ມື້ນີ້ມີເລື່ອງມາເວົ້າສູ່ຟັງ ກ່ຽວກັບມາດຕະການຮັກສາຄວາມໝັ້ນຄົງ ຄວາມປອດໄພ ຈາກການກໍ່ການຮ້າຍຢູ່ບັນດາປະເທດດັ່ງຕໍ່ໄປນີ້.
ທີ່ອິນເດຍ: ມີເລື່ອງຟັງແລ້ວສີແປກໆຫູ ແຕ່ເປັນຄວາມຈິງທີ່ເກີດຢູ່ປະເທດອິນເດຍ ໃນມາດຕະການຮັກສາຄວາມໝັ້ນຄົງ ແລະ ຄວາມປອດໄພ ເລື່ອງມີຢູ່ວ່າ ສູນກາງອຸດສາຫະກຳດ້ານການຮັກສາຄວາມໝັ້ນຄົງ (CISF) ທີ່ເຮັດໜ້າທີ່ຮັບປະກັນຄວາມປອດໄພການບິນຂອງອິນເດຍ ໄດ້ອອກຄຳສັ່ງໃຫ້ເຈົ້າໜ້າທີ່ຕຳຫຼວດປະຈຳສະໜາມບິນ ປະຢັດຮອຍຍິ້ມ ຫຼື ຫ້າມຍິ້ມຟຸມເຟືອຍ ຫຼື ສະແດງຄວາມເປັນມິດກັບຜູ້ໂດຍສານຈົນເກີນໄປ ເພາະມັນອາດເຮັດໃຫ້ເສຍບຸກຄະລິກຂອງຄວາມເປັນຕຳຫຼວດຮັກສາຄວາມໝັ້ນຄົງ-ຄວາມປອດໄພ ທາງ CISF ເຫັນວ່າ ເຈົ້າໜ້າທີ່ຕຳຫຼວດປະຈຳສະໜາມບິນນັ້ນ ຄວນຍິ້ມນ້ອຍໆພໍງາມ ບໍ່ຄວນຍິ້ມກວ້າງໆເລີຍເຖືອດ ຄຳສັ່ງດັ່ງກ່າວແມ່ນເພື່ອໃຫ້ເຈົ້າໜ້າທີ່ຕຳຫຼວດມີສະຕິລະວັງຕົວ ບໍ່ມົວແຕ່ສະແດງຄວາມເປັນມິດເກີນໄປກັບຜູ້ໂດຍສານ ທ່ານ ຣາເຈັດ ຣານຈານ ຜູ້ອຳນວຍການໃຫຍ່ຂອງ CISF ໄດ້ເວົ້າກ່ຽວກັບບັນຫານີ້ວ່າ ພວກເຮົາບໍ່ຄວນສະແດງຄວາມເປັນມິດເກີນໄປກັບບັນດາຜູ້ໂດຍສານ ເພາະມີແຫຼ່ງຂໍ້ມູນທີ່ຊີ້ອອກວ່າ ເຫດການຖະລົ່ມຕຶກແຝດສູນການຄ້າໂລກ ທີ່ນິວຢອກ ສ ອາເມຣິກາ ຫຼື ເຫດການ 9/11 (ເຊັບເທັມເບີ ອີເລເວັນ) ນັ້ນ ເກີດມາຈາກສະພາບຄວາມເປັນມິດຈົນເກີນໄປຂອງຜູ້ຮັກສາຄວາມປອດໄພກັບຜູ້ໂດຍສານຫັ້ນລະ… ທ່ານຜູ້ອຳນວຍການຍັງໄດ້ຢ້ຳຕື່ມວ່າ ເຈົ້າໜ້າທີ່ຮັກສາຄວາມໝັ້ນຄົງປອດໄພຂອງ CISF ຈະຕ້ອງໄດ້ຜ່ານການເຝິກອົບຮົມກ່ຽວກັບນິດໄສ ແລະ ການສະແດງອອກໂດຍຊ່ຽວຊານລະດັບສາກົນ.
