ໃນວັນທີ 30 ພະຈິກ 2025 ທີ່ທຳນຽບປະທານປະເທດ ໄດ້ຈັດພິທີຮັບການອວຍພອນຂອງບັນດາທູຕານຸທູດ ແລະ ຜູ້ຕາງໜ້າອົງການຈັດຕັ້ງສາກົນ ປະຈຳ ສປປ ລາວ ເນື່ອງໃນໂອກາດວັນສະຖາປະນາ ສປປ ລາວ ຄົບຮອບ 50 ປີ (2 ທັນວາ 1975-2 ທັນວາ 2025) ແລະ ປີໃໝ່ສາ ກົນ ປີ 2026 ໂດຍໃຫ້ກຽດເຂົ້າຮ່ວມຂອງ ພະນະທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ມີການນຳພັກ-ລັດ ບັນດາທູຕານຸທູດ ແລະ ຜູ້ຕາງໜ້າອົງການຈັດຕັ້ງສາກົນປະຈຳລາວເຂົ້າຮ່ວມ.
ໂອກາດດັ່ງກ່າວ ພະນະທ່ານ ເອດີ ເອີວານ ບິນມາມຸດ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ມາເລ ເຊຍ ປະຈຳ ສປປ ລາວ ທູດອາວຸໂສໄດ້ກ່າວວ່າ: ໃນນາມຫົວໜ້າຄະນະທູຕານຸທູດ ຂ້າພະເຈົ້າຮູ້ສຶກເປັນກຽດຢ່າງຍິ່ງ ທີ່ໄດ້ຕາງໜ້າໃຫ້ແກ່ບັນດາທ່ານທູຕານຸທູດ ແລະ ຜູ້ຕາງໜ້າອົງການ ຈັດຕັ້ງສາກົນ ປະຈໍາ ສປປ ລາວ ສະແດງຄວາມຊົມເຊີຍຢ່າງສຸດໃຈ ມາຍັງພະນະທ່ານ ລັດຖະບານ ແລະ ປະຊາຊົນ ແຫ່ງ ສປປ ລາວ ໃນໂອກາດວັນສະຖາປະ ນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບ ຮອບ 50 ປີ ການສະເຫຼີມສະຫຼອງໃນຄັ້ງນີ້ ໄດ້ສະແດງໃຫ້ເຫັນເຖິງຜົນສໍາເລັດອັນຍິ່ງໃຫຍ່ທີ່ສາມາດຍາດມາໄດ້ໃນໄລຍະເຄິ່ງສະຕະວັດທີ່ຜ່ານມາ ເຊິ່ງເປັນປີຄົບຮອບ 50 ປີ ແຫ່ງຄວາມໝາຍໝັ້ນຕໍ່ສັນຕິພາບ ເອກະລາດ ແລະ ການພັດທະນາປະເທດຊາດ ນັບຕັ້ງແຕ່ສາທາລະນະລັດ ປະຊາທິປະ ໄຕ ປະຊາຊົນລາວ ໄດ້ຮັບການສະຖາປະນາ ໃນວັນທີ 2 ທັນວາ 1975 ພາຍໃຕ້ການນໍາພາ-ຊີ້ນໍາອັນສະຫຼາດສ່ອງໃສ ແລະ ການເສຍສະລະ ຢ່າງບໍ່ອິດເມື່ອຍຂອງພັກປະຊາຊົນປະຕິວັດລາວ ໃນໂອກາດອັນສະຫງ່າລາສີນີ້ ພວກຂ້າພະເຈົ້າຂໍສະແດງຄວາມຊົມເຊີຍອັນອົບອຸ່ນ ມາຍັງພັກປະຊາຊົນ ປະຕິວັດລາວ ໃນໂອກາດຄົບຮອບ 70 ປີ ແຫ່ງການສ້າງຕັ້ງພັກ ໃນໄລຍະ 7 ທົດສະວັດທີ່ຜ່ານມາ ພັກປະຊາຊົນປະຕິ ວັດລາວ ໄດ້ນໍາພາປະຊາຊົນລາວດ້ວຍຄວາມໝາຍໝັ້ນອັນເດັດດ່ຽວ ນໍາພາປະເທດຊາດຜ່ານຜ່າຄວາມ ທຸກຍາກໃນອະດີດ ສູ່ສັນຕິພາບ ສະຖຽນລະພາບ ແລະ ການພັດທະນາ ໃນໄລຍະເຄິ່ງສະຕະວັດທີ່ຜ່ານມາ ສປປ ລາວ ສາມາດຍາດໄດ້ຜົນສໍາເລັດທີ່ພົ້ນເດັ່ນ ໄດ້ເສີມສ້າງຄວາມເຂັ້ມແຂງທາງດ້ານຊັບພະຍາ ກອນມະນຸດ ກໍ່ສ້າງພື້ນຖານໂຄງລ່າງທີ່ທັນສະໄໝ ສົ່ງເສີມການເຂົ້າເຖິງການສຶກສາ ແລະ ສາທາລະນະສຸກ ເພີ່ມທະວີການຮ່ວມມືກັບພາກພື້ນ ແລະ ສາກົນ ໃນຂະນະດຽວກັນກໍຍັງສາມາດຮັກສາໄດ້ເອກະລັກທາງວັດທະນະທໍາ ແລະ ຄຸ່ນຄ່າທີ່ເປັນເອກະລັກສະເພາະຂອງຊາດລາວ ນັບຕັ້ງແຕ່ໄດ້ເຂົ້າເປັນສະມາຊິກອາຊຽນ ໃນປີ 1997 ສປປ ລາວ ໄດ້ກາຍເປັນສະມາຊິກທີ່ມີຄວາມຫ້າວຫັນ ແລະ ໄດ້ຮັບການເຄົາລົບນັບຖືໃນປະຊາຄົມພາກພື້ນ ໃນນີ້ ພວກຂ້າພະເຈົ້າຂໍສະ ແດງຄວາມຊົມເຊີຍອັນອົບອຸ່ນ ມາຍັງ ສປປ ລາວ ທີ່ໄດ້ສໍາເລັດການເປັນປະທານອາຊຽນຢ່າງຈົບງາມເຖິງ 3 ຄັ້ງ ເຊິ່ງຄັ້ງລ່າສຸດ ໃນປີ 2024 ທີ່ຜ່ານມາ ສປປ ລາວ ກໍໄດ້ສະແດງໃຫ້ເຫັນເຖິງຂີດຄວາມສາມາດທາງດ້ານການທູດຂອງ ສປປ ລາວ ແລະ ຄວາມໝາຍໝັ້ນໃນການຮັດແໜ້ນຄວາມເປັນແກນກາງອາຊຽນ ແລະ ການສົ່ງເສີມສັນຕິ ພາບ ສະຖຽນລະພາບ ແລະ ການຮ່ວມມືພາຍໃນພາກພື້ນຂອງພວກເຮົາ ໃນໄລຍະຊຸມປີທີ່ຜ່ານມາ ຄະນະທູຕານຸທູດໃນນະຄອນ ຫຼວງວຽງຈັນ ໄດ້ຮັບກຽດເຂົ້າຮ່ວມບັນດາກິດຈະກໍາທີ່ມີຄວາມໝາຍຄວາມສໍາຄັນ ເພື່ອສະເຫຼີມສະຫຼອງສາຍພົວພັນມິດຕະພາບ ແລະ ການຮ່ວມມືລະ ຫວ່າງບັນດາປະເທດຂອງພວກຂ້າພະເຈົ້າ ແລະ ສປປ ລາວ.
