ປັດຈຸບັນ ຄອມພິວເຕີ ແທັບເລັດ ສະມາດໂຟນ ຕ່າງກໍເຂົ້າມາມີບົດບາດກັບຊີວິດປະຈຳວັນເປັນຢ່າງສູງ ເຮັດໃຫ້ຫຼາຍຄົນທີ່ນັ່ງຈ້ອງຈໍຄອມພິວເຕີເປັນເວລາດົນນານ ອາດເກີດອາການປວດ ເມື່ອຍຕາ ຕາແຫ້ງ ແສບຕາ ເຄືອງຕາ ຕາມົວ ເຊິ່ງອາດບົ່ງບອກວ່າກຳລັງສ່ຽງກັບກຸ່ມອາການທີ່ເອີ້ນວ່າ Computer Vision Syndrome (CVS) ກຸ່ມອາການນີ້ ເຖິງແມ່ນບໍ່ໄດ້ກໍ່ໃຫ້ເກີດອັນຕະລາຍຮ້າຍແຮງຕໍ່ດວງຕາ ຫຼື ການເບິ່ງເຫັນ ແຕ່ມັກເຮັດໃຫ້ເກີດຄວາມບໍ່ສະບາຍຕາ ແລະ ອາດເປັນບັນຫາລົບກວນການເຮັດວຽກ ຫຼື ການໃຊ້ຊີວິດປະຈຳວັນໄດ້.
Computer Vision Syndrome ຄືອັນໃດ ?
Computer Vision Syndrome (CVS) ຄື ກຸ່ມອາການທາງຕາທີ່ເກີດຈາກການໃຊ້ສາຍຕາກັບຄອມພິວເຕີເປັນເວລາດົນ ໂດຍຄວາມຮຸນແຮງຈະເພີ່ມຂຶ້ນຕາມໄລຍະເວລາໃນການໃຊ້ງານ ແລະ ຈ້ອງໜ້າຈໍຄອມພິວເຕີຢ່າງຕໍ່ເນື່ອງ ມີການສຶກສາພົບວ່າ ປະມານ 90% ຂອງຜູ້ທີ່ໃຊ້ຄອມພິວເຕີຕໍ່ເນື່ອງຫຼາຍກວ່າ 3 ຊົ່ວໂມງຕໍ່ວັນ ຈະມີອາການ Computer Vision Syndrome ຢ່າງໃດຢ່າງໜຶ່ງ ຫຼື ອາດເປັນຮ່ວມກັນຈົນສົ່ງຜົນກະທົບກັບຄຸນນະພາບຊີວິດໃນແຕ່ລະວັນ ໂດຍລັກສະນະຂອງກຸ່ມອາການ CVS ມີດັ່ງນີ້ ປວດເມື່ອຍຕາ ຕາແຫ້ງ ແສບຕາ ເຄືອງຕາ ຕາມົວ ໂຟກັສໄດ້ຊ້າລົງ ຕາສູ້ແສງບໍ່ໄດ້ ປວດກະບອກຕາ ປວດຫົວ ຫຼື ບາງຄັ້ງອາດມີອາການປວດຫຼັງ ໄຫຼ່ ຫຼື ຕົ້ນຄໍອີກດ້ວຍ.
ປັດໄຈສ່ຽງ Computer Vision Syndrome
ນອກຈາກອາການຜິດປົກກະຕິທີ່ເກີດຂຶ້ນແລ້ວ ປັດໄຈສ່ຽງເຫຼົ່ານີ້ ກໍສົ່ງຜົນໃຫ້ມີໂອກາດທີ່ຈະເກີດຄວາມບໍ່ສະບາຍດວງຕາເກີດຂຶ້ນໄດ້ ເຊັ່ນ:
1. ຂະນະຈົດຈໍ່ກັບການອ່ານໜັງສື ຫຼື ຈ້ອງຈໍຄອມພິວເຕີດົນໆ ຈະມີການກະພິບຕາໜ້ອຍລົງ ເຮັດໃຫ້ເກີດອາການຕາແຫ້ງງ່າຍຂຶ້ນ.
2. ແສງສະຫວ່າງພາຍໃນຫ້ອງບໍ່ເໝາະສົມ.
3. ມີແສງສະທ້ອນຈາກຈໍຄອມພິວເຕີ.
4. ການທີ່ຕົວອັກສອນເທິງຈໍຄອມພິວເຕີບໍ່ລຽບຄົມຊັດເທົ່າຕົວພິມເທິງໜ້າປຶ້ມ ຫຼື ມີຄວາມບໍ່ນິ່ງຂອງສັນຍານໃນຈໍຄອມພິວເຕີ ເຮັດໃຫ້ຕ້ອງພະຍາຍາມໃຊ້ສາຍຕາໂຟກັສເພີ່ມຫຼາຍຂຶ້ນ ຈຶ່ງກໍ່ໃຫ້ເກີດອາການຕາອ່ອນລ້າໄດ້ງ່າຍ.
5. ໄລຍະຫ່າງຈາກໜ້າຈໍເຖິງຕົວເຮົາ.
6. ລະດັບສາຍຕາໃນການເບິ່ງຈໍຄອມພິວເຕີ.
7. ທ່າທາງໃນການນັ່ງເຮັດວຽກທີ່ບໍ່ເໝາະສົມ.
