ຮ້ານປີ້ງເປັດເອວັນ (AONE) ມີສະຖານທີ່ຕັ້ງຢູ່ບ້ານຫົວຂົວ ເມືອງໄຊເສດຖາ ນະຄອນຫຼວງວຽງຈັນ ໄດ້ເປີດບໍລິການວັນທີ 3 ກໍລະກົດ 2020 ປັດຈຸບັນພາກສ່ວນກ່ຽວຂ້ອງເມືອງໄຊເສດຖາ ໄດ້ສັ່ງປິດບໍລິການຊົ່ວຄາວ ເນື່ອງຈາກເອກະສານດຳເນີນທຸລະກິດບໍ່ຄົບຖ້ວນ ນອກນີ້ ການບໍລິການເສີບອາຫານ ແລະ ເຄື່ອງດື່ມຂອງສາວບໍລິການກໍນຸ່ງເຄື່ອງແບບບໍ່ຖືກຕາມຮີດຄອງປະເພນີ ແລະ ວັດທະນະທຳອັນດີງາມຂອງຊາດລາວເຮົາ.
ທ່ານ ພຸດທະສອນ ໄຊສົງຄາມ ຫົວໜ້າຫ້ອງການຖະແຫຼງຂ່າວ ວັດທະນະທຳ ແລະ ທ່ອງທ່ຽວ (ຖວທ) ເມືອງໄຊເສດຖາ ນະຄອນຫຼວງວຽງຈັນ ໃຫ້ສຳພາດວັນທີ 8 ກໍລະກົດ 2020 ວ່າ: ຮ້ານປີ້ງເປັດເອວັນໄດ້ລົງໂຄສະນາທາງອອນລາຍ (ເຟສບຸກ) ໃນການເປີດບໍລິການ ອັນໄດ້ເຮັດໃຫ້ສັງຄົມຕຳນິສົ່ງຂ່າວທີ່ບໍ່ເໝາະສົມ ທີ່ທາງຮ້ານໄດ້ລົງໂຄສະນາໃຊ້ນາງສາວບໍລິການເສີບອາຫານ ແລະ ເຄື່ອງດື່ມທີ່ນຸ່ງເຄື່ອງບໍ່ຖືກຕາມວັດທະນະທຳອັນດີງາມ ແລະ ອີກດ້ານໜຶ່ງ ປະຊາຊົນກໍຕຳນິ ມີສະພາບລົດແອອັດຍ້ອນລູກຄ້າຂອງຮ້ານຈອດລົດຊະຊາຍຕາມແຄມທາງ ສ້າງຄວາມບໍ່ສະດວກໃນການສັນຈອນ ໂດຍໄດ້ຮັບການຊີ້ນຳຈາກພະແນກ ຖວທ ນະຄອນຫຼວງວຽງຈັນ ແລະ ອົງການປົກຄອງເມືອງໄຊເສດຖາ ດັ່ງນັ້ນ ຫ້ອງການ ຖວທ ເມືອງໄຊເສດຖາ ສົມທົບກັບອຳນາດການປົກຄອງບ້ານຫົວຂົວ ຈຶ່ງໄດ້ລົງກວດກາດ້ານເອກະສານຂໍອະນຸຍາດດຳເນີນທຸລະກິດຄັ້ງທີ 1 ວັນທີ 4 ກໍລະກົດ 2020 ພົບວ່າມີແຕ່ເອກະສານປຸກສ້າງຈາກຫ້ອງການ ຍທຂ ເມືອງໄຊເສດຖາ ແລະ ໃບທະບຽນວິສາຫະກິດການຄ້າຂາຍຈາກກະຊວງອຸດສາຫະກຳ ແລະ ການຄ້າ ແຕ່ບໍ່ມີໃບອະນຸຍາດຈາກພາກສ່ວນກ່ຽວຂ້ອງ ໂດຍສະເພາະບໍ່ໄດ້ຮັບອະນຸຍາດຫ້ອງການ ຖວທ ເມືອງໄຊເສດຖາ ເມື່ອເອກະສານບໍ່ຄົບຖ້ວນ ຈຶ່ງໄດ້ແຈ້ງໃຫ້ເຈົ້າຂອງຮ້ານປະກອບເອກະສານ ແລະ ປັບປຸງຂອດບໍລິການທີ່ບໍ່ເໝາະສົມ ແຕ່ເຈົ້າຂອງຍັງດື້ດ້ານບໍ່ປະຕິບັດເປີດບໍລິການອີກ ແລະ ວັນທີ 7 ກໍລະກົດ 2020 ໄດ້ລົງໄປກວດກາອີກເປັນຄັ້ງທີ 2 ຕື່ມອີກ ແຕ່ເຈົ້າຂອງຮ້ານກໍຍັງບໍ່ປະຕິບັດຕາມການແນະນຳ ດັ່ງນັ້ນ ຫ້ອງການ ຖວທ ເມືອງໄຊເສດຖາ ຈຶ່ງໄດ້ໃຫ້ຮ້ານປີ້ງເປັດ ເອວັນ ປິດບໍລິການຊົ່ວຄາວ ຈົນກວ່າຈະປະກອບເອກະສານຄົບຖ້ວນ ຕາມເງື່ອນໄຂຕ່າງໆ ຈຶ່ງຈະອະນຸຍາດໃຫ້ເປີດບໍລິການອີກຄັ້ງ.