ຖ້າເວົ້າເຖິງການປັບແຕ່ງເຕັກນິກລົດຈັກໃນປະເທດລາວເຮົາ ແມ່ນມີໃຫ້ເຫັນຫຼາຍສົມຄວນ ນອກຈາກໄວລຸ້ນທີ່ດັດປັບສະພາບເຕັກນິກລົກຈັກແລ້ວ ກໍຍັງມີອີກຫຼາຍກຸ່ມຄົນທີ່ດັດປັບສະພາບເຕັກນິກລົດຈັກ ເພື່ອອຳນວຍຄວາມສະດວກໃຫ້ກັບຄອບຄົວ ແລະ ອື່ນໆ.
ຖ້າເວົ້າກ່ຽວກັບເລື່ອງນີ້ ມື້ນີ້ຄໍລຳຈະລາຈອນ ຂໍແລກປ່ຽນກ່ຽວກັບການດັດປັບລົດຈັກເປັນລົດ 3 ລໍ້ ຫຼື ຫຼາຍທ່ານເຄີຍໄດ້ຍິນ ແລະ ເອີ້ນກັນວ່າ ລົດຊາເລັ້ງ ເພື່ອນຳໃຊ້ເຂົ້າໃນການສົ່ງເຄື່ອງ ແກ່ເຄື່ອງໄປຂາຍນັ້ນ ກໍເປັນແນວຄວາມຄິດທີ່ດີ ທີ່ຄົນລາວເຮົາມີຫົວຄິດປະດິດສ້າງສາມາດນຳໃຊ້ລົດຈັກສອງລໍ້ ໃຫ້ມາເປັນ 3 ລໍ້ທີ່ສາມາດນຳໃຊ້ງານໄດ້ຫຼາຍຂຶ້ນ.
ໂດຍລວມແລ້ວເປັນສິ່ງທີ່ດີ ແຕ່ມາຄາໃຈຢູ່ບ່ອນວ່າ ເຮົາຈະເອົາມາດຕະຖານໃດມາວັດແທກດ້ານເຕັກນິກ ເມື່ອລົດບໍ່ໄດ້ຜະລິດອອກຈາກໂຮງງານທີ່ໄດ້ມາດຕະຖານ ແລະ ອີກຢ່າງໜຶ່ງຜູ້ຊົມໃຊ້ ກໍຄືນັກຂັບຂີ່ເອງນຳໃຊ້ໃບຂັບຂີ່ຖືກກັບປະເພດລົດແລ້ວບໍ ?.
ຕໍ່ກັບສິ່ງທີ່ຍົກຂຶ້ນມາ ຜູ້ຂຽນຢາກເລີ່ມຈາກສະພາບດ້ານເຕັກນິກ ອີງຕາມກົດໝາຍວ່າດ້ວຍຈະລາຈອນທາງບົກ ໃນພາກທີ III ໝວດທີ 1 ມາດຕາ 35 ມາດຕະຖານເຕັກນິກຂອງຍານພາຫະນະ ເຊິ່ງໃນມາດຕາດັ່ງກ່າວໄດ້ລະບຸວ່າ ຍານພາຫະນະທຸກຊະນິດທີ່ນຳເຂົ້າ ຜະລິດ ປະກອບ ເພື່ອຂຶ້ນທະບຽນ ແລະ ນຳໃຊ້ຢູ່ ສປປ ລາວ ຕ້ອງມີໂຄງປະກອບສ້າງທີ່ຖືກຕ້ອງຕາມາດຕະຖານແຮງງານຜະລິດ ທີ່ໄດ້ມາດຕະຖານສາກົນ ມີຄຸນະພາບ ທີ່ຖືກຕ້ອງຕາມມາດຕະຖານທີ່ກະຊວງໂຍທາທິການໄດ້ກຳນົດ ສອດຄ່ອງກັນສົນທິສັນຍາ ແລະ ສັນຍາສາກົນທີ່ ສປປ ລາວ ເປັນພາຄີ ພ້ອມນັ້ນ ໃນມາດຕາ 36 ຂອງກົດໝາຍສະບັບດັ່ງກ່າວ ກ່ຽວກັບການກວດກາເຕັກນິກຂອງຍານພາຫະນະ ເຊິ່ງໄດ້ລະບຸວ່າ ຍານພາຫະນະທຸກຊະນິດທີ່ສັນຈອນຕາມເສັ້ນທາງ ຕ້ອງໄດ້ຜ່ານການກວດກາເຕັກນິກຕາມກຳນົດຢ່າງເຂັ້ມງວດ ແລະ ໄດ້ຮັບໃບຢັ້ງຢືນການກວດກາເຕັກນິກຈາກສູນກວດກາເຕັກນິກ ທີ່ກະຊວງໂຍທາທິການ ແລະ ຂົນສົ່ງໄດ້ຮັບຮອງ.
