ປະເທດລາວເຮົາ ມີແຫຼ່ງຊັບພະຍາກອນປ່າໄມ້ທີ່ອຸດົມສົມບຸນ ເຖິງແມ່ນວ່າໄລຍະຜ່ານມາ ປ່າໄມ້ໃນຫຼາຍທ້ອງຖິ່ນໄດ້ຖືກບຸກລຸກກໍຕາມ ແຕ່ຄວາມອຸດົມສົມບຸນດັ່ງກ່າວ ກໍຍັງສາມາດເປັນທ່າແຮງດ້ານການທ່ອງທ່ຽວ ໄດ້ເປັນຢ່າງດີ.
ຖ້າເວົ້າເຖິງຄວາມອຸດົມສົມບຸນຂອງຊັບພະຍາກອນທຳມະຊາດ ກັບການພັດທະນາການທ່ອງທ່ຽວແລ້ວ ເຫັນໄດ້ວ່າ ໃນໄລຍະຜ່ານມາ ກໍຄືປັດຈຸບັນ ລັດຖະບານໄດ້ມີການສົ່ງເສີມການທ່ອງທ່ຽວໃນຮູບແບບອະນຸຮັກ ຫຼື eco-tourism ໂດຍໄດ້ອະນຸຍາດໃຫ້ພາກກະຊົນ ເຂົ້າມາລົງທຶນໃສ່ການພັດທະນາສະຖານທີ່ທ່ອງທ່ຽວທຳມະຊາດ ຕິດພັນກັບການສ້າງຄວາມຍືນຍົງ ເພື່ອດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາຫຼາຍຂຶ້ນ.
ການພັດທະນາສະຖານທີ່ທ່ອງທ່ຽວທາງທຳມະຊາດ ແມ່ນຂຶ້ນກັບທ່າແຮງຂອງຫຼາຍໆແຂວງຫຼາຍໆທ້ອງຖິ່ນ ແລະ ສະຖານທີ່ທ່ອງທ່ຽວທີ່ເປັນທີ່ຮູ້ຈັກກັນດີ ແລະ ເປັນຈຸດໝາຍປາຍທາງຂອງນັກທ່ອງທ່ຽວທັງພາຍໃນ ແລະ ຕ່າງປະເທດ ໃນໄລຍະຊຸມປີຜ່ານມາ ກໍຄົງຈະເປັນສະຖານທີ່ທ່ອງທ່ຽວທຳມະຊາດ ນ້ຳກັດ ຢໍລະປາ ແຂວງອຸດົມໄຊ ເປັນສະຖານທີ່ ທີ່ຖືກພັດທະນາໃຫ້ເໝາະແກ່ການພັກຜ່ອນ ທີ່ສຳຜັດໄດ້ເຖິງກິ່ນອາຍທຳມະຊາດ ນັກທ່ອງທ່ຽວທີ່ເຂົ້າມາທ່ຽວຊົມສະຖານ ທີ່ທ່ອງທ່ຽວແຫ່ງດັ່ງກ່າວ ສາມາດເຂົ້າຮ່ວມຫຼາຍໆກິດຈະກຳ ພ້ອມທັງສາມາດສຳຜັດກັບການດຳລົງຊີວິດຂອງປະຊາຊົນ ທີ່ຢູ່ໃກ້ກັບສະຖານທີ່ທ່ອງທ່ຽວດັ່ງກ່າວ ນ້ຳກັດ ຢໍລະປາ ຖືວ່າເປັນສະຖານທີ່ທ່ອງທ່ຽວ ທີ່ເປັນຄວາມໄຝ່ຝັນຂອງຫຼາຍໆຄົນ ແຕ່ດ້ວຍທີ່ຕັ້ງຢູ່ທາງຕອນເໜືອຂອງປະເທດ ເຮັດໃຫ້ການເດີນທາງຕ້ອງໃຊ້ເວລາ ແລະ ຄ່າໃຊ້ຈ່າຍຂ້ອນຂ້າງສູງ.
