ຖືວ່າສຳເລັດລົງດ້ວຍດີ ບັ້ນເລືອກຕັ້ງ ສະມາຊິກສະພາແຫ່ງຊາດ ຊຸດທີ X ແລະ ສະມາຊິກສະພາປະຊາຊົນແຂວງ ນະຄອນຫຼວງ ຊຸດທີ V ເຊິ່ງເຫັນໄດ້ວ່າບັນຍາກາດໃນມື້ເລືອກຕັ້ງ ວັນທີ 22 ກຸມພາ ຜ່ານມາ ປະຊາຊົນລາວບັນດາເຜົ່າ ຜູ້ທີ່ມີສິດເລືອກຕັ້ງ ທັງຢູ່ພາຍໃນ ແລະ ຕ່າງປະເທດ ຕາງກໍຕື່ນຕົວໃນການໄປໃຊ້ສິດຂອງຕົນຢ່າງເຕັມທີ່ ເພື່ອເລືອກເອົາຜູ້ແທນທີ່ມີຄວາມຮູ້ຄວາມສາມາດເຂົ້າໄປໃນສະພາ ເພື່ອເປັນຕົວແທນແຫ່ງສິດຜົນປະໂຫຍດຂອງປະຊາຊົນລາວ.
ບັນຍາກາດໃນມື້ເລືອກຕັ້ງຜ່ານມາເຫັນວ່າຊາວໜຸ່ມຜູ້ທີ່ມີສິດປ່ອນບັດໄດ້ຖືຄວາມສຳຄັນຕໍ່ວຽກງານດັ່ງກ່າວ ໂດຍມີເປົ້າໝາຍໃນການເລືອກເອົາຜູ້ແທນທີ່ມີຄວາມຮູ້ຄວາມສາມາດ ຄົບຖ້ວນຕາມມາດຖານເງື່ອນໄຂເຂົ້າໃນສະພາ.
ທ່ານ ວິໄລ ວົງໄຊ ເລຂາພັກບ້ານ ນາຍບ້ານຮ່ອງໄກ່ແກ້ວ ໄດ້ໃຫ້ສຳພາດຕໍ່ສື່ມວນຊົນວ່າ: ການອອກມາໃຊ້ສິດໃນຄັ້ງນີ້ ບໍ່ພຽງແຕ່ແມ່ນການປະຕິບັດພັນທະຂອງພົນລະເມືອງລາວເທົ່ານັ້ນ ແຕ່ຍັງເປັນການສະແດງອອກເຖິງຄວາມສາມັກຄີ ແລະ ຄວາມເຊື່ອໝັ້ນຕໍ່ກັບລະບອບການປົກຄອງ ເພື່ອຮ່ວມກັນສ້າງສາພັດທະນາປະເທດຊາດໃຫ້ມີຄວາມຈະເລີນຮຸ່ງເຮືອງໃນຕໍ່ໜ້າ “ພວກເຮົາຕັດສິນໃຈເລືອກເອົາຜູ້ທີ່ມີມາດຖານເງື່ອນໄຂຄົບຖ້ວນທີ່ສູງກວ່າໝູ່ ເພື່ອເປັນປາກເປັນສຽງແທນປະຊາຊົນຢ່າງແທ້ຈິງ.”
ທ້າວ ສິນໄຊ ສີສົມສຸກ ປະຊາຊົນບ້ານຈອມມະນີ ເມືອງໄຊເສດຖາ ນະຄອນຫຼວງວຽງຈັນ ໄດ້ໃຫ້ສຳພາດວ່າ: ຕົນເອງເປັນປະຊາຊົນຢູ່ບ້ານຈອມມະນີ ສຳລັບມື້ນີ້ ແມ່ນຮູ້ສຶກດີໃຈ ແລະ ມີຄວາມພາກພູມໃຈຫຼາຍ ທີ່ໄດ້ມາໃຊ້ສິດເລືອກຕັ້ງ ເຊິ່ງຖືວ່າເປັນຄັ້ງທຳອິດໃນຊີວິດຂອງນ້ອງເລີຍ ເພາະມັນຄືການສະແດງອອກເຖິງຄວາມຮັບຜິດຊອບຂອງພວກເຮົາໃນຖານະພົນລະເມືອງລາວ.”
ສຳລັບນ້ອງເອງ ການຕັດສິນໃຈຄັ້ງນີ້ແມ່ນເນັ້ນໃສ່ການເລືອກເອົາຜູ້ແທນທີ່ມີຄວາມຮູ້ ຄວາມສາມາດ ແລະ ມີເງື່ອນໄຂຄົບຖ້ວນຕາມທີ່ກົດໝາຍກຳນົດໄວ້ ນ້ອງເຊື່ອໝັ້ນວ່າ ຜູ້ແທນທີ່ພວກເຮົາເລືອກຈະເຂົ້າໄປເປັນຕົວແທນທີ່ແທ້ຈິງ ທີ່ເຮັດວຽກເພື່ອຜົນປະໂຫຍດຂອງປະຊາຊົນ ແລະ ຊ່ວຍສ້າງສາພັດທະນາປະເທດຊາດໃຫ້ຈະເລີນກ້າວໜ້າ.
ນາງ ສົມໄພ ຈົງວິໄຊ ປະຊາຊົນບ້ານຈອມມະນີ ໄດ້ໃຫ້ສຳພາດວ່າ:ສ່ວນຕົວແມ່ນຮູ້ສຶກດີໃຈຫຼາຍທີ່ໄດ້ມາໃຊ້ສິດຂອງຕົນເອງໃນການເລືອກຕັ້ງຜູ້ແທນເຊິ່ງຄັ້ງນີ້ຖືວ່າເປັນຄັ້ງທີ 2 ແລ້ວ ທີ່ຂ້າພະເຈົ້າໄດ້ມີສ່ວນຮ່ວມໃນການເລືອກເອົາຜູ້ທີ່ຈະມາເປັນຜູ້ນຳຂອງປະເທດເຮົາ.
ພ້ອມນັ້ນ ຂ້າພະເຈົ້າຢາກໄດ້ຜູ້ແທນທີ່ມີຄວາມຮູ້ຄວາມສາມາດ ຜູ້ທີ່ຈະມານຳພາປະເທດຊາດຂອງເຮົາໃຫ້ກ້າວໄກ ແລະ ສ້າງການພັດທະນາໃຫ້ຍິ່ງໆຂຶ້ນໄປກວ່າເກົ່າ ສິ່ງທີ່ຢາກຝາກນຳ ສສຊ ກໍຄື ສສ ນວ ຢາກໃຫ້ເພິ່ນສຸມໃສ່ພັດທະນາປະເທດຊາດບ້ານເມືອງໃຫ້ດີຂຶ້ນເລື້ອຍໆ ແຕ່ສິ່ງທີ່ສຳຄັນທີ່ສຸດແມ່ນຊີວິດການເປັນຢູ່ຂອງປະຊາຊົນ ຢາກໃຫ້ເພິ່ນເອົາໃຈໃສ່ເຮັດໃຫ້ຊີວິດການເປັນຢູ່ຂອງພໍ່ແມ່ປະຊາຊົນດີຂຶ້ນກວ່າເກົ່າ.