ສ່ວນການນຳໃຊ້ໃບຂັບຂີ່ປະເພດໃດ ຈຶ່ງຈະເໝາະສົມກັບລົດຈັກ 3 ລໍ້ ໃນມາດຕາ 16 ຂອງກົດໝາຍສະບັບດຽວກັນ ກ່ຽວກັບປະເພດໃບຂັບຂີ່ຕາມຊະນິດຂອງພາຫະນະ ໃນມາດຕານີ້ໄດ້ລະບຸວ່າ ໃບຂັບຂີ່ພາຍໃນ ແມ່ນຈັດຕາມຊະນິດຍານພາຫະນະ ດ້ວຍຕົວອັກສອນລາແຕງ ສຳລັບລົດສາມລໍ້ ແມ່ນກຳນົດອັກສອນ A2.
ກ່ອນທີ່ຈະຍົກບັນຫານີ້ມາແລກປ່ຽນກັບບັນດາເພື່ອຜູ້ອ່ານ ຜູ້ຂຽນໄດ້ສັງເກດມາດົນ ແລະ ເກີດສົງໃສວ່າ ການປັບດັດສະພາບເຕັກນິກນີ້ ຖືກຕ້ອງແລ້ວບໍ່ ເພາະລົດຈັກສາມລໍ້ບາງຄັນ ກໍຕໍ່ລໍ້ທີສາມໃສ່ຊ້າຍມືຂອງລົດ ບາງຄັນກໍຢູ່ຂວາມື ຍິ່ງໄປກວ່ານັ້ນ ຫຼັກທີ່ນຳໃຊ້ມາຈອດເປັນຮ່າງນັ້ນໄດ້ມາດຕະຖານ ຫຼື ບໍ່ ພ້ອມລໍ້ທີ 3 ເວລາຂີ່ໄປກໍແກວ່ງປານຈະຫຼຸດອອກ ອີກຢ່າງໜຶ່ງກໍຄື ການຂັບຂີ່ຕາມຖະໜົນ ຜູ້ຂັບຂີ່ລົດສາມລໍ້ບາງຄົນ ບໍ່ໄດ້ໃຫ້ກຽດລົດຄັນອື່ນ ຂັບຂີ່ກວມເລນທາງ ກີດຂວາງການສັນຈອນ.
ທັງໝົດທີ່ຍົກຂຶ້ນມາຂໍແລກປ່ຽນນີ້ ກໍຕ້ອງຂໍອະໄພກັບບັນດານັກຂັບຂີ່ທີ່ປະຕິບັດຖືກຕ້ອງຕາມລະບຽບການສັນຈອນ ແຕ່ສິ່ງທີ່ຍົກຂຶ້ນມານີ້ ແນໃສ່ເພື່ອຮັບປະກັນຄວາມປອດໄພໃຫ້ກັບຜູ້ໃຊ້ລົດໃຊ້ຖະໜົນ ກໍຄື ຜູ້ຂັບຂີ່ລົດສາມລໍ້ເອງ ເຖິງແມ່ນວ່າໄລຍະຜ່ານມາ ລົດສາມລໍ້ທີ່ເປັນຄູ່ກໍລະນີຂອງການເກີດອຸບັດເຫດຍັງມີໜ້ອຍ ແຕ່ກໍຄວນມີການກວດກາ ຄຸ້ມຄອງໃຫ້ຖືກຕ້ອງຕາມລະບຽບກົດໝາຍ.
ໂດຍ: ເມັດຝົນ