ສູນສົ່ງເສີມການສຶກສາຮຽນຮ່ວມໄດ້ຈັດກອງປະຊຸມເຜີຍແຜ່ແຜນຍຸດທະສາດ ແລະ ແຜນປະຕິບັດງານດ້ານວຽກງານການສຶກສາຮຽນຮ່ວມແຕ່ນີ້ຮອດປີ 2030 ໂດຍໄດ້ຮັບການສະໜັບສະໜູນຈາກອົງ ການພັດທະນາສາກົນປະເທດສະຫະລັດອາເມລິກາ ແລະ ສະຫະພາບເອີລົບຂຶ້ນວັນທີ 5 ສິງຫາ 2024 ທີ່ນະຄອນຫຼວງວຽງຈັນ ມີທ່ານ ສຸລິອຸດົງ ສູນດາລາ ຮອງລັດຖະມົນຕີກະຊວງສຶກສາທິການ ແລະ ກີລາ ທ່ານ ນາງ ເອລີຊາເບັດ ແຊັມເບີ້ ວ່າການຜູ້ຕາງໜ້າອົງການພັດທະນາສາກົນປະເທດສະຫະລັດອາເມລິກາປະຈຳລາວ ທ່ານ ນີແອວຣ ເລໂອນາດ ທີ່ປຶກສາທູດສຳນັກງານຜູ້ຕາງໜ້າສະຫະພາບເອີລົບປະຈຳລາວ ຜູ້ຕາງໜ້າຈາກກະຊວງກ່ຽວຂ້ອງ ຫົວໜ້າຮອງຫົວໜ້າກົມ ສະຖາບັນ ສູນ ມະຫາວິທະຍາໄລແຫ່ງຊາດ ວິທະຍາໄລຄູດົງຄຳຊ້າງ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ຫຸມພັນ ແກ້ວອຸ່ນຄຳ ຜູ້ອຳນວຍການສູນສົ່ງເສີມການສຶກສາຮຽນຮ່ວມ ໄດ້ຂຶ້ນສະເໜີແຜນແຜນຍຸດທະສາດການສຶກສາຮຽນຮ່ວມແຕ່ນີ້ຫາປີ 2030 ວ່າ: ຈຸດປະສົງແຜນຍຸດທະສາດດັ່ງກ່າວເພື່ອຈັດຕັ້ງຜັນຂະຫຍາຍນະໂຍບາຍແຫ່ງຊາດວ່າດ້ວຍການສຶກສາຮຽນຮ່ວມ ແລະ ພັດທະນາຂະແໜງການສຶກສາທິການ ແລະ ກີລາ ໃນແຕ່ລະໄລຍະ ແລະ ບັນລຸເປົ້າໝາຍສະຫັດສະວັດ ເພື່ອການພັດທະນາແບບຍືນຍົງ (SDG4) ເພື່ອຮັບປະກັນສິດທິໃນການເຂົ້າເຖິງການສຶກສາທີ່ມີຄຸນນະພາບ ສະເໝີພາບ ແລະ ເທົ່າທຽມຂອງທຸກຄົນໃນສັງຄົມ ຫຼຸດຜ່ອນ ແລະ ລຶບລ່າງຄວາມຫຼຸດໂຕນໃນການເຂົ້າເຖິງການສຶກສາຂອງກຸ່ມທີ່ດ້ອຍໂອກາດ ໂດຍສະເພາະເດັກຍິງ ແມ່ຍິງ ເຜົ່າ ຄົນພິການ ແລະ ຜູ້ທີ່ມີຄວາມຫຍຸ້ງຍາກທາງດ້ານເສດຖະກິດ-ສັງຄົມ ເພື່ອຮັບປະກັນການສຶກສາໃຫ້ມີຄຸນນະພາບ ເທົ່າທຽມ ທົ່ວເຖິງ ແລະ ສົ່ງເສີມການຮຽນຮູ້ຕະຫຼອດຊີວິດສຳລັບທຸກຄົນ ເພື່ອປັບປຸງຄຸນນະພາບ ສະພາບແວດລ້ອມທີ່ເອື້ອອຳນວຍໃຫ້ແກ່ການສຶກສາຮຽນຮ່ວມ ແລະ ການມີສ່ວນຮ່ວມຂອງຜູ້ຮຽນ ຄອບຄົວ ໂຮງຮຽນ ຊຸມຊົນ ແລະ ສັງຄົມ.
ໂດຍລວມແລ້ວແຜນຍຸດທະສາດດັ່ງກ່າວແຕ່ນີ້ຮອດປີ 2030 ມີ 7 ຍຸດທະສາດຄື: ຍຸດທະສາດທີ 1 ຍົກສູງຄວາມສຳຄັນຂອງການສຶກສາຮຽນຮ່ວມ ຍຸດທະສາດທີ 2 ປັບປຸງສິ່ງອຳນວຍຄວາມສະດວກ ແລະ ສະພາບແວດລ້ອມໃນສະຖານການສຶກສາທີ່ມີການສຶກສາຮຽນຮ່ວມທຸກຊັ້ນ ທຸກສາຍ ຍຸດທະສາດທີ 3 ເຊື່ອມສານການສຶກສາຮຽນຮ່ວມເຂົ້າໃນຫຼັກສູດ ເຝິກອົບຮົມຄູ ສ້າງຄູໃນທຸກລະບົບທຸກຊັ້ນທຸກສາຍ ຍຸດທະສາດທີ 4 ສົ່ງເສີມການສຶກສາຂອງນັກຮຽນ-ນັກສຶກສາພິການ ຍຸດທະສາດທີ 5 ສ້າງ ແລະ ເຝິກອົບຮົມຄູອາຈານ ຜູ້ດູແລນັກຮຽນພິການ ແລະ ບຸກຄະລາກອນສະເພາະດ້ານສຳລັບການສຶກສາຄົນພິການ ຍຸດທະສາດທີ 6 ສົ່ງເສີມຜູ້ຮຽນທຸກຄົນ ເຂົ້າເຖິງອາຫານທີ່ຖືກຫຼັກໂພສະນາການ ສຸຂະອະນາໄມ ສຸຂາພິບານ ແລະ ສ້າງສະຖານການສຶກສາທີ່ປອດໄພ ແລະ ຍຸດທະສາດທີ 7 ການຮ່ວມມືກັບຂະແໜງການທຸກພາກສ່ວນທີ່ກ່ຽວຂ້ອງ ແລະ ຄູ່ຮ່ວມພັດທະນາຕໍ່ວຽກງານການສຶກສາຮຽນຮ່ວມ ແລະ ການສຶກສາຄົນພິການ.
