ໃນທຸກວິນາທີຂອງຊີວິດ ຍັງມີຄົນເຈັບຈໍານວນຫຼາຍທີ່ກໍາລັງລໍຖ້າ “ເລືອດ” ເພື່ອຕໍ່ລົມຫາຍໃຈ ແລະ ຕໍ່ຄວາມຫວັງໃນຊີວິດ ເລືອດພຽງໜຶ່ງຖົງ ອາດເປັນຄວາມແຕກຕ່າງລະຫວ່າງການຢູ່ຫຼອດ ແລະ ການສູນເສຍ ດັ່ງນັ້ນ ການບໍລິຈາກເລືອດຈຶ່ງບໍ່ແມ່ນພຽງແຕ່ການໃຫ້ທາງກາຍ ແຕ່ເປັນການມອບຄວາມຮັກ ຄວາມຫ່ວງໃຍ ແລະ ຄວາມເມດຕາຕໍ່ເພື່ອນມະນຸດ.
ເນື່ອງໃນໂອກາດວັນຜູ້ບໍລິຈາກເລືອດໂລກ 14 ມິຖຸນາ ປະຈຳປີ 2026 ພິທີສະເຫຼີມສະຫຼອງໄດ້ຈັດຂຶ້ນຫຼາຍແຫ່ງ ໃນທົ່ວໂລກ ກໍຄື ສປປ ລາວ ເຊິ່ງໃນວັນທີ 16 ມິຖຸນາ 2026 ຜ່ານມາ ທີ່ສູນການຄ້າສະຫວັນ-ໄອເຕັກ ແຂວງສະຫວັນນະເຂດ ພາຍໃຕ້ການອະນຸມັດ ແລະ ການສະໜັບສະໜູນຂອງຄະນະກຳມະການປົກຄອງແຂວງ ງານດັ່ງກ່າວບໍ່ພຽງແຕ່ເປັນການລະນຶກ ແລະ ຂອບໃຈຜູ້ບໍລິຈາກເລືອດ ແຕ່ຍັງເປັນເວທີສຳຄັນໃນການສ້າງຄວາມຮັບຮູ້ຂອງສັງຄົມຕໍ່ຄຸນຄ່າອັນຍິ່ງໃຫຍ່ຂອງການບໍລິຈາກເລືອດ.
ວັນຜູ້ບໍລິຈາກເລືອດໂລກ: ວັນແຫ່ງການຂອບໃຈ ແລະ ການສ້າງຄວາມຫວັງ ທ່ານ ດຣ ຈັນທະລາ ສຸກສາຄອນ ຮອງປະທານອົງການກາແດງແຫ່ງຊາດລາວ ໄດ້ກ່າວໃນໂອກາດເຂົ້າຮ່ວມພິທີຄັ້ງນີ້ວ່າ: ວັນທີ 14 ມິຖຸນາ ຂອງທຸກໆປີ ແມ່ນວັນຜູ້ບໍລິຈາກເລືອດໂລກ (World Blood Donor Day) ທີ່ຖືກຈັດຂຶ້ນໃນຫຼາຍປະເທດທົ່ວໂລກ ເພື່ອສະແດງຄວາມຮູ້ບຸນຄຸນ ແລະ ຂອບໃຈຕໍ່ຜູ້ບໍລິຈາກເລືອດທີ່ໄດ້ເສຍສະຫຼະເລືອດຂອງຕົນໂດຍຄວາມສະໝັກໃຈ ບໍ່ຫວັງຜົນຕອບແທນ ເພື່ອຊ່ວຍຊີວິດເພື່ອນມະນຸດ ການບໍລິຈາກເລືອດແມ່ນ “ຂອງຂວັນແຫ່ງຊີວິດ” ທີ່ບໍ່ສາມາດຜະລິດຂຶ້ນໄດ້ດ້ວຍເທັກໂນໂລຊີໃດໆ ມີພຽງມະນຸດເທົ່ານັ້ນທີ່ສາມາດມອບເລືອດໃຫ້ແກ່ກັນໄດ້ ດັ່ງນັ້ນ ການມີຄັງເລືອດທີ່ພຽງພໍ ແລະ ປອດໄພ ຈຶ່ງເປັນພາລະກິດສຳຄັນຂອງທຸກປະເທດ.
