ເນື່ອງໃນໂອກາດວັນປ່ອຍປາ ວັນອະນຸຮັກສັດນ້ຳ-ສັດປ່າ ແຫ່ງຊາດປະຈຳປີ 2020 ໃນວັນທີ 10 ກໍລະກົດ 2020 ບໍລິສັດ ໄຟຟ້າ ຫົງສາ ຈຳກັດ ໄດ້ສະໜັບສະໜູນລູກປາ 35.000 ໂຕ ໃຫ້ແກ່ການຈັດກິດຈະກຳປ່ອຍປາຄືນສູ່ທຳມະຊາດທີ່ເມືອງຫົງສາ ເມືອງເງິນ ແລະ ເມືອງຊຽງຮ່ອນ ເຂື່ອນນ້ຳແກ່ນ ບ້ານສີມຸງຄຸນ ແຂວງໄຊຍະບູລີ.
ໃນໂອກາດນີ້ ທ່ານ ຄະທາຍຸດ ຊູພູນ ຜູ້ອຳນວຍການໃຫຍ່ ບໍລິສັດ ໄຟຟ້າ ຫົງສາ ຈຳກັດ ໄດ້ເຂົ້າຮ່ວມປ່ອຍປາທີ່ເມືອງຫົງສາ ທ່ານ ມາໂນດ ຈີນໃຈນາມ ຜູ້ຈັດການພະແນກປະຊາສຳພັນ ຝ່າຍສື່ສານອົງກອນ ເຂົ້າຮ່ວມປ່ອຍປາທີ່ເມືອງເງິນ ແລະ ທ່ານ ຄົມເພັດແກ້ວພິລາ ຜູ້ຈັດການສ່ວນງານຊຸມຊົນສຳພັນ ພະແນກປະຊາສຳພັນ ຝ່າຍສື່ສານອົງກອນ ບໍລິສັດ ໄຟຟ້າ ຫົງສາ ຈຳກັດ ເຂົ້າຮ່ວມປ່ອບປາ ທີ່ເມືອງຊຽງຮ່ອນ.
ການສະໜັບສະໜູນລູກປາ 35.000 ໂຕດັ່ງກ່າວນີ້ ໄດ້ແບ່ງໃຫ້ເມືອງຫົງສາ 15.000 ໂຕ ເມືອງເງິນ 12.000 ໂຕ ແລະ ເມືອງຊຽງຮ່ອນ 8.000 ໂຕ ທັງນີ້ກໍເພື່ອເປັນການອະນຸຮັກສັດນ້ຳ-ສັດປ່າ ຮັກສາຄວາມສົມດຸນໃຫ້ກັບທຳມະຊາດ ແລະ ສິ່ງແວດລ້ອມ ຕະຫຼອດເຖິງການຄືນຄວາມສົມບູນໃຫ້ກັບແຫຼ່ງນ້ຳຕາມທຳມະຊາດ ໃຫ້ຄົງຢູ່ກັບຊຸມຊົນຕໍ່ໄປ.