ພະນະ ທ່ານ ເອດີ ເອີວານ ບິນມາມຸດ ກ່າວຕື່ມວ່າ: ຖືໂອກາດນີ້ ພວກຂ້າພະເຈົ້າສະແດງຄວາມຊົມເຊີຍຕໍ່ຄວາມພະຍາຍາມຂອງລັດຖະບານ ແຫ່ງ ສປປ ລາວ ໃນການຈັດຕັ້ງປະຕິບັດແຜນພັດທະນາເສດຖະກິດສັງຄົມ 5 ປີ ຄັ້ງທີ 9 ແລະ ຄັ້ງທີ 10 ເຊິ່ງໄດ້ກາຍເປັນພື້ນຖານອັນສໍາຄັນໃຫ້ແກ່ຄວາມກ້າວໜ້າສີຂຽວ ແລະ ນະວັດຕະກໍາ ການພັດທະນາຊັບພະຍາກອນມະນຸດ ແລະ ການເຊື່ອມໂຍງກັບພາກພື້ນປະຊາຄົມສາກົນ ສະໜັບສະໜູນຄວາມມຸ່ງມາດປາຖະໜາຂອງ ສປປ ລາວ ໃນການຂ້າມຜ່ານສະຖານະ ພາບປະເທດດ້ອຍພັດທະນາຢ່າງໂລ່ງລ່ຽນ ໃນປີ 2026 ແລະ ຄວາມໝາຍໝັ້ນໃນການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ເຫດການປະຫວັດສາດດັ່ງກ່າວ ແມ່ນຄວາມເອກອ້າງທະນົງໃຈຂອງປະເທດຊາດ ແລະ ເປັນເຄື່ອງພິສູດເຖິງຄວາມກ້າວໜ້າທີ່ໝັ້ນຄົງ ພາຍໃຕ້ການນໍາພາ-ຊີ້ນໍາຂອງພັກ ແລະ ລັດຖະບານ ຄະນະທູຕານູທູດຂໍຢໍ້າຄືນຄວາມໝາຍໝັ້ນໃນການສືບຕໍ່ສະໜັບສະ ໜູນ ສປປ ລາວ ເພື່ອຮັບປະກັນວ່າ ການຂ້າມຜ່ານດັ່ງກ່າວ ຈະນໍາມາເຊິ່ງຜົນປະໂຫຍດອັນຍືນຍົງໃຫ້ແກ່ປະຊາ ຊົນລາວ ໃນຂະນະທີ່ ສປປ ລາວ ພວມສະເຫຼີມສະຫຼອງການຄົບຮອບ 50 ປີ ແຫ່ງການສະຖາປະນາປະເທດຊາດ ແລະ 70 ປີ ແຫ່ງການສ້າງຕັ້ງພັກ ພວກຂ້າພະເຈົ້າຂໍຮ່ວມສະເຫຼີມສະຫຼອງວັນປະຫວັດສາດທີ່ໜ້າພາກ ພູມໃຈ ແລະ ອານາຄົດອັນໝັ້ນຄົງຂອງ ສປປ ລາວ ສປປ ລາວ ໄດ້ພິ ສູດໃຫ້ເຫັນແລ້ວວ່າ ເປັນປະເທດສົ່ງເສີມສັນຕິພາບ ມິດ ຕະພາບ ແລະ ການຮ່ວມມື ຢ່າງໝັ້ນຄົງ ເຊິ່ງເປັນຫຼັກການທີ່ສືບຕໍ່ຊຸກຍູ້ຄວາມພະ ຍາຍາມຮ່ວມກັນໃນການເສີມສ້າງຄວາມສາມັກຄີໃນພາກພື້ນ ແລະ ທົ່ວໂລກ ພວກຂ້າພະ ເຈົ້າ ມີຄວາມ ໝາຍໝັ້ນຢ່າງເລິກເຊິ່ງ ທີ່ຈະສືບຕໍ່ຮັດແໜ້ນສາຍພົວພັນມິດຕະພາບ ການເປັນຄູ່ຮ່ວມມື ແລະ ຄວາມເຂົ້າອົກເຂົ້າໃຈເຊິ່ງກັນ ແລະ ກັນ ລະຫວ່າງປະເທດຂອງພວກຂ້າພະເຈົ້າ ແລະ ສປປ ລາວ ແລະ ຂໍສະແດງຄວາມຮູ້ບຸນຄຸນຢ່າງສູງ ທີ່ໄດ້ມອບໂອກາດໃຫ້ພວກຂ້າ ພະເຈົ້າ ໄດ້ສະເຫຼີມສະຫຼອງວັນປະຫວັດສາດອັນສໍາຄັນຄັ້ງນີ້.