ຢ່າງໃດກໍຕາມ ສຳລັບນັກທ່ອງທ່ຽວຊາວນະຄອນຫຼວງວຽງຈັນ ທີ່ຕ້ອງການສຳຜັດກັບບັນຍາກາດຄ້າຍຄືສະຖານທີ່ດັ່ງກ່າວນັ້ນ ບໍ່ຈຳເປັນຕ້ອງເດີນທາງເຖິງອຸດົມໄຊ ແຕ່ທ່ານສາມາດສຳຜັດບັນຍາກາດຄ້າຍຄືກັບນ້ຳກັດ ຢໍລະປາ ໄດ້ທີ່ຢູ່ໃນນະຄອນຫຼວງວຽງຈັນເອງ ພາຍຫຼັງທີ່ລັດຖະບານ ກໍຄື ອົງການປົກຄອງນະຄອນຫຼວງວຽງຈັນ ໄດ້ອະນຸຍາດໃຫ້ເອກະຊົນລົງທຶນເຂົ້າໃນການພັດທະນາສະຖານທີ່ທ່ອງທ່ຽວຢູ່ພູເຂົາຄວາຍ ເຂດເມືອງປາກງື່ມ ນະຄອນຫຼວງວຽງຈັນ ເປັນສະຖານທີ່ທ່ອງທ່ຽວທຳມະຊາດ ນ້ຳປ່ຽນ ຢໍລະປາ ສະຖານທີ່ທ່ອງທ່ຽວໃນເຄືອຂອງນ້ຳກັດ ຢໍລະປາ ທີ່ຕັ້ງບໍ່ໄກຈາກເທສະບານເມືອງ.
ນ້ຳປ່ຽນ ຢໍລະປາ ໄດ້ຖືກພັດທະນາຂຶ້ນໃຫ້ກົມກືນກັບທຳມະຊາດ ດ້ວຍການເອົາໃຈໃສ່ໃນການອອກແບບ ຈະເຮັດໃຫ້ນັກທ່ອງທ່ຽວຢູ່ໃກ້ກັບທຳມະຊາດຫຼາຍຂຶ້ນ ພ້ອມນັ້ນ ສະຖານທີ່ທ່ອງທ່ຽວດັ່ງກ່າວ ຍັງໄດ້ມີຫຼາຍກິດຈະກຳທີ່ຈະສ້າງຄວາມຕື່ນເຕັ້ນໃຫ້ກັບນັກທ່ອງທ່ຽວ ບໍ່ວ່າຈະເປັນຂົວອູ່ ຂີ່ສະລິງ ຂີ່ລົດຈັກ ແລະ ອື່ນໆ ເຊິ່ງສາມາດເວົ້າໄດ້ວ່າບໍ່ນ້ອຍໜ້າກັບນ້ຳກັດ ຢໍລະປາ ເລີຍກໍວ່າໄດ້.
ຢ່າງໃດກໍຕາມ ຜູ້ທີ່ຕ້ອງການສຳຜັດກັບບັນຍາກາດທີ່ກ່າວມານັ້ນ ກໍຕ້ອງອົດໃຈລໍເພາະສະຖານທີ່ດັ່ງກ່າວ ມີແຜນເປີດໃຫ້ບໍລິການໃນມໍ່ໆນີ້ ຮັບຮອງວ່ານັກທ່ອງທ່ຽວທີ່ໄດ້ເດີນທາງໄປສຳຜັດ ຈະຮູ້ສຶກປະທັບໃຈໄປກັບປະສົບການໃໝ່ ຈາກການເຂົ້າຮ່ວມບັນດາກິດຈະກຳທີ່ທາງສະຖານທີ່ທ່ອງທ່ຽວຈັດຂຶ້ນຢ່າງແນ່ນອນ.