ການແຂ່ງຂັນບານເຕະ ເປບຊີ ລາວລີກ 1 ປະຈຳປີ 2020 ນັດເປີດສະໜາມວັນທີ 11 ກໍລະກົດ 2020 ຢູ່ສະໜາມກິລາແຫ່ງຊາດ ຫຼັກ 16 (ສະໜາມໃນ) ເປັນການພົບກັນລະຫວ່າງມາສເຕີ້ເຊເວັ້ນ ເອັຟຊີ ຮອງແຊັມໃນປີຜ່ານມາ ພົບກັບ ລາວໂຕໂຢຕາ ເອັຟຊີ ແຊ້ມເກົ່າ 4 ສະໄໝ ໂດຍນັດດັ່ງກ່າວ ທັງ 2 ທີມໄດ້ສົ່ງຜູ້ຫຼິ້ນຕົວຫຼັກລົງສະໜາມ ມາສເຕີ້ເຊເວັ້ນ ເອັຟຊີ ນຳທີມໂດຍຜູ້ຮັກສາປະຕູນຳ SHOTO WADA ສັນຊາດຍີ່ປຸ່ນ (ຫົວໜ້າທີມ) ຂະນະທີ່ ລາວໂຕໂຢຕາ ເອັຟຊີ ນຳທີມໂດຍ ພິທັກ ກອງມາທິລາດ (ຫົວໜ້າທີມ).
ເລີ່ມເກມການແຂ່ງຂັນທັງ 2 ທີມ ໄດ້ພັດປ່ຽນກັນເປີດເກມບຸກ ແລະ ຕັ້ງຮັບໃສ່ກັນຢ່າງສຸດມ່ວນ ຈົນມາຮອດນາທີ 38 ເປັນທາງດ້ານ ລາວໂຕໂຢຕາ ສາມາດຍິງປະຕູອອກນຳມາສເຕີ້ເຊເວັ້ນ ໄປກ່ອນ 1-0 ປະຕູ ຈາກ ໂລ້ ວິພັດ ໂດຍເກມແຂ່ງຂັນທຳທ່າຈະຈົບລົງດ້ວຍຜົນປະຕູດັ່ງກ່າວ ຈົນມາຮອດນາທີສຸດທ້າຍຂອງການຕໍ່ເວລາ 90+4 ເປັນທາງ ກຽງທະວີສັກ ໄຊຊະນະປັນຍາ ຂອງມາສເຕີ້ເຊເວັ້ນ ເຂົ້າໄປຍິງຕາມຕີສະເໝີ ລາວໂຕໂຢຕາ 1-1 ປະຕູ ໄດ້ສຳເລັດ ເຮັດໃຫ້ຈົບເກມການແຂ່ງຂັນ ທັງສອງທີມສະເໝີກັນ ແລະ ແບ່ງກັນໄປທີມລະ 1 ຄະແນນ ຂະນະທີ່ຜົນການແຂ່ງຂັນອີກຄູ່ທີ່ແຂ່ງຂັນໃນເວລາດຽວກັນ ຢູ່ສະໜາມກີລາແຫ່ງຊາດ ຫຼັກ 16 (ສະໜາມນອກ) ຊ້າງນ້ອຍ ສະເໝີ ເອສະຣາ 1-1 ສຳລັບຜົນການແຂ່ງຂັນຄູ່ວັນທີ 12 ຢູ່ສະໜາມກີລາແຫ່ງຊາດ ຫຼັກ 16 (ສະໜາມໃນ) ປກສ ເອັຟຊີ ຊະນະ ວຽງຈັນ ເອັຟຊີ ຈາກແຂວງວຽງຈັນ 2-1 ປະຕູ.
ສ່ວນຕາຕະລາງການແຂ່ງຂັນນັດທີ 2 ມາສເຕີ້ເຊເວັ້ນ ຈະແຂ່ງຂັນວັນທີ 25 ກໍລະກົດ 2020 ເວລາ 16:00 ໂມງ ພົບກັບ ຊ້າງນ້ອຍ ເອັຟຊີ ທີ່ສະໜາມກີລາແຫ່ງຊາດ ຫຼັກ 16 (ສະໜາມນອກ) ລາວໂຕໂຢຕາ ເອັຟຊີ ຈະແຂ່ງຂັນນັດທີ 2 ວັນທີ 18 ກໍລະກົດ 2020 ເວລາ 16:00 ໂມງ ພົບກັບ ຊ້າງນ້ອຍ ເອັຟຊີ ແຂ່ງຂັນທີ່ສະໜາມກີລາແຫ່ງຊາດ ຫຼັກ 16 (ສະໜາມໃນ).