ວັນຜູ້ບໍລິຈາກເລືອດໂລກ ໄດ້ຖືກຮັບຮອງໂດຍກອງປະຊຸມອົງການອະນາໄມໂລກ (WHO) ຄັ້ງທີ 58 ໃນເດືອນພຶດສະພາ ປີ 2005 ເພື່ອສົ່ງເສີມການບໍລິຈາກເລືອດແບບສະໝັກໃຈ ແລະ ບໍ່ຮຽກຮ້ອງສິ່ງຕອບແທນ ວັນທີ 14 ມິຖຸນາ ຖືກກຳນົດເປັນວັນສະເຫຼີມສະຫຼອງ ເພາະເປັນວັນຄ້າຍວັນເກີດຂອງ ຄານ ແລນສະແທນເນີ (Karl Landsteiner) ນັກຊີວະວິທະຍາຊາວອອສເຕຣຍ ຜູ້ຄົ້ນພົບລະບົບໝວດເລືອດ ABO ອັນເປັນພື້ນຖານສຳຄັນຂອງການສົ່ງເລືອດທີ່ປອດໄພໃນທົ່ວໂລກ ການຄົ້ນພົບດັ່ງກ່າວໄດ້ປ່ຽນແປງວົງການແພດຢ່າງສິ້ນເຊີງ ແລະ ເປີດຍຸກໃໝ່ໃນການຮັກສາຄົນເຈັບຜ່ານການສົ່ງເລືອດທີ່ມີມາດຕະຖານ.
ສຳລັບປີ 2026 ອົງການອະນາໄມໂລກ ຮ່ວມກັບສະຫະພັນກາແດງ ແລະ ຊີກວົງເດືອນແດງສາກົນ ໄດ້ກຳນົດຄຳຂວັນວ່າ: “ໜຶ່ງຢອດເລືອດເພື່ອມະນຸດສະທຳ, ໃຫ້ເລືອດ ໃຫ້ຊີວິດ” “One Drop of Humanity. Give Blood. Save Lives.” ຄຳຂວັນນີ້ສະທ້ອນໃຫ້ເຫັນວ່າ ເລືອດທຸກຢອດທີ່ຖືກບໍລິຈາກ ລ້ວນເປັນສັນຍາລັກແຫ່ງຄວາມເປັນມະນຸດ ຄວາມເມດຕາ ແລະ ຄວາມຮັບຜິດຊອບຮ່ວມກັນຂອງສັງຄົມ.
ທ່ານ ດຣ ຈັນທະລາ ສຸກສາຄອນ ໄດ້ເນັ້ນວ່າ: ການບໍລິຈາກເລືອດມີບົດບາດສໍາຄັນຕໍ່ລະບົບສາທາລະນະສຸກ ແລະ ການຮັກສາພະຍາດຕ່າງໆ ເລືອດ ແລະ ສ່ວນປະກອບຂອງເລືອດ ເປັນສິ່ງຈຳເປັນສຳລັບ: ການຊ່ວຍຊີວິດຜູ້ປະສົບອຸບັດເຫດຮ້າຍແຮງ ການຜ່າຕັດທີ່ຊັບຊ້ອນ ການຮັກສາຜູ້ປ່ວຍພະຍາດເລືອດ ແລະ ມະເຮັງ ການຊ່ວຍແມ່ທີ່ເສຍເລືອດໃນເວລາເກີດລູກ ການຮັກສາເດັກນ້ອຍທີ່ຂາດເລືອດ ການຮັບມືກັບໄພພິບັດ ແລະ ສະພາບສຸກເສີນຕ່າງໆ.
