ຂຶ້ນວ່າການສຶກສາຮຽນຮູ້ທຸກຢ່າງແມ່ນດີໝົດ ເພາະມັນຄືການເພີ່ມຄວາມຮູ້ຄວາມສາມາດທັກສະຕ່າງໆໃຫ້ກັບຄົນ ເພື່ອນຳມາປັບປຸງ ປ່ຽນແປງເຂົ້າໃນພຶດຕິກຳການດຳລົງຊີວິດຕົວຈິງ ເຊິ່ງການຮຽນຮູ້ເຫຼົ່ານັ້ນ ບໍ່ໄດ້ມີຢູ່ໃນປື້ມຕຳລາພຽງຢ່າງດຽວເທົ່ານັ້ນ ແຕ່ຫາກແຊກຊ້ອນຢູ່ນຳທຸກວຽກງານຂະແໜງການ ລວມທັງການເຄື່ອນໄຫວຮ້ອຍອັນພັນຢ່າງ ແລະ ແວດລ້ອມອ້ອມຂ້າງ ລ້ວນແຕ່ສົ່ງຜົນກະທົບໂດຍກົງຕໍ່ການຮຽນຮູ້ຂອງຄົນເຮົາທັງນັ້ນ ພຽງແຕ່ເຮົາຈະສາມາດນຳມາໝູນໃຊ້ເຂົ້າໃນການດຳລົງຊີວິດປະຈຳວັນ ເພື່ອມາພັດທະນາຄຸນນະພາບຊີວິດຂອງຕົນເອງຄືແນວໃດ ເພາະຄວາມຮູ້ໃດທີ່ສາມາດນຳມາໝູນໃຊ້ ສ້າງຄຸນປະໂຫຍດຕໍ່ຕົນເອງ ແລະ ສັງຄົມໄດ້ນັ້ນ ກໍເອີ້ນວ່າຄວາມຮູ້.
ຫຼ້າສຸດທີ່ເມືອງພູຄູນ ແຂວງຫຼວງພະບາງ ເພື່ອເປັນການເພີ່ມທັກສະຄວາມຮູ້ຄວາມສາມາດ ປະສົບປະການຊີວິດ ໃນການເຄື່ອນໄຫວຊີວິດປະຈຳວັນໃຫ້ແກ່ນັກຮຽນ ທາງຫ້ອງການສຶກສາທິການ ແລະ ກີລາເມືອງ ໄດ້ສົມທົບກັບຫ້ອງການປ້ອງກັນຄວາມສະຫງົບ ແລະ ກອງບັນຊາການທະຫານເມືອງດັ່ງກ່າວ ເປີດການຮຽນ-ການສອນ ຮຽນຮູ້ກ່ຽວກັບວຽກງານປ້ອງກັນຊາດ ແລະ ປ້ອງກັນຄວາມສະຫງົບ (ປກຊ-ປກສ) ໃຫ້ແກ່ນັກຮຽນຊັ້ນມັດທະຍົມສຶກສາ ໂຮງຮຽນມັດທະຍົມສົມບູນພູຄູນ ເມືອງພູຄູນ ແຂວງຫຼວງພະບາງ ໃນວັນທີ 7 ກໍລະກົດ 2020 ຜ່ານມາ ທີ່ໂຮງຮຽນມັດທະຍົມສົມບູນພູຄູນ ໂດຍມີພັນໂທ ບຸນທັນ ຫານຊະນະ ຫົວໜ້າກອງບັນຊາການທະຫານເມືອງດັ່ງກ່າວ ທ່ານ ບຸນປອນ ໄພຍະສັກ ຮອງຫົວໜ້າຫ້ອງການສຶກສາທິການ ແລະ ກີລາເມືອງ ພ້ອມດ້ວຍນັກວິທະຍາກອນຈາກກອງບັນຊາການທະຫານ ພະນັກງານຄູ-ອາຈານ ຜັດປ່ຽນກັນຂຶ້ນເຜີຍແຜ່ ແນະນຳ ໃຫ້ຄວາມກະຈ່າງແຈ້ງແກ່ນັກຮຽນ.
