ສະຫະພັນບານເຕະແຫ່ງຊາດລາວ (ສຕລ) ຈັດເຝີກອົບຮົມຍົກລະດັບຄວາມຮູ້-ຄວາມສາມາດດ້ານວຽກງານສື່ມວນຊົນ ກ່ຽວກັບການຂຽນຂ່າວກີລາ ແລະ ຖ່າຍພາບນິ້ງກີລາ ໃຫ້ບຸຄະລາກອນທີ່ຮັບຜິດຊອບວຽກງານສື່ມວນຊົນ ເພື່ອເປັນກະບອກສຽງສຳຄັນໃຫ້ແຟນເພຈຂອງສະໂມສອນຕ່າງໆ ທີ່ເຂົ້າຮ່ວມແຂ່ງຂັນບານເຕະລາຍການຂອງ ສຕລ ລະດູການ 2020 ທີ່ຈະຈັດຂຶ້ນເດືອນກໍລະກົດທີ່ຈະມາເຖິງ ເຊິ່ງປະກອບມີລາຍການ ເປບຊີ ລາວລີກ 1 ຄອມມານໂດ ລາວລີກ 2 ແລະ ລາຍການ LFF ຄັບ 2020.
ຊຸດເຝິກອົບຮົມດັ່ງກ່າວ ຈັດຂຶ້ນວັນທີ 8 ກໍລະກົດ 2020 ຢູ່ ສຕລ ໂດຍມີທ່ານນາງ ກັນຍາ ແກ້ວມະນີ ເລຂາທິການ ສຕລ ທ່ານ ພຸດດາມອນ ຈັນທະລັງສີ ຜູ້ປະກາດຂ່າວໂທລະພາບລາວສະຕາ ທັງເປັນຄະນະກຳມະການການຕະຫຼາດ ແລະ ສື່ມວນຊົນ ສຕລ ທ່ານ ຈັນທະຄາດ ອິນທະດາລິນ ວິທະຍາກອນຈາກໜັງສືພິມສຶກສາກີລາລາຍວັນ ທ່ານ ວິສິດທິພົງ ແສນພິມມະຈັກ ຜູ້ຊ່ຽວຊານການຖ່າຍພາບກີລາລະດັບແຖວໜ້າຂອງ ສປປ ລາວ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.
ທ່ານນາງ ກັນຍາ ແກ້ວມະນີ ກ່າວວ່າ: ວຽກງານສື່ມວນຊົນໃນສາຍກີລາ ມີຄວາມສຳຄັນຢ່າງຍິ່ງຕໍ່ຂະບວນການແຂ່ງຂັນກີລາບານເຕະ ສຕລ ຈັດຂຶ້ນທຸກປີ ໂດຍສະເພາະ ປີນີ້ມີຫຼາຍລາຍການ ຈຶ່ງຮຽກຮ້ອງມາຍັງສຳມະນາກອນທຸກທ່ານ ເພີ່ມທະວີຄວາມເອົາໃຈໃສ່ຈົດກ່າຍ ຖ້າບໍ່ເຂົ້າໃຈບັນຫາໃດກໍໃຫ້ເຈາະຈີ້ມຖາມຜູ້ຊ່ຽວຊານ ກໍຄືວິທະຍາກອນ ເພື່ອນຳເອົາບົດຮຽນ ແລະ ປະສົບການຕ່າງໆ ມານຳໃຊ້ໃນການຈັດຕັ້ງປະຕິບັດຕົວຈິງໃຫ້ມີປະສິດທິຜົນ ປະກອບສ່ວນເຮັດໃຫ້ການແຂ່ງຂັນກີລາບານເຕະລາຍການ ເປບຊີ ລາວລີກ 1 ຄອມມານໂດ ລາວລີກ 2 ລວມເຖິງລາຍການ LFF ຄັບ 2020 ມີສີສັນ ແລະ ເປັນຂະບວນການຟົດຟື້ນ.
ລາຍການ ເປບຊີ ລາວລີກ 1 ລະດູການ 2020 ມີ 7 ສະໂມສອນເຂົ້າຮ່ວມ ຄື: ລາວໂຕໂຢຕ້າ ເອັຟຊີ ແຊັມ 4 ສະໄໝ ມາສເຕີ ເຊເວັນ ເອັຟຊີ ສະໂມສອນ ຊ້າງນ້ອຍ ເອັຟຊີ ປກສ ເອັຟຊີ ວຽງຈັນ ເອັຟທີ ສະໂມສອນວຽງຈັນ ເອັຟຊີ ຈາກແຂວງວຽງຈັນ ແລະ ສະໂມສອນ ເອສຣາ ເອັຟຊີ ສ່ວນລາຍການຄອມມານໂດ ລາວລີກ 2 ມີ 14 ທິມເຂົ້າຮ່ວມ ຄື: ເອັສທີທີ ເອັຟຊີ ນະຄອນຫຼວງ ເອັຟຊີ ວຽງຈັນ ຢູໄນເຕັດ ກາຣູດາ 369 ເອັຟຊີ ເອັດອີຊີ ຢູໄນເຕັດ ກອງທັບ ເອັຟຊີ ວິທະຍາໄລ ລາວ-ທ໊ອບ ເອັຟຊີ ວິທະຍາໄລ ເຄວສ ຢູໄນເຕັດ ເຄພີເອັສ ເອັຟຊີ ເມືອງຫາດຢູໄນເຕັດ ບີແກນ ຢູໄນເຕັດ ແຄນລາວ ຢູໄນເຕັດ ເຮັສບີທີ 941 ເອັຟຊີ ທຣີນີຕີ ເອັຟຊີ ເຊິ່ງການແຂ່ງຂັນຈະເລີ່ມທ້າຍເດືອນກໍລະກົດນີ້.