ດ້ວຍເຫດນີ້ ການມີຄັງເລືອດທີ່ພຽງພໍ ແລະ ປອດໄພ ຈຶ່ງເປັນຫົວໃຈສໍາຄັນຂອງການຮັກສາຊີວິດປະຊາຊົນ ສິ່ງທ້າທາຍທີ່ຍັງຕ້ອງຮ່ວມກັນແກ້ໄຂ ເຖິງວ່າຫຼາຍປະເທດຈະມີການພັດທະນາວຽກງານເລືອດຢ່າງຕໍ່ເນື່ອງ ແຕ່ຄວາມຕ້ອງການເລືອດຍັງສູງກວ່າຄວາມສາມາດໃນການຕອບສະໜອງ ການລະດົມຜູ້ບໍລິຈາກເລືອດແບບສະໝັກໃຈ ການຄວບຄຸມຄຸນນະພາບ ແລະ ການຮັບປະກັນຄວາມປອດໄພຂອງເລືອດ ຍັງເປັນສິ່ງທ້າທາຍທີ່ຫຼາຍປະເທດກຳລັງປະເຊີນ ການບໍລິຈາກເລືອດແບບສະໝັກໃຈ ແລະ ບໍ່ຮຽກຮ້ອງຜົນຕອບແທນ ແມ່ນຮາກຖານສຳຄັນທີ່ສຸດ ຂອງການມີເລືອດທີ່ພຽງພໍ ແລະ ປອດໄພ.
ສໍາລັບ ສປປ ລາວ ຂະບວນການບໍລິຈາກເລືອດໄດ້ຮັບການຕອບຮັບຈາກທຸກພາກສ່ວນຂອງສັງຄົມ ຕັ້ງແຕ່ສູນກາງຮອດທ້ອງຖິ່ນ ຫຼາຍອົງການ ສະຖາບັນການສຶກສາ ພາກທຸລະກິດ ກອງທັບ ຕຳຫຼວດ ແລະ ປະຊາຊົນ ໄດ້ມີສ່ວນຮ່ວມຢ່າງຕໍ່ເນື່ອງ.
ໜ້າຍິນດີເປັນພິເສດ ຄື ຜູ້ບໍລິຈາກເລືອດປະຈໍາກວມເອົາເຖິງ 60% ຂອງຜູ້ບໍລິຈາກທັງໝົດ ແລະ ມີບາງຄົນໄດ້ບໍລິຈາກສະສົມສູງເຖິງ 70-80 ຄັ້ງ ເຊິ່ງສະທ້ອນເຖິງຈິດໃຈແຫ່ງການເສຍສະຫຼະຢ່າງແທ້ຈິງ ໃນປີ 2025 ປະເທດລາວຕັ້ງເປົ້າໝາຍລະດົມເລືອດໃຫ້ໄດ້ 80.400 ຖົງ ແຕ່ສາມາດລະດົມໄດ້ 72.452 ຖົງ ຫຼື ເທົ່າກັບ 90% ຂອງແຜນການ ຍັງຂາດອີກ 7.948 ຖົງ ສໍາລັບປີ 2026 ລັດຖະບານໄດ້ກຳນົດເປົ້າໝາຍໃໝ່ໃຫ້ບັນລຸ 85.000 ຖົງ ໃນນັ້ນ: ສູນກາງ 36.000 ຖົງ ທ້ອງຖິ່ນ 49.000 ຖົງ ແຂວງສະຫວັນນະເຂດ 5.500 ຖົງ ຂະນະທີ່ເປົ້າໝາຍໃນປີ 2030 ຄື ການລະດົມເລືອດໃຫ້ໄດ້ເຖິງ 120.000 ຖົງຕໍ່ປີ ແລະ ເພີ່ມອັດຕາການບໍລິຈາກເລືອດແບບສະໝັກໃຈໃຫ້ກາຍເປັນສັດສ່ວນຫຼັກຂອງປະເທດ.