ການເປີດການຮຽນ-ການສອນວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ແກ່ນັກຮຽນຊັ້ນມັດທະຍົມສຶກສາຕອນປາຍ ໂຮງຮຽນມັດທະຍົມສົມບູນພູຄູນໃນຄັ້ງນີ້ ມີນັກຮຽນຊັ້ນ ມ5 ມ6 ມ7 ລວມທັງໝົດ 336 ຄົນ ຍິງ 158 ຄົນ ເຂົ້າຮ່ວມອົບຮົມ ເຊິ່ງຈະໄດ້ຈັດຕັ້ງປະຕິບັດການຮຽນ-ການສອນ 2 ພາກ ຄື: ພາກວິຊາປ້ອງກັນຊາດ ແລະ ພາກວິຊາປ້ອງກັນຄວາມສະຫງົບ ໃນນີ້ ມີທັງການອົບຮົມພາກທິດສະດີ ແລະ ພາກປະຕິບັດຕົວຈິງທັງໝົດ 12 ວັນ ລວມ 109 ຊົວໂມງ ເຊິ່ງການຮຽນໃນຄັ້ງນີ້ ຈະດຳເນີນໄປຈົນເຖິງວັນທີ 18 ກໍລະກົດ 2020 ຈຶ່ງຈະສຳເລັດ.
ພັນໂທ ບຸນທັນ ຫານຊະນະ ໄດ້ຮຽກຮ້ອງມາຍັງວິທະຍາກອນ ແລະ ນ້ອງນັກຮຽນທຸກຄົນ ຈົ່ງໄດ້ພ້ອມກັນຕັດສິນໃຈປະຕິບັດວຽກງານຂອງຕົນ ດ້ວຍຄວາມຮັບຜິດຊອບສູງຕໍ່ຜົນການສິດສອນ-ຮ່ຳຮຽນ ຕະຫຼອດໄລຍະການຮຽນໃນພາກທິດສະດີ ແລະ ພາກປະຕິບັດຕົວຈິງ ເພື່ອເຮັດໃຫ້ການຮຽນ-ການສອນຄັ້ງນີ້ມີຄວາມປອດໄພ ແລະ ມີຜົນສຳເລັດຕາມລະດັບຄາດໝາຍທີ່ກຳນົດໄວ້.
ສຳລັບການຈັດຕັ້ງການຮຽນ-ການສອນ ກ່ຽວກັບວຽກງານ ປກສ ປກຊ ມັນແມ່ນການສຶກສາວິຊາພື້ນຖານປ້ອງກັນຕົວ ເພື່ອໃຫ້ນັກຮຽນໄດ້ມີຄວາມຮູ້ພື້ນຖານກຽ່ວກັບວຽກງານປ້ອງກັນຊາດ-ປ້ອງກັນຄວາມສະຫງົບ ມີສະຕິລະວັງຕົວສູງຕໍ່ກົນອຸບາຍຫັນປຽ່ນຂອງສັດຕູ ເຮັດໃຫ້ຮູ້ ແລະ ເຂົ້າໃຈເລິກເຊິ່ງ ເຖິງຄວາມໝາຍຄວາມສຳຄັນຂອງວຽກງານດັ່ງກ່າວ ອີກທັງເປັນການກຽມພ້ອມໃຫ້ກັບນັກຮຽນ ຜູ້ຈະເປັນໝໍ່ແໜງປ່ຽນແທນນັກຮົບໃນອະນາຄົດ ກຽມພ້ອມໃນການຮັບໃຊ້ປະເທດຊາດ ຕາມຄວາມຮຽກຮ້ອງຕ້ອງການ ແລະ ທັງເປັນການປູກຈິດສຳນຶກໃຫ້ນັກຮຽນມີນ້ຳໃຈຮັກຊາດ ຮັກບ້ານເກີດເມືອງນອນ ມີສະຕິຕໍ່ການຈັດຕັ້ງ ມີລະບຽບວິໄນ ສ້າງຄວາມສາມັກຄີຮຽນຮູ້ການດຳລົງຊີວິດໃນສັງຄົມ ມີນ້ຳໃຈຊ່ວຍເຫຼືອເຊິ່ງກັນ ແລະ ກັນ ນຳສູ່ການພັດທະນາທັກສະສາມາດແກ້ໄຂບັນຫາດ້ວຍຕົນເອງ ພ້ອມກັບການສຶກສາຮຽນຮູ້ ການດຳລົງຊີວິດທີ່ຖືກຕ້ອງສອດຄອງກັບເງື່ອນໄຂສະພາບຄວາມເປັນຈິງ ລວມເຖິງການປະຕິບັດລະບຽບ-ກົດໝາຍຂອງ ສປປ ລາວ.
ນຳສະເໜີໂດຍ: ແວ່ນຂາວ