ທີ່ອິນໂດເນເຊຍ: ໃນທ້າຍເດືອນພຶດສະພາ 2018 ມີຂ່າວວ່າ ທາງການອິນໂດເນເຊຍ ໄດ້ຮັບຮອງເອົາກົດໝາຍຕ້ານການກໍ່ການຮ້າຍ ທີ່ມີຄວາມເຄັ່ງຄັດຮັດກຸມຂຶ້ນຫຼາຍ ໃນທີ່ຈິງແລ້ວ ການພິຈາລະນາກົດໝາຍສະບັບນີ້ ໄດ້ແກ່ຍາວມາເປັນເວລາ 2 ປີ ຍ້ອນວ່າທາງລັດຖະສະພາຍັງຖົກຖຽງກັນບໍ່ໄປບໍ່ມາ ກ່ຽວກັບລາຍລະອຽດຂອງເນື້ອໃນລວມ ແລະ ບັນຫາກ່ຽວກັບຄຳນິຍາມຄຳວ່າ “ລັດທິກໍ່ການຮ້າຍ” ພາຍໃຕ້ກົດໝາຍສະບັບນີ້ ເຈົ້າໜ້າທີ່ຕຳຫຼວດມີສິດກັກຕົວຜູ້ຕ້ອງສົງໄສ ວ່າເປັນຜູ້ກໍ່ການຮ້າຍໄດ້ເປັນເວລາຍາວເຖິງ 21 ວັນ ເຊິ່ງໃນເມື່ອກ່ອນນັ້ນ ການກັກຕົວຜູ້ຕ້ອງສົງໄສແມ່ນບໍ່ໃຫ້ກາຍ 1 ອາທິດ (7 ວັນ) ນອກຈາກນັ້ນ ເຈົ້າໜ້າທີ່ຕຳຫຼວດຍັງມີສິດຟ້ອງຮ້ອງບຸກຄົນທີ່ເຂົ້າຮ່ວມ ຫຼື ປຸກລະດົມຄົນອື່ນໃຫ້ເຂົ້າຮ່ວມອົງການການກໍ່ການຮ້າຍຢູ່ພາຍໃນ ແລະ ຢູ່ຕ່າງປະເທດ ໃນເດືອນພຶດສະພາ ປີ 2018 ກໍໄດ້ມີເຫດການວາງລະເບີດຢູ່ໂບດ ແລະ ປ້ອມຕຳຫຼວດຢູ່ອິນໂດເນເຊຍ ເຊິ່ງເຮັດໃຫ້ມີຜູ້ເສຍຊີວິດ ຈຳນວນ 13 ຄົນ ຜູ້ກໍ່ເຫດນັ້ນແມ່ນຄົນຈາກ 2 ຄອບຄົວ ໃນນັ້ນ ລວມມີເດັກຍິງອາຍຸ 9 ປີ ແລະ 12 ປີຮ່ວມນຳ ທັງສອງຄອບຄົວທີ່ວ່ານັ້ນ ມີການພົວພັນກັບກຸ່ມຫົວຮຸນແຮງ ທີ່ຈົງຮັກພັກດີກັບກຸ່ມລັດອິດສະລາມ ເຫດການນີ້ເກີດຂຶ້ນຢູ່ຊູຣາບາຢາ ເມືອງໃຫຍ່ອັນດັບທີ 2 ຂອງອິນໂດເນເຊຍ ຫຼັງຈາກນັ້ນມາອີກບໍ່ພໍເທົ່າໃດວັນ ກໍມີເຫດຖະລົ່ມປ້ອມຕຳຫຼວດໃນລັກສະນະດຽວກັນ ຢູ່ເກາະຊູມາຕຼາ ເຮັດໃຫ້ຕຳຫຼວດ 1 ຄົນເສຍຊີວິດ ນີ້ຄືເຫດການກໍ່ການຮ້າຍ ທີ່ຊຸກຍູ້ໃຫ້ມີການຮັບຮອງເອົາກົດໝາຍຕ້ານການກໍ່ການຮ້າຍພາຍໃນເດືອນດຽວກັນນັ້ນ.
ທີ່ອົດສະຕຣາລີ: ຂ່າວຕ່າງປະເທດ ໃນຕົ້ນເດືອນກຸມພາ 2020 ໄດ້ເວົ້າກ່ຽວກັບທາງການອົດສະຕຣາລີ ໄດ້ຈັບກຸມຍິງອາຍຸ 22 ປີຄົນໜຶ່ງ ໃນຄວາມຜິດພົວພັນຮ່ວມມືກັບກຸ່ມກໍ່ການຮ້າຍຂອງລັດອິດສະລາມ ຂ່າວບອກວ່າ ຍິງຄົນນີ້ໄດ້ປຸກລະດົມຂົນຂວາຍໝູ່ຄູ່ຂອງຕົນ ໃຫ້ເດີນທາງໄປປະເທດຊີຣີ ແລະ ອີຣັກ ເພື່ອຮ່ວມຕໍ່ສູ້ກັບກຸ່ມລັດອິດສະລາມ ນອກຈາກນັ້ນ ນາງຖືກຂໍ້ຫາມີຄວາມເປັນເຈົ້າການສ້າງສະມາຄົມເຄືອຄ່າຍອອນລາຍ ເພື່ອສະໜັບສະໜູນການເຄື່ອນໄຫວຂອງກຸ່ມລັດອິດສະລາມຢູ່ປະເທດຊີຣີ ຕາມກົດໝາຍຕ້ານການກໍ່ການຮ້າຍຂອງອົດສະຕຣາລີ ແລ້ວ ຄວາມຜິດຂັ້ນນີ້ ຕ້ອງໄດ້ຮັບໂທດຈຳຄຸກຕະຫຼອດຊີວິດ.