ທ່ານ ພຸດທະສັກ ສຸກອາລຸນ ປະທານສະໂມສອນຍິງປືນ IPSC ລາວ ຜູ້ອຳນວຍການສະໜາມເຝີກຊ້ອມກີລາຍິງປືນ 5 ເມສາ ໃຫ້ສຳພາດເມື່ອບໍ່ດົນມານີ້ວ່າ: ຫຼັງຈາກສະໂມສອນຍິງປືນ IPSC ລາວ ສະຫະພັນຍິງປືນແຫ່ງຊາດໄດ້ຮັບໂອກາດ ແລະ ໄດ້ຮັບສິດຈາກສະມາຄົມຍິງປືນ IPSC ໂລກ ໃຫ້ສາມາດສົ່ງນັກກີລາເຂົ້າຮ່ວມແຂ່ງຂັນລາຍການຊີງແຊັມໂລກ ເປັນຄັ້ງທີ 2 ສະໂມສອນ IPSC ລາວ ກໍໄດ້ຄັດເລືອກນັກກີລາຈາກ 14 ຄົນ ຍິງ 1 ຄົນ ໂດຍການຈັດແຂ່ງຂັນ 4 ຄັ້ງ ເລີ່ມແຕ່ເດືອນມີນາ-ເຖິງວັນທີ 3 ກໍລະກົດ 2020 ໂດຍກຳນົດເອົາ 10 ສະໜາມແຂ່ງຂັນ ກໍຄື ສະໜາມລະດັບສັ້ນ ກາງ ແລະ ຍາວ ເຊິ່ງນັກກີລາທີ່ເຂົ້າຮ່ວມແຂ່ງຂັນໄດ້ຍິງປືນ ເພື່ອສະສົມຄະແນນຜູ້ລະ 300 ລູກ.
ຜ່ານການແຂ່ງຂັນສາມາດຄັດເລືອກນັກກີລາດີເດັ່ນໄດ້ 8 ຄົນ ຄື: ທ້າວ ສຸນັນ ວັດທະນະບູນ ທ້າວ ທຽນຢີ້ ທ້າວ ຫົງພະຈັນ ດາລາວົງ ທ້າວ ສິງຄຳ ສີປະເສີດ ທ້າວ ສຸພົນສາ ນິຍົມ ທ້າວ ຕົ້ນຄຳ ເມືອງມະນີ (ຮຸ່ນເຍົາວະຊົນ) ທ້າວ ອາໂນໄທ ເມືອງມະນີ ແລະ ທ້າວ ອາພານະກອນ ແກ້ວໄຊຍະຈັກ ສຳລັບການແຂ່ງຂັນຊີງແຊັມໂລກ ຄາດວ່າຈະມີຂຶ້ນທ້າຍປີນີ້ ຢູ່ປະເທດໄທ ໂດຍຈະມີນັກກີລາຫຼາຍກວ່າ 500 ຄົນເຂົ້າຮ່ວມຊີງໄຊ.