ບໍລິສັດສື່ສັງຄົມອອນລາຍ ທວິດເຕີ ມີຖະແຫຼງການສົ່ງເຖິງພະນັກງານຂອງບໍລິສັດວ່າ ພວກເຂົາສາມາດເຮັດວຽກຢູ່ເຮືອນໄດ້ “ຕະຫຼອດໄປ” ຫາກຕ້ອງການ ຕາມລາຍງານທີ່ CNBC ອ້າງອີງຈາກສຳນັກຂ່າວ BuzzFeed News.
ທວິດເຕີ ບອກວ່າ ຕົນເປັນບໍລິສັດທຳອິດທີ່ເລີ່ມອະນຸຍາດໃຫ້ພະນັກງານເຮັດວຽກຢູ່ເຮືອນໄດ້ ໃນໄລຍະທີ່ເກີດວິກິດໂຄວິດ-19 ແຕ່ບໍ່ແມ່ນບໍລິສັດທຳອິດ ທີ່ຈະໃຫ້ພະນັກງານກັບໄປເຮັດວຽກໃນຫ້ອງການ ແລະ ວ່າ “ຫາກພະນັກງານຢາກກັບມາເຮັດວຽກທີ່ສຳນັກງານເມື່ອໃດ ທາງບໍລິສັດກໍຈະຕ້ອນຮັບຢ່າງອົບອຸ່ນ ແຕ່ມີກົດວ່າ ຕ້ອງກັບມາເມື່ອປອດໄພແລ້ວເທົ່ານັ້ນ” ຊຶ່ງທາງທວິດເຕີລະບຸວ່າ ຢ່າງໄວທີ່ສຸດ ກໍຄື ເດືອນກັນຍາ.
ກ່ອນໜ້ານີ້ ບໍລິສັດເຕັກໂນໂລຊີລາຍໃຫຍ່ຫຼາຍແຫ່ງ ລວມທັງ ເຟສບຸກ ແລະ ກູເກິລ ຕ່າງປັບນະໂຍບາຍອະນຸຍາດໃຫ້ພະນັກງານເຮັດວຽກຢູ່ເຮືອນຍາວນານຂຶ້ນ ຄື ອາດເຖິງທ້າຍປີ ເພື່ອສອດຄ່ອງກັບຄຳແນະນຳຂອງຜູ້ຊ່ຽວຊານທີ່ວ່າ ການເຮັດວຽກຢູ່ເຮືອນ ຈະກາຍເປັນເລື່ອງປົກກະຕິຫຼາຍຂຶ້ນ ຫຼັງການລະບາດໃຫຍ່ຄັ້ງນີ້.