ໂອກາດນີ້ ພະນະທ່ານ ທອງລຸນ ສີສຸລິດ ໄດ້ກ່າວວ່າ: ຂ້າ ພະເຈົ້າຂໍສະແດງຄວາມຂອບໃຈຢ່າງຈິງໃຈ ມາຍັງທ່ານທູດອາວຸໂສ ໃນນາມຕາງໜ້າບັນດາທ່ານທູຕານຸທູດ ແລະ ຜູ້ຕາງໜ້າອົງການຈັດຕັ້ງສາກົນ ປະຈຳ ສປປ ລາວ ທີ່ໄດ້ມີຄຳເວົ້າທີ່ຈົບງາມຕໍ່ພວກຂ້າພະເຈົ້າ ເຊິ່ງເປັນຄຳເວົ້າທີ່ໃຫ້ກຽດ ແລະ ໃຫ້ກຳລັງໃຈຕໍ່ໝາກຜົນແຫ່ງການນຳພາປະ ເທດຊາດຕະຫຼອດ 50 ປີ ທີ່ຜ່ານມາ ແລະ ຂອບໃ ຕໍ່ຄໍາອວຍພອນອັນອົບອຸ່ນໃຫ້ແກ່ພວກຂ້າພະເຈົ້າໃນວັນສຳຄັນດັ່ງກ່າວນີ້ ຄໍາອວຍພອນຂອງບັນດາທ່ານເປັນການຢັ້ງຢືນ ແລະ ສະແດງໃຫ້ເຫັນເຖິງໄມຕີຈິດ ມິດຕະພາບ ແລະ ການຮ່ວມມືອັນດີ ລະຫວ່າງ ປະເທດຂອງພວກທ່ານ ແລະ ອົງ ການຈັດຕັ້ງສາກົນຕ່າງໆ ກັບ ສປປ ລາວ ພິເສດ ຍັງເປັນການໃຫ້ກຳລັງໃຈອັນໃຫຍ່ຫຼວງແກ່ລັດຖະບານ ແລະ ປະຊາ ຊົນລາວ ໃນການສືບຕໍ່ຈັດຕັ້ງປະຕິບັດພາລະກິດອັນສູງສົ່ງ ແຫ່ງການປົກປັກຮັກສາ ແລະ ສ້າງສາພັດທະນາປະເທດ ຊາດ ໃຫ້ກ້າວໜ້າໄປຢ່າງບໍ່ຢຸດຢັ້ງ ອີກດ້ວຍ.
