ຈັນທະຄານ ລັດຕະນາ ຮອງຫົວໜ້າຫ້ອງການສຶກສາທິການ ແລະ ກີລາ ເມືອງຈັນທະບູລີ ພ້ອມດ້ວຍຜູ້ອຳນວຍການໂຮງຮຽນ ຄະນະກຳມະການ ພະນັກງານຄູ-ອາຈານ ແລະ ນັກສອບເສັງເຂົ້າຮ່ວມ.
ທ່ານ ຈັນທະຄານ ກ່າວວ່າ: ສົກຮຽນ 2019-2020 ທົ່ວເມືອງຈັນທະບູລີ ມີໂຮງຮຽນປະຖົມທັງໝົດ 33 ແຫ່ງ ໃນນັ້ນ ມີໂຮງຮຽນລັດ 15 ແຫ່ງ ມີນັກຮຽນເຂົ້າຮ່ວມສອບເສັງທັງໝົດ 1.436 ຄົນ ຍິງ 704 ຄົນ ແບ່ງສູນສອບເສັງ ອອກເປັນ 4 ສູນຄື: ນາໄຮ່ດຽວ ຫງວຽນຢູ ຈອມຄຳ ແລະ ສູນສອບເສັງໂຮງຮຽນສິນໄຊ ແບ່ງເປັນ 72 ຫ້ອງສອບເສັງ ມີວິຊາສອບເສັງ 3 ວິຊາຄື: ວິຊາຫັດແຕ່ງ (ຂຽນທວາຍ+ຄຳຖາມ) ຄະນິດສາດ ແລະ ວິຊາໂລກອ້ອມຕົວ ມີຄະນະກຳມະການ 304 ທ່ານ ທັງນີ້ເພື່ອເປັນການຕິດຕາມ ກວດກາ ແລະ ປະເມີນຜົນຕໍ່ການບໍລິຫານຄຸ້ມຄອງໂຮງຮຽນສາມັນສຶກສາໃນທົ່ວເມືອງຈັນທະບູລີ ໂດຍສະເພາະການຮຽນ-ການສອນ ການປະຕິບັດໂຄງການຫຼັກສູດການປະຕິບັດ 3 ຂໍ້ແຂ່ງຂັນທີ່ກະຊວງສຶກສາທິການ ແລະ ກີລາວາງອອກໃຫ້ປາກົດຜົນເປັນຈິງ ເພື່ອປະຕິບັດຕາມແຜນພັດທະນາການສຶກສາຂອງຫ້ອງການສຶກສາທິການ ແລະ ກີລາເມືອງໃຫ້ໄດ້ຕາມລະດັບຄາດໝາຍ.
ໂອກາດນີ້ທ່ານ ບຸນໜາ ຜາທຸມມະວົງ ໄດ້ກ່າວເນັ້ນຕໍ່ຄະນະຜູ້ບໍລິການໂຮງຮຽນ ໃຫ້ລູກຫຼານນັກຮຽນທຸກຄົນພ້ອມກັນຕັ້ງໃຈ ສຸມໃສ່ການສອບເສັງໃຫ້ສຳເລັດ ພ້ອມດຽວກັນຄູ-ອາຈານ ຄະນະຮັບຜິດຊອບການສອບ ຈົ່ງເອົາໃຈໃສ່ປະຕິບັດໜ້າທີ່ຂອງຕົນ ໃຫ້ຖືກຕ້ອງສອດຄ່ອງຕາມລະບຽບຫຼັກການ ຮັບປະກັນຄວາມໂປ່ງໃສ ຍຸຕິທຳ ດ້ວຍຄວາມຮັບຜິດສອບສູງ ເຮັດໃຫ້ການສອບເສັງຄັ້ງນີ້ ບັນລຸໄດ້ຕາມຈຸດປະສົງໝາຍທີ່ວາງໄວ້.
