ໃນວາລະກອງປະຊຸມລັດຖະມົນຕີການຕ່າງປະເທດ ອາຊຽນ ແລະ ກອງປະຊຸມອື່ນໆທີ່ກ່ຽວຂ້ອງ ໃນລະຫວ່າງທ້າຍເດືອນກໍລະກົດ 2024 ຜ່ານມາ ທີ່ ສປປ ລາວ ຮັບກຽດເປັນເຈົ້າພາບ ໄດ້ມີການເຊັນບົດບັນທຶກຂໍ້ຕົກລົງລະຫວ່າງ ສະຖາບັນຄົ້ນຄວ້າວິທະຍາສາດການສຶກສາ ກະຊວງສຶກສາທິການ ແລະ ກີລາ (ສສກ) ແລະ ອົງການງົບປະມານດ້ານການສຶກສາແຫ່ງລັດ ສູນຮ່ວມມືສາກົນ ກະຊວງສຶກສາທິການ ສະຫະພັນຣັດເຊຍ ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ໂດຍຕາງໜ້າລົງນາມຂອງທ່ານ ຮສ ປອ ອານຸລົມ ວິໄລພອນ ຜູ້ອໍານວຍການສະຖາບັນຄົ້ນຄວ້າວິທະຍາສາດການສຶກສາ ກະຊວງ ສສກ ແລະ ທ່ານ ມາລີເຊັບ ຮັກສາການຜູ້ອໍານວຍການ ອົງການງົບປະມານດ້ານການສຶກສາແຫ່ງລັດ ສູນຮ່ວມມືສາກົນ ກະຊວງສຶກສາທິການ ແຫ່ງ ສະຫະພັນຣັດເຊຍ ເປັນກຽດເຂົ້າຮ່ວມຂອງທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ແລະ ທ່ານ ເຊີເກ ລາບຣອບ ລັດຖະມົນຕີ ກະຊວງການຕ່າງປະເທດ ແຫ່ງສະຫະພັນຣັດເຊຍ ພ້ອມດ້ວຍຄະນະນຳທີ່ກ່ຽວຂ້ອງ.
ການເຊັນສັນຍາລະຫວ່າງ 2 ຝ່າຍໃນຄັ້ງນີ້ ເພື່ອເປັນບ່ອນອີງໃນການຮ່ວມມືດຳເນີນການທົດລອງສອນພາສາຣັດເຊຍໃນຊັ້ນມັດທະຍົມສຶກສາ ໃນ ສປປ ລາວ ເພື່ອນຳເອົາຄູສອນພາສາຣັດເຊຍມາດຳເນີນການທົດລອງສອນພາສາຣັດເຊຍຢູ່ໃນຊັ້ນມັດທະຍົມສຶກສາໃນ ສປປ ລາວ ດຳເນີນການຂໍວີຊາ ບັດພັກເຊົາ ແລະ ທີ່ພັກໃຫ້ຄູຣັດເຊຍ ເພື່ອພັດທະນາຫຼັກສູດ ສື່ການຮຽນ-ການສອນພາສາຣັດເຊຍໃຫ້ແທດເໝາະກັບສະພາບຕົວຈິງຂອງ ສປປ ລາວ ແລະ ເພື່ອເຝິກອົບຮົມຄູລາວໃນການສອນພາສາຣັດເຊຍໃນຕໍ່ໜ້າ.
ການຮ່ວມມືດັ່ງກ່າວ ແມ່ນເພື່ອສືບຕໍ່ຈັດຕັ້ງປະຕິບັດການສອນທົດລອງພາສາຣັດເຊຍໄດ້ຢູ່ 2 ໂຮງຮຽນເປົ້າໝາຍ ຄື: ໂຮງຮຽນມັດທະຍົມສົມບູນເພຍວັດ ໂຮງຮຽນມັດທະຍົມສົມບູນເຈົ້າອານຸວົງ ແລະ ເພື່ອຂະຫຍາຍການຈັດຕັ້ງປະຕິບັດການຮຽນການສອນພາສາຣັດເຊຍອອກໄປອີກ 4 ໂຮງຮຽນຊັ້ນມັດທະຍົມສຶກສາ ພາຍໃນ ນວ ນອກຈາກນີ້ ກໍເພື່ອຈັດຕັ້ງປະຕິບັດການຮ່ວມມືລະຫວ່າງສະຖາບັນ ແລະ ສູນ ໃນການຜະລິດ ຮຽບຮຽງຫຼັກສູດ ປຶ້ມແບບຮຽນ ຄູ່ມືຄູ ແລະ ສື່ການຮຽນການສອນພາສາຣັດເຊຍໃຫ້ແທດເໝາະກັບສະພາບການຮຽນ-ການສອນ ພາສາຣັດເຊຍ ໃນ ສປປ ລາວ.
ສໍາລັບສົກຮຽນ 2024-2025 ແມ່ນຈະໄດ້ສືບຕໍ່ທົດລອງສອນພາສາຣັດເຊຍຢູ່ 2 ໂຮງຮຽນເປົ້າໝາຍ (ໂຮງຮຽນມັດທະຍົມສົມບູນເພຍວັດ ແລະ ເຈົ້າອານຸວົງ) ເປັນ 2 ຂັ້ນຮຽນ ຄື: ມ1 ແລະ ມ2 ແລະ ຈະໄດ້ເພີ່ມຈຳນວນໂຮງຮຽນໃນຂັ້ນ ມ1 ຕື່ມ 4 ໂຮງຮຽນ ລວມທັງໝົດເປັນ 6 ໂຮງຮຽນ ສືບຕໍ່ນຳໃຊ້ປຶ້ມ SOROKA RUSSIAN FOR KIDS STUDENT’S BOOK 1 ໃນຂັ້ນ ມ1 ແລະ ນຳໃຊ້ປຶ້ມ SOROKA RUSSIAN FOR KIDS STUDENT’S BOOK 2 ໃນຂັ້ນ ມ2 ຈັດຕັ້ງປະຕິບັດແຜນພັດທະນາຫຼັກສູດ ສື່ການຮຽນການສອນພາສາຣັດເຊຍສຳລັບສະພາບແວດລ້ອມຂອງລາວ ແລະ ເຝິກອົບຮົມຄູຄົນລາວ ເພື່ອສືບຕໍ່ການຮຽນການສອນພາສາຣັດເຊຍໃນຕໍ່ໜ້າ.