ພະນະທ່ານ ທອງລຸນ ສີສຸລິດ ກ່າວຕື່ມວ່າ: ຕະຫຼອດ 50 ປີ ທີ່ຜ່ານມາ ສປປ ລາວ ໄດ້ຜ່ານຜ່າເສັ້ນທາງການພັດ ທະນາ ທີ່ເຕັມໄປດ້ວຍການຫັນປ່ຽນອັນໃຫຍ່ຫຼວງ ຈາກປະເທດທີ່ເຄີຍຖືກທໍາລາຍຈາກສົງຄາມ ລະດັບພື້ນຖານເສດຖະກິດທີ່ຫຼ້າຫຼັງ ແລະ ມີຄວາມຫຍຸ້ງຍາກຫຼາຍດ້ານ ໂດຍພາຍໃຕ້ການນໍາພາ ຂອງປະທານ ໄກສອນ ພົມວິ ຫານ ຜ່ານແນວທາງການປ່ຽນແປງໃໝ່ຢ່າງມີຫຼັກການ ເຊິ່ງໄດ້ເຮັດໃຫ້ ສປ ປ ລາວ ສາມາດບັນລຸໄດ້ຜົົນສໍາເລັດທີ່ໜ້າພາກພູມໃຈໃນທຸກຂົງເຂດ ນັບແຕ່ການຍົກລະດັບຊີວິດການເປັນຢູ່ຂອງປະຊາຊົນ ແລະ ການສ້າງພື້ນຖານໂຄງລ່າງທີ່ສໍາຄັນຫຼາຍດ້ານ ເພື່ອການພັດທະນາທີ່ຍືນຍົງ ແລະ ໝັ້ນຄົງໃນໄລຍະຍາວ ຄຽງຄູ່ກັບຜົນສໍາເລັດດັ່ງກ່າວ ສປປ ລາວ ກໍຍັງມີສິ່ງທ້າທາຍບໍ່ໜ້ອຍໃນທ່າມ ກາງໄລຍະຂ້າມຜ່ານ ເຊິ່ງມັນໄດ້ຮຽກຮ້ອງໃຫ້ມີຄວາມຕັດສິນໃຈສູງທາງການເມືອງ ແລະ ຄວາມສາມັກຄີເປັນປຶກແຜ່ນຂອງທົ່ວປວງຊົນລາວທັງຊາດ ໃນການສ້າງສາ ແລະ ພັດທະນາໃນຕໍ່ໜ້າ ເພື່ອນໍາເອົາປະ ເທດຊາດກ້າວຂຶ້ນສູ່ຄວາມຈະ ເລີນວັດທະນາ ສ້າງ ສປປ ລາວ ໃຫ້ກາຍເປັນປະເທດ ທີ່ມີຄວາມເຂັ້ມແຂງ ປະຊາຊົນຮັ່ງມີຜາສຸກ ສັງຄົມມີຄວາມສາ ມັກຄີປອງດອງ ປະຊາທິປະໄຕ ຍຸຕິທໍາ ແລະ ສີວິໄລ ຕາມຈຸດໝາຍທີ່ວາງໄວ້ ຕະຫຼອດໜຶ່ງປີຜ່ານມາ ໂລກຂອງພວກເຮົາຍັງປະເຊີນໜ້າກັບສິ່ງທ້າທາຍຫຼາຍຢ່າງທີ່ເປັນຜົນກະທົບຕໍ່ສັນຕິພາບ ແລະ ຄວາມໝັ້ນຄົງຂອງພາກພື້ນ ແລະ ຂອງໂລກ ຄວາມຂັດແຍ້ງດ້ານການຄ້າ ຄວາມໝັ້ນຄົງທາງໄຊເບີ ໄພທໍາມະຊາດ ຄວາມຫຍຸ້ງຍາກດ້ານເສດຖະກິດ-ການເງິນ ແລະ ອື່ນໆ ເຊິ່ງໄດ້ເປັນອຸປະສັກ ແລະ ສົ່ງຜົນກະທົບໃນທາງກົງ ແລະ ທາງອ້ອມ ຕໍ່ທຸກໆປະເທດ ລວມທັງ ສປປ ລາວ ກໍໄດ້ຮັບຜົນກະທົບເໝືອນດັ່ງຫຼາຍປະເທດເຊັ່ນດຽວກັນ ຕໍ່ສະພາບການດັ່ງກ່າວ ລັດ ຖະບານ ແຫ່ງ ສປປ ລາວ ກໍໄດ້ສຸມທຸກຄວາມພະຍາຍາມ ແລະ ກໍາລັງແຮງສັງລວມ ເພື່ອສືບຕໍ່ແກ້ໄຂບັນຫາລວມຂອງຊາດຢ່າງຕັ້ງໜ້າ ໃນນັ້ນ ສປປ ລາວ ໄດ້ເອົາໃຈໃສ່ສືບຕໍ່ນໍາໃຊ້ທ່າແຮງບົ່ມຊ້ອນທີ່ມີ ສືບຕໍ່ປັບປຸງນະໂຍບາຍ ນິຕິກໍາ ແລະ ກົງຈັກການບໍລິຫານຄຸ້ມຄອງຂັ້ນສູນກາງ ແລະ ທ້ອງຖິ່ນ ໃຫ້ສອດຄ່ອງ ແລະ ກະທັດຮັດ ຍົກສູງການຮ່ວມມືກັບບັນດາປະເທດເພື່ອນມິດໃນພາກພື້ນ ແລະ ສາກົນ ໂດຍສະເພາະ ເມື່ອບໍ່ດົນມານີ້ ສປປ ລາວ ກໍໄດ້ເຂົ້າເປັນຄູ່ເຈລະຈາອົງການຮ່ວມມືຊຽງໄຮ (SCO) ແລະ ໄດ້ລົງນາມສົນທິສັນຍາ ສະ ຫະປະຊາຊາດ ວ່າດ້ວຍການຕ້ານອາຊະຍາກໍາທາງໄຊເບີ ສູ້ຊົນຍົກລະດັບພື້ນຖານໂຄງລ່າງຕາມວິໄສທັດໃນການພັດທະນາຈາກປະເທດທີ່ບໍ່ມີຊາຍ ແດນຕິດກັບທະເລ ໃຫ້ກາຍມາເປັນປະເທດເຊື່ອມໂຍງ-ເຊື່ອມຈອດກັບບັນດາປະເທດໃກ້ຄຽງໃຫ້ຫຼາຍຂຶ້ນ ທັງທາງບົກ ທາງນໍ້າ ແລະ ທາງອາກາດ ພ້ອມດຽວກັນນີ້ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 9 ໃນທ້າຍສະໄໝ ກໍເຫັນວ່າມີຜົນສໍາເລັດທີ່ສໍາຄັນຫຼາຍດ້ານ ເຊິ່ງເປັນການຄໍ້າປະກັນເຮັດໃຫ້ປະເທດຊາດ ສືບຕໍ່ມີສະຖຽນລະພາບທາງດ້ານການເມືອງ ສັງຄົມມີຄວາມສະຫງົບປອດໄພ ເສດຖະກິດ ມີການຂະ. ຫຍາຍຕົວສະເລ່ຍຢູ່ໃນລະ ດັບ 4,8% (ສະພາແຫ່ງຊາດ ໄດ້ກໍານົດເປົ້າໝາຍ 4,24%) ຂ້າພະເຈົ້າເຫັນວ່າ ບັນດາຜົນສຳເລັດຂອງ ສປປ ລາວ ທີ່ຍາດມາໄດ້ແມ່ນບໍ່ສາມາດຕັດແຍກອອກຈາກການສະໜັບສະໜູນ ແລະ ໃຫ້ການຊ່ວຍເຫຼືອສະໜັບສະໜູນຂອງບັນດາປະເທດເພື່ອນມິດ ແລະ ອົງການຈັດຕັ້ງສາກົນທັງຢູ່ໃນພາກພື້ນ ແລະ ທົ່ວ ໂລກ ພວກຂ້າພະເຈົ້າຖືວ່າ ການສະໜັບສະໜູນຊ່ວຍເຫຼືອດັ່ງກ່າວນັ້ນ ມີຄວາມສຳຄັນຍິ່ງ ສາມາດສ້າງກຳລັງແຮງໃຫ້ແກ່ພວກຂ້າພະເຈົ້າໃນການພັດທະນາປະເທດໄດ້ຢ່າງຕໍ່ ເນື່ອງ ແນໃສ່ເປົ້າໝາຍນໍາເອົາປະເທດໃຫ້ຫຼຸດພົ້ນອອກຈາກສະພາບດ້ອຍພັດທະນາໄດ້ຢ່າງໂລ່ງລ່ຽນ ຍືນຍົງ ແລະ ປ້ອງກັນບໍ່ໃຫ້ກັບຄືນມາຕົກຢູ່ໃນສະຖານພາບດ້ອຍພັດ ທະນາອີກ ຕາມທິດທາງການສ້າງຄວາມເປັນເຈົ້າໃນນະໂຍ ບາຍສ້າງເສດ ຖະກິດເອກະລາດເປັນເຈົ້າຕົນເອງ ຕິດພັນກັບການບັນລຸເປົ້າໝາຍການພັດທະນາແບບຍືນຍົງ (SDGs).
