ນ້ຳດື່ມ ມີປະໂຫຍດຕໍ່ຮ່າງກາຍ ແລະ ລາຄາຖືກ ເຊິ່ງການດື່ມນ້ຳສຳລັບເຮົາ ຄືການຮັກສາຄວາມຊຸ່ມຊື່ນໃນຮ່າງກາຍ ສະຖາບັນທາງການແພດແນະນຳການດື່ມນ້ຳຕໍ່ວັນຢູ່ທີ່ 125 ອອນຊ໌ ສຳລັບຜູ້ຊາຍ ແລະ 91 ອອນຊ໌ ສຳລັບຜູ້ຍິງ ແຕ່ການດື່ມນ້ຳໃນປະລິມານທີ່ຫຼາຍທັງຕອນເຊົ້າ ຕອນສວາຍ ຕອນແລງ ກ່ອນນອນ ອາດບໍ່ແມ່ນວິທີທີ່ດີ ຫຼື ມີປະສິດທິພາບທີ່ສຸດ ໃນການຕອບສະໜອງຄວາມຕ້ອງການຂອງຮ່າງກາຍ.
ຫາກທ່ານດື່ມນ້ຳໃນປະລິມານຫຼາຍ ແລະ ເຮັດໃຫ້ປວດປັດສາວະພາຍໃນເວລາຕໍ່ມາ ເມື່ອເຂົ້າຫ້ອງນ້ຳ ແລະ ພົບວ່າປັດສາວະຂອງທ່ານໃສ ນັ້ນແປວ່າບໍ່ຄ່ອຍດີແລ້ວ ເພາະນ້ຳທີ່ເຮົາດື່ມມີທ່າອ່ຽງທີ່ຈະໄຫຼຜ່ານລະບົບຍ່ອຍອາຫານ ເມື່ອບໍ່ມີອາຫານຢູ່ໃນທ້ອງ ໂດຍສະເພາະຢ່າງຍິ່ງ ເມື່ອທ່ານດື່ມນ້ຳໃນຂະນະທີ່ທ້ອງຫວ່າງ ການບໍລິໂພກແບບນີ້ບໍ່ຖືກຕ້ອງປານໃດ.
ໃນຄວາມຈິງແລ້ວ ປັດສາວະທີ່ມີສີໃສ ເປັນສັນຍານສະແດງໃຫ້ເຫັນເຖິງ “ພາວະຂາດນ້ຳ” ຈຶ່ງກ່າວໄດ້ວ່າ ການດື່ມນ້ຳຫຼາຍໆນັ້ນ ບໍ່ແມ່ນສິ່ງທີ່ດີທີ່ສຸດສຳລັບຮ່າງກາຍສະເໝີໄປ.
ຜົນວິໄຈເມື່ອປີ 2015 ທີ່ຕີພິມໃນວາລະສານຄລິນິກ ໂພຊະນາການອາເມຣິກາ ນັກວິຊາການປຽບທຽບຜົນຂອງການໃຫ້ຄວາມຊຸ່ມຊື່ນຈາກເຄື່ອງດື່ມ ຫຼາຍກວ່າ 12 ຊະນິດ ຕັ້ງແຕ່ນ້ຳດື່ມ ນົມ ຊາ ເບຍ ເຄື່ອງດື່ມປຸງພິເສດ ເຊິ່ງເຮັດການເກັບຕົວຢ່າງປັດສາວະຈາກອາສາສະໝັກກຸ່ມຕົວຢ່າງ ພົບວ່າເຄື່ອງດື່ມຫຼາຍຢ່າງທັງ ຊາ ນົມ ນ້ຳສົ້ມ ມີຄວາມຊຸ່ມຊື່ນຫຼາຍກວ່ານ້ຳລ້າ (ເບຍໃຫ້ຄວາມຊຸ່ມຊື່ນໜ້ອຍກວ່ານ້ຳເລັກນ້ອຍ ແລະ ຫຼາຍກວ່າກາເຟໜ້ອຍໜຶ່ງ).
