ສະມາຄົມທຸລະກິດທ່ອງທ່ຽວພາຍໃນປະເທດໄທ-ນະຄອນຫຼວງວຽງຈັນ-ຫວຽດນາມ ແລະ ກໍາປູເຈຍ ລົງນາມໃນສັນຍາຮ່ວມມື ພັດທະນາ ແລະ ເຊື່ອມໂຍງການທ່ອງທ່ຽວ ຕິດພັນກັບການສົ່ງເສີມການທ່ອງທ່ຽວແບບປະຊາຊົນມີສ່ວນຮ່ວມ ແລະ ການທ່ອງທ່ຽວແບບຍືນຍົງ.
ພິທີລົງນາມໃນສັນຍາຮ່ວມມືດັ່ງກ່າວມີຂຶ້ນໃນອາທິດຜ່ານມາ ທີ່ເມືອງພັດທະນາ ແຂວງຊົນບູຣີ ປະເທດໄທ ໃນງານສຳມະນາຫົວຂໍ້ “ພັດທະຍາ ກັບໂອກາດດ້ານການຕະຫຼາດຂອງ MICE ແບບຍືງຍົງ” ລົງນາມໂດຍຕາງໜ້າສະມາຄົມທຸລະກິດທ່ອງທ່ຽວ ຂອງແຕ່ລະປະເທດ.
ທ່ານ ວິມານ ພານິດ ປະທານສະມາຄົມທຸລະກິດທ່ອງທ່ຽວນະຄອນຫຼວງວຽງຈັນ ໃຫ້ສຳພາດກ່ຽວກັບຈຸດປະສົງຂອງການລົງນາມການຮ່ວມມືຄັ້ງດັ່ງກ່າວວ່າ: ການລົງນາມຂອງສະມາຄົມທຸລະກິດທ່ອງທ່ຽວທັງ 4 ປະເທດຄັ້ງນີ້ ເປັນການຮ່ວມມື-ແລກປ່ຽນການທ່ອງທ່ຽວ ສະໜັບສະໜູນດ້ານການຈັດກິດຈະກຳ ທ່ອງທ່ຽວເຊັ່ນ: ກອງປະຊຸມ ງານວາງສະແດງຜະລິດຕະພັນການທ່ອງທ່ຽວ ແນໃສ່ເພື່ອເຊື່ອມໂຍງໃນອະນຸພາກພື້ນ ຍົກລະດັບຜູ້ປະກອບການເພື່ອກ່າວສູ່ລະຍຸກ 5G ພ້ອມນັ້ນກໍເພື່ອເປັນການຮ່ວມມືໃນການແລກປ່ຽນຂໍ້ມູນຂ່າວສານດ້ານການຕະຫຼາດ ການທ່ອງທ່ຽວເພື່ອກ້າວສູ່ລະດັບສາກົນ ແລະ ຮ່ວມເຜີຍແຜ່ປະຊາສຳພັນກ່ຽວກັບອຸດສາຫະກຳທ່ອງທ່ຽວ.
ທ່ານ ວິມານ ພານິດ ກ່າວຕື່ມວ່າ: ພາຍຫຼັງທີ່ລົງນາມການຮ່ວມມືຄັ້ງນີ້ ທາງສະມາຄົມທຸລະກິດທ່ອງທ່ຽວນະຄອນຫຼວງວຽງຈັນພວກເຮົາ ຈະໄດ້ຈັດກອງປະຊຸມປຶກສາຫາລືສົ່ງເສີມຜູ້ປະກອບການ ເພື່ອຄົ້ນຄວາມໃນການຈັດລາຍການທ່ອງທ່ຽວໃໝ່ໆ ການທ່ອງທ່ຽວແບບຍືນຍົງ ແລະ ອື່ນໆ ໃຫ້ສາມາດດຶງດູດນັກທ່ອງທ່ຽວເຂົ້າມາປະເທດລາວເຮົາໃຫ້ນັບມື້ຫຼາຍຂຶ້ນ.
ເຂົ້າຮ່ວມລົງນາມຄັ້ງນີ້ ມີ ທ່ານ ຄຳຄູນ ໃບລາຕຣີ ຮອງຫົວໜ້າພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ພ້ອມຄະນະ.