ຂ້າພະເຈົ້າ ຂໍຖືໂອກາດນີ້ ຕາງໜ້າລັດຖະບານ ແລະ ປະຊາ ຊົນລາວທຸກຖ້ວນໜ້າ ສະແດງຄວາມຮູ້ບຸນຄຸນ ແລະ ຂອບໃຈຢ່າງຈິງໃຈ ມາຍັງບັນດາປະເທດເພື່ອນມິດ ແລະ ອົງການຈັດຕັ້ງສາກົນ ທີ່ໄດ້ໃຫ້ ການສະໜັບສະໜູນ ແລະ ຊ່ວຍເຫຼືອໃນດ້ານຕ່າງໆ ຕະຫຼອດໄລຍະຜ່ານມາ ເຊິ່ງໄດ້ປະກອບສ່ວນອັນສຳ ຄັນ ແລະ ຕັ້ງໜ້າໃຫ້ ສປປ ລາວ ສາມາດຜ່ານຜ່າຄວາມຫຍຸ້ງຍາກ ແລະ ສິ່ງທ້າທາຍນາໆປະການ ໃນໄລຍະຜ່ານມາ ໃນປັດຈຸບັນ ສະພາບການຂອງໂລກຍັງສືບຕໍ່ຜັນແປຢ່າງໄວວາ ສະຫຼັບຊັບຊ້ອນ ແລະ ເຕັມໄປດ້ວຍຄວາມບໍ່ແນ່ນອນ ການປະທະກັນດ້ານການທະຫານ ຍັງສືບຕໍ່ດຳເນີນ ແລະ ກໍມີທ່າວ່າຈະຮຸນແຮງຂຶ້ນໃນບາງພື້ນທີ່ຂອງໂລກ ເຊິ່ງບັນຫາເຫຼົ່ານີ້ ໄດ້ກາຍເປັນສິ່ງທ້າທາຍ ແລະ ເປັນໄພຂົ່ມຂູ່ອັນໃຫຍ່ຫຼວງຕໍ່ສັນຕິພາບ ສະຖຽນລະພາບ ແລະ ຄວາມໝັ້ນຄົງ ໃນໂລກຂອງພວກເຮົາ ຕໍ່ສະພາບການດັ່ງກ່າວ ສປປ ລາວ ຍາມໃດກໍຍຶດໝັ້ນຕາມແນວທາງການຕ່າງປະເທດ ສັນຕິພາບ ເອກະລາດ ມິດຕະພາບ ແລະ ການຮ່ວມມື ຢ່າງສະເໝີຕົ້ນສະເໝີປາຍ ສະໜັບສະໜູນຕໍ່ຄວາມພະຍາຍາມຂອງທຸກໆຝ່າຍ ເພື່ອຊອກຫາວິທີທາງຮ່ວມກັນແກ້ໄຂຄວາມຂັດແຍ້ງດ້ວຍວິທີທາງສັນຕິ ເພື່ອຢັບຢັ້ງຄວາມຮຸນແຮງຕ່າງໆ ທີ່ກຳລັງເກີດຂຶ້ນໃຫ້ສາມາດຢຸດຕິລົງໂດຍໄວ ສປປ ລາວ ມີຄວາມເຊື່ອ ໝັ້ນຢ່າງຍິ່ງວ່າ ດ້ວຍຄວາມພະຍາຍາມຮ່ວມກັນຂອງພວກເຮົາ ແລະ ຢືນຢູ່ບົນຈິດໃຈການແກ້ໄຂບັນຫາດ້ວນສັນຕິວິທີ ເປັນທາງເລືອກທີ່ດີທີ່ສຸດ ເພື່ອຈະສ້າງໂລກພວກເຮົາໃຫ້ມີສັນຕິພາບ ແລະ ການພັດທະນາທີ່ຍືນຍົງ ສປປ ລາວ ມີຄວາມຍິນດີທີ່ຈະສືບຕໍ່ປະກອບສ່ວນຢ່າງຕັ້ງໜ້າ ເຂົ້າໃນຄວາມພະຍາມຍາມຂອງວົງຄະນະຍາດສາກົນ ໃນຂອບການຮ່ວມມືຕ່າງໆ ທີ່ຕົນເປັນພາຄີ ເພື່ອສົ່ງເສີມສັນຕິພາບ ສະຖຽນລະພາບ ຄວາມໝັ້ນຄົງ ແລະ ການຮ່ວມມື ເພື່ອການພັດທະນາແບບຍືນຍົງ ໃນພາກພື້ນ ແລະ ສາກົນ.