ການປ້ອງກັນ Computer Vision Syndrome
ການປ້ອງກັນ Computer Vision Syndrome (CVS) ສາມາດເຮັດໄດ້ໂດຍ
1. ປັບລະດັບການເບິ່ງລະຫວ່າງຈໍຄອມພິວເຕີ ແທັບເລັດ ຫຼື ສະມາດໂຟນ ປັບທ່ານັ່ງໃນການເຮັດວຽກໃຫ້ເໝາະສົມ ຈຸດສູນກາງຂອງຈໍຄອມພິວເຕີ ຄວນຢູ່ຫ່າງຈາກຕາປະມານ 20-28 ນິ້ວ ໂດຍແປ້ນພິມຄວນວາງຢູ່ລະດັບຕ່ຳກວ່າຈໍ ໃຫ້ຂໍ້ມື ແລະ ແຂນຂະໜານໄປກັບພື້ນ ຂໍ້ສອກຕັ້ງສາກ ບໍ່ຢູ່ໃນລັກສະນະເອື້ອມໄປຂ້າງໜ້າ ປັບລະດັບຕັ່ງອີ້ ໂດຍໃຫ້ຝາຕີນວາງຮາບໄປກັບພື້ນ ເຂົ່າຕັ້ງສາກ ຕົ້ນຂາຂະໜານກັບພື້ນ ອາດມີບ່ອນວາງສອກ ແລະ ແຂນເພື່ອຫຼຸດອາການອ່ອນລ້າທີ່ຫົວໄຫຼ່ ແຂນ ແລະ ຂໍ້ມື ເອກະສານສິ່ງພິມ ຫຼື ປຶ້ມ ຄວນວາງຢູ່ໃນລະດັບ ແລະ ໄລຍະດຽວກັບຈໍ ເພື່ອຈະໄດ້ບໍ່ຕ້ອງຫຍັບ ຫຼື ຫັນຫົວ ແລະ ປ່ຽນການປັບໂຟກັສຫຼາຍເກີນໄປ.
2. ປັບແສງສະຫວ່າງຈາກພາຍນອກ ແລະ ຈາກຈໍຄອມພິວເຕີ ຄວນປິດຜ້າກັ້ງປ່ອງຢ້ຽມ ເພື່ອຫຼີກລ່ຽງບໍ່ໃຫ້ມີແສງແດດ ຫຼື ແສງສະຫວ່າງຈາກພາຍນອກສ່ອງກະທົບກັບຈໍຄອມພິວເຕີ ແສງພາຍໃນຫ້ອງເຮັດວຽກທີ່ສະຫວ່າງເກີນໄປ ຈະກໍ່ໃຫ້ເກີດແສງສະທ້ອນທີ່ຈໍໄດ້ງ່າຍ ເຮັດໃຫ້ຮູ້ສຶກບໍ່ສະບາຍຕາໄດ້ ຫຼື ອາດໃຊ້ແຜ່ນກັນແສງສະທ້ອນຕິດໜ້າຈໍພາບ ປັບຄວາມສະຫວ່າງຂອງໜ້າຈໍ ແລະ ຄວາມແຕກຕ່າງຂອງສີລະຫວ່າງພື້ນຈໍ ແລະ ຕົວອັກສອນ ໃຫ້ເບິ່ງເຫັນໄດ້ຄົມຊັດ ແລະ ສະບາຍຕາທີ່ສຸດ.
3. ພັກສາຍຕາລະຫວ່າງການເຮັດວຽກ ເມື່ອໃຊ້ສາຍຕາຕິດຕໍ່ກັນເປັນໄລຍະເວລາດົນກວ່າ 20 ນາທີ ຄວນລະສາຍຕາອອກຈາກຈໍຄອມພິວເຕີ ແລະ ເບິ່ງອອກໄປໃຫ້ໄກປະມານ 20 ວິນາທີ ທຸກໆ 2 ຊົ່ວໂມງ ຄວນພັກສາຍຕາ ຫຼື ລຸກຈາກໂຕ໊ະເຮັດວຽກ ເພື່ອເປັນການຜ່ອນຄາຍຢ່າງໜ້ອຍ 15-20 ນາທີ.
4. ກະພິບຕາເລື້ອຍຂຶ້ນ ຫຼືອາດຢອດນ້ຳຕາທຽມ ເພື່ອຊ່ວຍຫຼຸດອາການຕາແຫ້ງ ແລະ ຊ່ວຍໃຫ້ສະບາຍຕາຂຶ້ນ.
5. ຄວນພົບແພດເພື່ອກວດວັດສາຍຕາ ຫຼື ຄວາມຜິດປົກກະຕິຂອງດວງຕາທີ່ອາດເກີດຂຶ້ນໄດ້.
ໃນຄົນທຸກຊ່ວງໄວ ອາດມີຄວາມຜິດປົກກະຕິທາງສາຍຕາທີ່ແຕກຕ່າງກັນ ການກວດຄັດຕອງດວງຕາ ບໍ່ພຽງແຕ່ຊ່ວຍໃຫ້ຄົ້ນພົບຄວາມຜິດປົກກະຕິຂອງດວງຕາ ໃນໄລຍະເລີ່ມຕົ້ນ ແຕ່ຍັງຊ່ວຍໃຫ້ຄົ້ນພົບໂລກກ່ຽວກັບດວງຕາ ໃນຂະນະທີ່ຍັງບໍ່ສະແດງອາການ ຫຼື ການເຂົ້າຮັບຄຳປຶກສາກັບຈັກສຸແພດທີ່ມີຄວາມຊຳນານ ແລະ ປະສົບການ ຈະຊ່ວຍໃຫ້ເຮົາດູແລດວງຕາຄູ່ສຳຄັນໄດ້ຢ່າງດີ ແລະ ຊ່ວຍໃຫ້ເບິ່ງເຫັນໂລກໄດ້ຊັດເຈນໄປອີກຍາວນານ.
ຊາວບ້ານ – ນຳສະເໜີ