ໂດຍ: ສ.ຣາຊະສີ
ບົດສຳພາດ
ໃນໄລຍະຜ່ານມາ ໝາກໄມ້ ແລະ ພືດຜັກ ຈຳນວນຫຼາຍໃນບ້ານຫ້ວຍອາ ວັງຊ້າງ ເມືອງລະມາມ ແຂວງເຊກອງ ມັກຖືກປະໃຫ້ເໜົ່າເປື່ອຍໄປຕາມລະດູການ ແຕ່ມື້ນີ້ ສິ່ງທີ່ເຄີຍເປັນ “ສິ່ງທີ່ປ່ອຍປະໃຫ້ຮ່ຽວ ແລະ ເໜົ່າເປື່ອຍນັ້ນ” ກັບກາຍເປັນ “ໂອກາດ” ໃນການແປຮູບອາຫານເກັບໄວ້ບໍລິໂພກໃນໄລຍະຍາວ ພ້ອມຍັງຈະຊ່ອງເປັນອີກປຫຼ່ງລາຍຮັບໃຫ້ກັບຄອບຄົວປະຊາຊົນ ສິ່ງດັ່ງກ່າວນັ້ນ ໄດ້ມາຈາກຈາກການດຳເນີນງານຂອງ ໂຄງການ AFN2 ທີ່ເຂົ້າມາສ້າງການປ່ຽນແປງໃຫ້ຊຸມຊົນທີ່ເຫັນໄດ້ຢ່າງຈະແຈ້ງ.
ນາງ ມະນີ ສຸກຄຳ ປະຊາຊົນບ້ານຫ້ວຍອາ ວັງຊ້າງ ແລະ ຜູ້ອຳນວຍຄວາມສະດວກຂັ້ນບ້ານໃນໂຄງການດັ່ງກ່າວໄດ້ໃຫ້ສຳພາດວ່າ: ໂຄງການ AFN2 ໄດ້ສ້າງຜົນກະໂຫຍດໂດຍກົງໃຫ້ກັບຄອບຄົວຂອງປະຊາຊົນພາຍໃນບ້ານ ເຊິ່ງແຕ່ກ່ອນ ໝາກໄມ້ ກັບ ພືດຜັກທີ່ປູກໄດ້ ກິນບໍ່ໝົດ ຫຼື ກິນບໍ່ທັນ ກໍປ່ອຍໃຫ້ເໜົ່າເປື່ອຍ ພໍໄດ້ເຂົ້າໂຄງການແລ້ວພວກເຮົາຮູ້ຈັກແປຮູບອາຫານ ເກັບໄວ້ກິນໄດ້ດົນ ແລະ ຍັງສາມາດນຳໄປຂາຍໄດ້ ເຊິ່ງຈະເປັນຊ່ອງທາງທີ່ສາມາດສ້າງລາຍຮັບເພີ່ມເຂົ້າໃນຄອບຄົວໄດ້.
ອີກດ້ານໜຶ່ງ ນາງ ຈັນໂທ ມົງຄຸນວິໄລ ຮອງຜູ້ປະສານງານໂຄງການກະສິກຳ ແລະ ສິ່ງແວດລ້ອມ ເມືອງລະມາມ ເຜີຍວ່າ: ໂຄງການດັ່ງກ່າວ ໄດ້ສ້າງຄວາມເຂັ້ມແຂງໃຫ້ກັບແມ່ຍິງຖືພາ ແມ່ລູກອ່ອນ ແລະ ເດັກນ້ອຍຕ່ຳກວ່າ 2 ປີ ໂດຍການໃຫ້ທຶນສົ່ງເສີມການປູກ ແລະ ລ້ຽງສັດ ເຊິ່ງໃນປີ 2024 ຜ່ານມາ ໄດ້ສະໜອງທຶນໃຫ້ປະຊາຊົນໃນກຸ່ມເປົ້າໝາຍ 2-2,5 ລ້ານກີບຕໍ່ຄອບຄົວ ເພື່ອເຮັດສວນຄົວປະຈຳເຮືອນ ນອກນັ້ນໂຄງການຍັງໄດ້ເອົາໃຈໃສ່ ໃນການເຝິກຮົມຂອງເອື້ອຍນ້ອງຍິງໃນການແປຮູບອາຫານໃຫ້ເປັນຜະລິດຕະພັນ ເພື່ອສາມາດເກັບໄວ້ກິນໄດ້ດົນ ໂດຍອີງໃສ່ວັດຖຸດີບທີ່ມີພາຍໃນບ້ານ ຖ້າຜະລິດຫຼາຍກໍສາມາດຈຳໜ່າຍພາຍໃນບ້ານ ແລະ ຊຸມຊົນໃກ້ຄຽງ.
ທ່ານ ໂດລາ ໄຊຍະລົບ ຜູ້ອຳນວຍຄວາມສະດວກໂຄງການ AFN ປະຈຳເມືອງລະມາມ ເນັ້ນວ່າ: ຜົນປະໂຫຍດຂອງໂຄງການສາມາດເຫັນໄດ້ຈາກຊີວິດຈິງຂອງປະຊາຊົນໃນກຸ່ມເປົ້າໝາຍ ບໍ່ແມ່ນພຽງແຕ່ໃຫ້ຊາວບ້ານມີອາຫານກິນພຽງພໍເທົ່ານັ້ນ ແຕ່ຢາກໃຫ້ຄອບຄົວໃນບ້ານມີລາຍຮັບເພີ່ມຂຶ້ນຢ່າງໜ້ອຍ 20% ແລະ ສາມາດຢູ່ໄດ້ດ້ວຍຕົນເອງໃນລະຍະຍາວ.
