ພິທີເປີດໂຕຊຸດແຂ່ງຂັນຂອງສະໂມສອນ ກະຊວງປ້ອງກັນຄວາມສະຫງົບ (ປກສ) ເອັຟຊີ ເພື່ອເຂົ້າຮ່ວມການແຂ່ງຂັນບານເຕະລາຍການ ເປບຊີ ລາວລີກ 1 ລະດູການ 2020 ຈັດຂຶ້ນວັນທີ 10 ກໍລະກົດ ຜ່ານມາ ຢູ່ກົມກີລາ ປກສ ເມືອງໄຊເສດຖາ ນະຄອນຫຼວງວຽງຈັນ ໂດຍມີທ່ານ ພົນຈັດຕະວາ ຄຳສາຍ ຈັນທະວົງ ຮອງຫົວໜ້າກົມໃຫຍ່ການເມືອງ ປກສ ທ່ານ ພັນເອກ ທອງເພັດ ມະນີສະຫວັນ ຫົວໜ້າກົມກີລາ ປກສ ທ່ານ ທິບພະເນດ ແກ້ວມະນີວົງ ປະທານບໍລິສັດ ແກ້ວໂອໂຕກຣຸບ ຕົວແທນຈຳໜ່າຍລົດໃຫຍ່ ຍີ່ຫໍ້ ມາສດາ ພ້ອມດ້ວຍບັນດາຜູ້ໃຫ້ການສະໜັບສະໜູນ ຄະນະຄູເຝິກ ແລະ ນັກກິລາ ເຂົ້າຮ່ວມ.
ທ່ານ ບຸນມາ ປະຖຳມະວົງ ຫົວໜ້າຄູເຝິກສະໂມສອນ ປກສ ເອັຟຊີ ກ່າວວ່າ: ທີມຊຸດນີ້ ສ່ວນໃຫຍ່ແມ່ນກຳລັງຫຼັກຈາກກຳລັງ ປກສ ແລະ ອີກຈຳນວນໜຶ່ງໄດ້ຈາກພາກສ່ວນນອກມາປະກອບ ສຳລັບການກະກຽມທີມແມ່ນມີໄລຍະສັ້ນ ເນື່ອງຈາກການລະບາດຂອງພະຍາດໂຄວິດ-19 ເຮັດໃຫ້ທີມ ປກສ ໄດ້ໂຈະການເຄື່ອນໄຫວເຝິກຊ້ອມ ຈາກນັ້ນຈຶ່ງໄດ້ກັບມາເຝິກຊ້ອມໄດ້ໜຶ່ງເດືອມເຕັມ ແລະ ມີຄວາມພ້ອມເຕັມຮ້ອຍ ເພື່ອຈະເຂົ້າຮ່ວມສ້າງຜົນງານໃນລາວລີກ 1 ແນວໃດກໍຕາມ ແຕ່ລາວລີກ 1 ປີນີ້ ມີຫຼາຍສະໂມສອນໄດ້ກະກຽມຄວາມທີມມາດີເຊັ່ນດຽວກັນ ຈຶ່ງເປັນສິ່ງທີ່ທ້າທາຍຕໍ່ການຍາດແຊັມ.
ທ່ານ ທິບພະເນດ ແກ້ວມະນີວົງ ກ່າວວ່າ: ຊຸດແຂ່ງຂັນ ປກສ ມີ 2 ສີ ຄື: ສີແດງ ເປັນຊຸດແຂ່ງໃນບ້ານ ແລະ ສີຟ້າ ເປັນຊຸດໄປຢາມຄູ່ແຂ່ງຂັນ ເຊິ່ງທັງ 2 ສີມີຄວາມເປັນພິເສດໃນຮູບແບບຂອງລົດມາສດາ ແລະ ມີລັກສະນະສີສັນ ສະຫງົບນິ້ງ ແລະ ເຢືອກເຢັນ ພວກເຮົາໄດ້ມີສ່ວນຮ່ວມຄຽງບ່າຄຽງໄຫຼ່ກັບທັບນັກກີລາບານເຕະ ປກສ ເອັຟຊີ ມາຕະຫຼອດ ເຊິ່ງເດັ່ນທີ່ສຸດແມ່ນປີ 2012 ປກສ ສາມາດຄວ້າແຊັມບານເຕະ ລາວລີກ 1 ສຳລັບທີມຊຸດນີ້ ເປັນນັກກີລາຊຸດໃໝ່ເກືອບໝົດທີມ ເປັນສິ່ງທ້າທາຍໃຫ້ທີມທີ່ຈະສ້າງຄວາມແປກໃໝ່ ແຕ່ກໍເຊື່ອໝັ້ນວ່ານັກກີລາທຸກຄົນມີຄວາມຫ້າວຫັນເຝິກຊ້ອມ ເຊິ່ງພວກເຮົາມີຄວາມດີໃຈ ແລະ ພ້ອມຈະສົ່ງເສີມເຕັມທີ່.
ຫຼັງຈາກເປີດໂຕຊຸດແຂ່ງຂັນທ້າຍອາທິດຜ່ານມາ ສະໂມສອນ ປກສ ເອັຟຊີ ກໍໄດ້ລົງສະໜາມແຂ່ງຂັນນັດທຳອິດ ດ້ວຍການເອົາຊະນະສະໂມສອນ ວຽງຈັນ ເອັຟຊີ 2-1 ປະຕູ ເກັບ 3 ຄະແນນ ຈັ້ງອັນດັບທີ 1 ຂອງກຸ່ມ ໃນນັດເປີດລະດູການ.