ໂອກາດອັນສຳຄັນນີ້ ທ່ານ ດຣ ຈັນທະລາ ສຸກສາຄອນ ໄດ້ຮຽກຮ້ອງໃຫ້ທຸກອົງການ ແລະ ທຸກພາກສ່ວນໃນສັງຄົມ ຮ່ວມກັນສ້າງຂະບວນການບໍລິຈາກເລືອດໃຫ້ມີຄວາມຕໍ່ເນື່ອງ ແລະ ຍືນຍົງ ໂດຍເນັ້ນໜັກໃສ່ການສ້າງຄວາມຮັບຮູ້ໃຫ້ປະຊາຊົນ ການຊຸກຍູ້ຜູ້ທີ່ເຄີຍບໍລິຈາກແລ້ວໃຫ້ສືບຕໍ່ບໍລິຈາກ ການດຶງດູດຜູ້ບໍລິຈາກລາຍໃໝ່ ແລະ ການໃຫ້ສື່ມວນຊົນມີບົດບາດຫຼາຍຂຶ້ນໃນການເຜີຍແຜ່ຄວາມສຳຄັນຂອງວຽກງານເລືອດ ພ້ອມທັງສະແດງຄວາມຊົມເຊີຍ ແລະ ຂອບໃຈຢ່າງສູງຕໍ່ຜູ້ບໍລິຈາກເລືອດທຸກຄົນ ຜູ້ປຸກລະດົມ ແລະ ອົງການຕ່າງໆ ທີ່ໄດ້ຮ່ວມມືກັນຂັບເຄື່ອນວຽກງານມະນຸດສະທຳອັນສຳຄັນນີ້ ຮ່ວມກັນໃຫ້ເລືອດ ເພື່ອຕໍ່ຊີວິດ
ວັນຜູ້ບໍລິຈາກເລືອດໂລກ ບໍ່ແມ່ນພຽງແຕ່ວັນແຫ່ງການສະເຫຼີມສະຫຼອງ ຫຼື ການຂອບໃຈຜູ້ໃຫ້ເລືອດເທົ່ານັ້ນ ແຕ່ເປັນການຕອກຢ້ຳໃຫ້ສັງຄົມເຫັນວ່າ ການບໍລິຈາກເລືອດເປັນພາລະກິດຮ່ວມກັນຂອງທຸກຄົນ ເລືອດໜຶ່ງຖົງອາດຊ່ວຍຊີວິດໄດ້ຫຼາຍກວ່າໜຶ່ງຄົນ ແລະ ການບໍລິຈາກເລືອດພຽງຄັ້ງດຽວ ອາດກາຍເປັນຈຸດເລີ່ມຕົ້ນຂອງຊີວິດໃໝ່ສຳລັບໃຜບາງຄົນ. ຂໍໃຫ້ຄໍາຂວັນປີ 2026 “ໜຶ່ງຢອດເລືອດເພື່ອມະນຸດສະທຳ, ໃຫ້ເລືອດ ໃຫ້ຊີວິດ” ບໍ່ແມ່ນພຽງຄຳຂວັນໃນວັນສຳຄັນ ແຕ່ໃຫ້ກາຍເປັນຈິດສຳນຶກຂອງຄົນລາວທຸກຄົນ ໃນການຮ່ວມກັນສ້າງສັງຄົມແຫ່ງການແບ່ງປັນ ຄວາມເມດຕາ ແລະ ຄວາມຮັກຕໍ່ເພື່ອນມະນຸດ ເພື່ອໃຫ້ທຸກຊີວິດສາມາດເຂົ້າເຖິງເລືອດທີ່ປອດໄພ ຢ່າງພຽງພໍ ແລະ ທັນເວລາຕະຫຼອດໄປ.
