ຄະນະບໍລິຫານງານພັກແຂວງສະຫວັນນະເຂດ ຈະສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຜູ້ແທນທົ່ວປະເທດຄັ້ງທີ XII ຂອງພັກ ເພື່ອຍົກສູງບົດບາດການນຳພາຂອງຄະນະພັກແຕ່ລະຂັ້ນ ສ້າງແຂວງສະຫວັນນະເຂດ ເປັນຫົວໜ່ວຍຍຸດທະສາດຢ່າງໜັກແໜ້ນ ຕັ້ງໜ້າສ້າງເສດຖະກິດເອກະລາດ ເປັນເຈົ້າຕົນເອງ.
ສະຫາຍ ບຸນໂຈມ ອຸບົນປະເສີດ ກຳມະການສູນກາງພັກ ເລຂາຄະນະບໍລິຫານງານພັກແຂວງສະຫວັນນະເຂດ ໃຫ້ສຳພາດໃນໂອກາດເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກ ວ່າ: ກ່ຽວກັບການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຜູ້ ແທນທົ່ວປະເທດ ຄັ້ງທີ XI ຂອງພັກ ຢູ່ແຂວງສະ ຫວັນນະເຂດ ພວກເຮົານັ້ນ ອັນພົ້ນເດັ່ນທີ່ສຸດແມ່ນ ຄະນະນະບໍລິຫານງານພັກແຂວງໄດ້ນຳເອົາມະຕິດັ່ງກ່າວໄປຜັນຂະຫຍາຍເປັນໂຄງການລະອຽດ ໂດຍສະເພາະແມ່ນເນັ້ນໃສ່: ການແກ້ໄຂຄວາມທຸກຍາກຂອງປະຊາຊົນ: ສາມາດລົບລ້າງ 5 ເມືອງ ໃຫ້ເປັນເມືອງພົ້ນທຸກ ການຜະລິດເປັນສິນຄ້າ: ສົ່ງເສີມການຜະລິດເຂົ້າເປັນສິນຄ້າ ເຊິ່ງສະເລ່ຍໄດ້ເກືອບ 1 ລ້ານໂຕນຕໍ່ປີ ການປູກໄມ້ອຸດສາຫະກຳ ເພື່ອສະໜອງໃຫ້ແກ່ໂຮງງານຜະລິດເຈ້ຍ Sun Paper ຢູ່ແຂວງສະຫວັນນະເຂດ ເຊິ່ງປັດຈຸບັນພວກເຮົາສະໜອງໄດ້ປະມານ 2 ແສນໂຕນຕໍ່ປີ ໃນໄລຍະ 5 ປີຜ່ານມາ ເສດຖະກິດຂອງແຂວງຂະຫຍາຍຕົວສະເລ່ຍຢູ່ທີ່ 8% ແລະ ການເກັບລາຍຮັບງົບປະມານແມ່ນລື່ນແຜນການເກືອບ 150%.
ໃນໄລຍະ 5 ປີຜ່ານມາ ບົດຮຽນໃຫຍ່ແມ່ນການເຮັດໃຫ້ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ຂອງແຂວງ ກົມກຽວກັບແຜນພັດທະນາເສດຖະກິດ-ສັງຄົມແຫ່ງຊາດ ພວກເຮົາໄດ້ຫັນມະຕິໃຫ້ກາຍ ເປັນໂຄງການລະອຽດ ເນັ້ນການຜະລິດເປັນສິນຄ້າ ແລະ ການແກ້ໄຂຈຸດສຸມປະຊາຊົນທີ່ທຸກຍາກໃນເຂດຫ່າງໄກສອກຫຼີກ.
ສະຫາຍ ບຸນໂຈມ ອຸບົຍປະເສີດ ກ່າວຕື່ມວ່າ: ໃນນາມຕາງໜ້າໃຫ້ອົງຄະນະພັກແຂວງສະຫວັນນະເຂດ ພວກເຮົາມີຄວາມພາກ ພູມໃຈເປັນຢ່າງຍິ່ງ ພາຍຫຼັງສຳເລັດກອງປະຊຸມໃຫຍ່ ຄັ້ງທີ XII ນີ້ ພວກເຮົາຈະນຳເອົາເນື້ອໃນຈິດໃຈ ບົດລາຍງານການເມືອງ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X ໄປສົມທົບກັບມະຕິຂອງແຂວງ ຈັດຕັ້ງຜັນຂະຫຍາຍນັບແຕ່ຊັ້ນແຂວງ ເມືອງ ແລະ ຮາກຖານບ້ານ ເພື່ອເຮັດໃຫ້ການຈັດຕັ້ງປະຕິບັດແຕ່ລະຂົງເຂດວຽກງານບັນລຸຕາມຈຸດປະສົງ ແລະ ລະດັບຄາດໝາຍ ພ້ອມມີປະສິດທິພາບ ແລະ ປະສິດທິຜົນສູງ ຕາມຄຳຂວັນ ແລະ ເປົ້າໝາຍຂອງແຂວງຄື ຍົກສູງບົດບາດການນຳພາຂອງຄະນະພັກແຕ່ລະຂັ້ນ ເພີ່ມທະວີສ້າງແຂວງສະຫວັນນະເຂດ ເປັນຫົວໜ່ວຍຍຸດທະສາດຢ່າງໜັກແໜ້ນ ຕັ້ງໜ້າສ້າງເສດຖະກິດເອກະລາດ ເປັນເຈົ້າຕົນເອງ ສຸມໃສ່ແກ້ໄຂຄວາມທຸກຍາກຂອງປະຊາຊົນໃຫ້ໄດ້ໂດຍພື້ນຖານ ພາຍໃນປີ 2030.
ປັດຈຸບັນ ແຂວງສະຫວັນນະເຂດ ມີ 14 ເມືອງ ແລະ 1 ນະຄອນ ມີປະຊາກອນປະມານ 1.114.000 ຄົນ ພວກເຮົາຍັງມີເມືອງທຸກ ຍາກຢູ່ 4 ເມືອງ ແລະ ຄອບຄົວທຸກຍາກປະມານ 49.000 ຄອບຄົວ ເຊິ່ງເປັນວຽກບຸລິມະສິດທີ່ຕ້ອງໄດ້ເລັ່ງແກ້ໄຂ ພວກເຮົາຈະສ້າງແຂວງສະຫວັນນະເຂດ ໃຫ້ເປັນແຂວງອຸດສາ ຫະກຳ-ກະສິກຳທີ່ທັນສະໄໝໃນຕໍ່ໜ້າ.”