ແຕ່ກໍແນ່ນອນ ບໍ່ໄດ້ມີໃຜອອກມາແນະນຳໃຫ້ດື່ມນົມແທນນ້ຳ ແຕ່ຕາມທີ່ທຸກຄົນເຂົ້າໃຈກັນວ່າ ການດື່ມນ້ຳຈະຊ່ວຍໃຫ້ຮ່າງກາຍຂັບສານພິດຕ່າງໆອອກມາເປັນປັດສາວະ ເຊິ່ງຂໍ້ມູນນີ້ເປັນຄວາມຈິງພຽງເຄິ່ງດຽວ ເພາະຂະບວນການນີ້ຈະບໍ່ເກີດຂຶ້ນຫາກດື່ມນ້ຳໃນປະລິມານໜຶ່ງຂະນະທີ່ທ້ອງຫວ່າງ.
ກັບບາງກໍລະນີການດື່ມນ້ຳຫຼາຍເກີນໄປ ກໍເປັນອັນຕະລາຍໄດ້ ສຳລັບນັກກີລາ ຫຼື ຄົນທີ່ອອກກຳລັງກາຍເປັນເວລາຫຼາຍຊົ່ວໂມງ ເຊິ່ງຫາກພວກເຂົາດື່ມພຽງນ້ຳລ້າ ຈະສົ່ງຜົນໃຫ້ມີໂຊດຽມໃນປັດສາວະຫຼາຍເກີນໄປ ເຮັດໃຫ້ເກີດຄວາມຂາດສົມດຸນຂອງໂຊດຽມໃນຮ່າງກາຍ ເອີ້ນວ່າ ພາວະ hyponatremia ບາງຄັ້ງອາດເປັນອັນຕະລາຍເຖິງຊີວິດ ດັ່ງນັ້ນ ໃນສະຖານະການນີ້ ການດື່ມເຄື່ອງດື່ມເກືອແຮ່ ຫຼື ເຄື່ອງດື່ມທີ່ມີສານອາຫານອື່ນໆແທນນ້ຳລ້າຈະດີກວ່າ.
ການດື່ມນ້ຳກ່ອນ ຫຼື ລະຫວ່າງຄາບອາຫານ ກໍເປັນອີກວິທີໃນການຮັກສາລະດັບນ້ຳໃນຮ່າງກາຍ ການດື່ມນ້ຳທີ່ມີກົດອະມິໂນ ຫຼືວິຕາມິນ ແລະ ແຮ່ທາດ ຊ່ວຍໃຫ້ຮ່າງກາຍໄດ້ຮັບນ້ຳຫຼາຍຂຶ້ນ ຈຶ່ງເປັນສາເຫດທີ່ເຄື່ອງດື່ມຢ່າງນົມ ແລະ ນ້ຳໝາກໄມ້ ມີຜົນສຶກສາທີ່ຂ້ອນຂ້າງດີໃນການທົດສອບການໃຫ້ລະດັບນ້ຳໃນຮ່າງກາຍ ອີກທັງໃນງານວິໄຈບາງຊິ້ນ ພົບວ່າ ການກິນກ້ວຍຫຼັງຈາກອອກກຳລັງກາຍ ດີກວ່າການດື່ມເຄື່ອງດື່ມເກືອແຮ່ ເພາະຈະຊ່ວຍໃຫ້ຮ່າງກາຍປັບການຄວບຄຸມລະດັບນ້ຳໃນຮ່າງກາຍໃຫ້ກັບມາເປັນປົກກະຕິ.
ຈາກທັງໝົດນີ້ ບໍ່ໄດ້ໝາຍຄວາມວ່າທ່ານຄວນດື່ມນ້ຳໃຫ້ໜ້ອຍລົງ ຫຼື ປ່ຽນຈາກນ້ຳເປັນເຄື່ອງດື່ມອື່ນໆ ເພື່ອຮັກສາລະດັບນ້ຳໃນຮ່າງກາຍ ແຕ່ສຳລັບຄວາມເໝາະສົມຂອງຄວາມຊຸ່ມຊື່ນ ແລະ ລະດັບນ້ຳ ຄື ການດື່ມຢ່າງຊ້າໆ ໃນປະລິມານທີ່ຄົງທີ່ ອີກທັງດື່ມລະຫວ່າງຄາບອາຫານນັ້ນ ຈະໃຫ້ປະສິດທິພາບໄດ້ຫຼາຍກວ່າດ້ວຍ.
ຊາວບ້ານ – ນຳສະເໜີ