ສະໂມສອນ ລາວໂຕໂຢຕ້າ ເອັບຊີ ເປີດຕົວສະໂມສອນ ແລະ ຜູ້ໃຫ້ການສະໜັບສະໜູນລະດູການ 2020 ພ້ອມທັງຕັ້ງເປົ້າປ້ອງກັນແຊັມລີກສູງສຸດຂອງ ສປປ ລາວ ສະໄໝທີ 5 ການແຂ່ງຂັນບານເຕະລາຍການ ເປບຊີ ລາວລີກ 1 ລະດູການ 2020 ທີ່ເປີດສາກຂຶ້ນໃນອາທິດຜ່ານມານີ້.
ວັນທີ 9 ກໍລະນີ 2020 ຢູ່ບໍລິສັດ ລາວໂຕໂຢຕ້າບໍລິການ ຈຳກັດ ບ້ານທົ່ງຂັນຄຳ ເມືອງຈັນທະບູລີ ນະຄອນຫຼວງວຽງຈັນ ໄດ້ມີພິທີເປີດຕົວນັກເຕະ ແລະ ເຊັນສັນຍາກັບຜູ້ສະໜັບສະໜູນລະດູການ 2020 ໂດຍມີທ່ານ ຢາສຸໂອະ ພິລາພັນເດຊ ຮອງປະທານສະໂມສອນ ລາວໂຕໂຢຕ້າ ເອັບຊີ ທ່ານ ປະສາດໄຊ ພິລາພັນເດຊ ຜູ້ອຳນວຍການບໍລິສັດ ໂຕໂຢຕ້າ ຈຳກັດ ພ້ອມດ້ວຍຜູ້ສະໜັບສະໜູນຕ່າງໆ ຄູເຝິກ ນັກກີລາ ແລະ ສື່ມວນຊົນ ເຂົ້າຮ່ວມ.
ທ່ານ ຢາສຸໂອະ ພິລາພັນເດຊ ກ່າວວ່າ: ລາວໂຕໂຢຕ້າ ເອັບຊີ ພ້ອມແລ້ວສຳລັບການປ້ອງກັນແຊັມ ເປບຊີ ລາວລີກ 1 ລະດູການ 2020 ເຊິ່ງພາຍຫຼັງປ້ອງກັນແຊັມລີກສູງສຸດຂອງລາວ ປີ 2019 (ສະໄໝທີ 4) ພວກເຮົາກໍໄດ້ສືບຕໍ່ເຄື່ອນໄຫວ ແລະ ເກັບຕົວເຝິກຊ້ອມ ເພື່ອເຂົ້າຮ່ວມ ເອເອັບຊີ ຄັບ 2020 ທີ່ຈັດຂຶ້ນປີຜ່ານມາ ກ່ອນທີ່ຈະຢຸດການເຝິກຊ້ອມໃນຕົ້ນປີ 2020 ເພື່ອຈັດຕັ້ງປະຕິບັດຕາມຄຳສັ່ງ ແລະ ແຈ້ງການຂອງລັດຖະບານ ເພື່ອປ້ອງກັນພະຍາດໂຄວິດ-19 ແຕ່ໄດ້ຈັດໃຫ້ນັກກີລາເຝິກຊ້ອມເປັນປົກກະຕິຢູ່ເຮືອນແຕ່ລະຄົນ ໂດຍມີການຕິດຕາມຕະຫຼອດ ນັກເຕະຊຸດນີ້ສ່ວນຫຼາຍແມ່ນນັກກີລາຊຸດຊາວໜຸ່ມທີ່ຂຶ້່ນມາໃໝ່ ປະສົມປະສານນັກເຕະຊຸດໃຫຍ່ ປີນີ້ພວກເຮົາຈະພະຍາຍາມເຮັດໃຫ້ດີທີ່ສຸດ ເພື່ອປ້ອງກັນແຊັມໃຫ້ໄດ້.
ລາວໂຕໂຢຕ້າ ເອັບຊີ ເປັນສະໂມສອນທີ່ຄວ້າແຊັມລີກສູງສຸດຂອງ ສປປ ລາວ 4 ສະໄໝ (ປີ 2015 2017 2018 ແລະ 2019) ນັບຕັ້ງແຕ່ເຂົ້າຮ່ວມຄັ້ງທຳອິດໃນປີ 2014 ລວມເຖິງແຊັມສະໄໝທຳອິດຂອງການແຂ່ງຂັນບານເຕະຊີງຂັນ ສຕລ ປີ 2019 ເຊິ່ງລາວລີກ 1 ປີນີ້ ນັດທຳອິດ ລາວໂຕໂຢຕ້າ ປະເດີມສະໜາມ ພົບ ມາສເຕີ 7 ເອັບຊີ ທີມຮອງແຊັມເກົ່າ ວັນເສົາທີ 11 ກໍລະກົດ 2020 ຢູ່ສະໜາມກີລາແຫ່ງຊາດ (ຫຼັກ 16) ສະໜາມໃນ.