ໃນປີ 2026 ທີ່ຈະມາເຖິງນີ້ ຈະເປັນປີສໍາຄັນທີ່ສຸດ ສໍາລັບ ສປປ ລາວ ເປັນປີທີ່ຈະໄດ້ປະກາດໃຫ້ເປັນລັດທີ່ມີເງື່ອນ ໄຂຫຼຸດພົ້ນອອກຈາກປະເທດດ້ອຍພັດທະນາ (LDC) ນອກນັ້ນ ລາວຈະເປັນເຈົ້າພາບຈັດກອງປະຊຸມທົບທວນຄືນ ຄັ້ງທີ 3 ໃນການຈັດຕັ້ງປະຕິບັດສົນທິສັນຍາ ວ່າດ້ວຍການເກືອດຫ້າມລະ ເບີດລູກຫວ່ານ (CCM) ແລະ ເປັນປີເລີ່ມຕົ້ນໃນການຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມ ແຫ່ງຊາດ 5 ປີ (2026-2030) ຄັ້ງທີ 10 ທີ່ມີການເຊື່ອມສານຍຸດທະສາດການຫຼຸດພົ້ນອອກຈາກປະເທດດ້ອຍພັດທະນາ ແລະ ເປົ້າໝາຍການພັດທະນາແບບຍືນຍົງ (SDGs) ພ້ອມທັງບັນດາແຜນການຕ່າງໆທີ່ຮ່ວມມືກັບສາກົນ ບົນຈິດໃຈດັ່ງກ່າວ ຂ້າພະເຈົ້າເຊື່ອໝັ້ນຢ່າງໜັກແໜ້ນວ່າ ບັນດາປະເທດເພື່ອນມິດ ແລະ ອົງການຈັດຕັ້ງສາກົນຈະສືບຕໍ່ໃຫ້ການສະໜັບສະໜູນ ສປປ ລາວ ໃນການບັນລຸຄວາມພະຍາຍາມຕ່າງໆຂອງພວກຂ້າພະເຈົ້າ ເພື່ອຈັດຕັ້ງປະຕິບັດບັນ ດາແຜນວຽກຈຸດສຸມໃນຕໍ່ໜ້າໃຫ້ມີຜົນສຳເລັດຢ່າງຈົບງາມ.
ໃນໂອກາດປີໃໝ່ສາກົນ 2026 ທີ່ຈະໝູນວຽນມາເຖິງໃນມໍ່ໆນີ້ ຂ້າພະເຈົ້າຕາງໜ້າໃຫ້ປະຊາຊົນລາວທຸກຖ້ວນໜ້າ ແລະ ໃນນາມສ່ວນຕົວ ຂໍອວຍພອນໄຊອັນປະເສີດ ມາຍັງບັນດາທ່ານທີ່ມີກຽດທັງຫຼາຍ