ເພື່ອເປັນການປູກຈິດສຳນຶກ ສະຕິຮັກທຳມະຊາດ ໃຫ້ແກ່ຮຸ່ນລູກຮຸ່ນຫຼານສືບຕໍ່ໄປ ພ້ອມທັງເຮັດໃຫ້ທຳມະຊາດນັບມື້ນັບມີຄວາມສົມບູນຂຶ້ນເລື້ອຍໆ ໂດຍບໍ່ມີມື້ເຫືອດຫາຍ ແລະ ດັບສູນໄປຈາກພວກເຮົາ ໃນວັນທີ 10 ກໍລະກົດ 2020 ຫ້ອງການກະສິກຳ ແລະ ປ່າໄມ້ເມືອງສີໂຄດຕະບອງ ສົມທົບກັບອົງການປົກຄອງເມືອງສີໂຄດຕະບອງ ແລະ ບ້ານອ່າງໃຫຍ່ ຈັດພິທີປ່ອຍປາລົງສູ່ນ້ຳຂອງ ທີ່ວັງສະຫງວນທ່າວັດບ້ານອ່າງໃຫຍ່ ເມືອງສີໂຄດຕະບອງ ນະຄອນຫຼວງວຽງຈັນ (ນວ) ໂດຍມີທ່ານ ວິລະສັກ ນາມມຸນຕີ ເຈົ້າເມືອງສີໂຄດຕະບອງ ທ່ານ ຫຼ້າສາຍ ນວນທາສິງ ຫົວໜ້າພະແນກກະສິກຳ ແລະ ປ່າໄມ້ ນວ ພ້ອມດ້ວຍຄະນະການນຳຂັ້ນເມືອງ ບັນດາຫ້ອງການອ້ອມຂ້າງ ຜູ້ປະກອບກິດຈະການຕ່າງ ອຳນາດການປົກຄອງບ້ານ ແລະ ປະຊາຊົນເຂົ້າຮ່ວມ.
ທ່ານ ສົມສະເຫວີຍ ທຳມະໂຄດ ຫົວໜ້າຫ້ອງການກະສິກຳ ແລະ ປ່າໄມ້ເມືອງສີໂຄດຕະບອງ ກ່າວວ່າ: ເມືອງສີໂຄດຕະບອງ ໄດ້ຈັດຕັ້ງປະຕິບັດການປ່ອຍປາມາແຕ່ປີ 1994 ຈົນເຖິງປັດຈຸບັນນີ້ ປ່ອຍປາລົງຫ້ວຍຮ່ອງໜອງທຳມະຊາດແລ້ວ ຈຳນວນ 3.420.000 ໂຕ ສຳລັບປີ 2020 ກໍຄືພິທີໃນມື້ນີ້ ຄາດຄະເນຈະປ່ອຍປາຈຳນວນ 30.000 ໂຕ ໃນມີປາປາກ ປາແກັດແລບ ປານິນ ປາອິນເດຍ ປານວນຈັນ ແລະ ປ່າຊະນິດອື່ນໆຈຳນວນໜຶ່ງ.