ສຳລັບໂຄງການ AFN ໄດ້ເລີ່ມຈັດຕັ້ງປະຕິບັດມາຢູ່ເມືອງແຫ່ງນີ້ແຕ່ປີ 2019 ໃນເປົ້າໝາຍມີ 25 ບ້ານ ແຕ່ການຈັດຕັ້ງປະຕິບັດກິດຈະກໍາແປຮູບອາຫານມີທັງໝົດ 5 ບ້ານຄື: ບ້ານກະຊັງກາງ ບ້ານນໍ້າຫຽງ ບ້ານຫ້ວຍອາວັງຊ້າງ ບ້ານຕຸ່ຍລານ, ບ້ານລະວິລໍາພັນ ໃນປີ 2025 ເຊິ່ງເປັນຄັ້ງທໍາອິດໃນການຈັດກິດຈະກໍາດັ່ງກ່າວ ມີຜູ້ເຂົ້າຮ່ວມທັງໝົດ 15 ຄົນ ຊາຍ 3 ຄົນ ເປົ້າໝາຍຫຼັກຂອງໂຄງການແມ່ນຢາກຊ່ວຍໃຫ້ຊຸມຊົນ ກໍຄື ປະຊາຊົນ ທີ່ຢູ່ໃນບ້ານເປົ້າໝາຍມີລາຍຮັບ ເພີ່ມຂຶ້ນ 20% ສາມາດຮັບປະກັນທາງດ້ານສະບຽງອາຫານ ມີອາຫານກິນທີ່ພຽງພໍໃນທຸກລະດູການ.
ກ່ອນຈະມາຈັດຕັ້ງປະຕິບັດໂຄງການນີ້ ແມ່ນໄດ້ວາງແຜນບ້ານ ໃນນັ້ນ ມີຜູ້ເຂົ້າຮ່ວມຢ່າງໜ້ອຍ 80% ຫຼັງຈາກມີການວາງແຜນບ້ານແລ້ວຍັງມີການຝຶກອົບຮົມກ່ຽວກັບວຽກງານໂພຊະນາການໃຫ້ກຸ່ມເປົ້າໝາຍຄົວເຮືອນທີ່ມີເດັກຕໍ່າກວ່າ 2 ປີ ຫຼື ເດັກຕໍ່າກວ່າ 1.000 ວັນ ດັ່ງນັ້ນ ພວກເຮົາກໍໄດ້ສະໜັບສະໜູນງົບປະມານໃຫ້ຄົວເຮືອນໜຶ່ງ 2,5 ລ້ານກີບ ທີ່ນອນໃນກຸ່ມເປົ້າໝາຍ.
ນອກຈາກ ວຽກໂພຊະນາການແລ້ວພວກເຮົາຍັງເວົ້າເຖິງວຽກກະສິກໍາ ໃຫ້ເຂົາເຈົ້າສ້າງສວນຄົວ ຫຼື ປູກ-ລ້ຽງຂະໜາດນ້ອຍສໍາລັບການບໍລິໂພພາຍໃນຄົວເຮືອນ ສົ່ງເສີມດ້ານການກະສິກໍາແລ້ວ ຍັງໄດ້ສົ່ງເສີມດ້ານການຮັກສາ ແລະ ໜອງອາຫານເຊັ່ນ: ການແປຮູບອາຫານ ເຊິ່ງສາເຫດການແປຮູບອາຫານກໍເນື່ອງຈາກພາຍໃນບ້ານຂອງເມືອງລະມານ ມີຫຼາຍບ້ານທີ່ມີພືດຜັກບາງລະດູ ເວລາໝົດລະດູນັ້ນໆກໍຈະບໍ່ມີອາຫານການກິນ.
ສະນັ້ນ ການແປຮູບອາຫານຈະເປັນສ່ວນໜຶ່ງເຮັດໃຫ້ຊຸມຊົນສາ ມາດສະໜອງອາຫານໄວ້ໄດ້ຍາວນານມີອາຫານທີ່ຫຼາກຫຼາຍ ແລະ ໄດ້ບໍລິໂພກທຸກລະດູການ ພ້ອມນັ້ນ ຢູ່ພາຍໃນບ້ານລະບົບນໍ້າລິນຍັງບໍ່ພຽງພໍເທື່ອ ກ່ອນມີໂຄງການ AFN 2 ເຂົ້າມາກໍໄດ້ມີການສໍາຫຼວດເບິ່ງຫຼາຍຄົວເຮືອນ ມີຫຼາຍຄົວເຮືອນທີ່ບໍ່ປູກພືດພັກຕ່າງໆ ຫຼັງຈາກຊຸມຊົນໄດ້ຂົ້າໃຈກ່ຽວກັບຄວາສໍາຄັນໃນການປູກ ແລະ ການລ້ຽງ ຈາກໂຄງການ AFN ເພື່ອໂພຊະນາການບໍລິໂພກນັ້ນເຫັນໄດ້ວ່າແຕ່ລະຄົວເຮືອນ 90% ມີການປູກການລ້ຽງຂະໜາດນ້ອຍເກີດຂຶ້ນຫຼາຍ.
ຈາກການສົ່ງເສີມຄວາມຮູ້ ການຝຶກອົບຮົມ ແລະ ການສະໜອງທຶນຢ່າງເໝາະສົມ ໂຄງການ AFN2 ໄດ້ສ້າງຜົນປະໂຫຍດທີ່ຈັບຕ້ອງໄດ້ໃຫ້ກັບປະຊາຊົນບ້ານຫ້ວຍອາວັງຊ້າງ ບໍ່ພຽງແຕ່ອາຫານທີ່ພຽງພໍ ແຕ່ເປັນອະນາຄົດທີ່ມີຄວາມຫວັງຫຼາຍຂຶ້ນ.