ສະຫະລັດ ອາເມຣິກາ ພ້ອມທີ່ຈະໃຫ້ການສະໜັບສະໜູນການເປັນພາຄີທັງຢູ່ໃນພາກພື້ນ ແລະ ສາກົນ ລວມເຖິງໃຫ້ການສະໜັບສະໜູນຢ່າງເຕັມທີໃນການປະທານອາຊຽນຂອງ ສປປ ລາວ ໃນປີ 2024 ພາຍໃຕ້ຫົວຂໍ້ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງຂອງອາຊຽນ” ໃຫ້ປະສົບຜົນສຳເລັດ.
ເອກອັກຄະລັດຖະທູດສະຫະລັດອາເມຣິກາ ປະຈຳ ສປປ ລາວ ທ່ານ ນາງ ແຮັດເຕີ ວາເຣຍອາວາ ໄດ້ໃຫ້ສຳພາດຕໍ່ສື່ມວນຊົນ ໃນໂອກາດທີ່ທ່ານໄດ້ເຂົ້າມາດຳລົງຕຳແໜ່ງໃໝ່ ໃນວັນທີ 14 ພຶດສະພາ 2024 ເຊິ່ງທ່ານໄດ້ກ່າວວ່າ: ຂ້າພະເຈົ້າມີຄວາມຮູ້ສຶກພາກພູມໃຈ ທີ່ໄດ້ເປັນຕົວແທນຂອງ ສະຫະລັດ ອາເມຣິກາ ມາເປັນເອກອັກຄະລັດຖະທູດ ປະຈຳ ສປປ ລາວ ເພື່ອເປັນການສານຕໍ່ເສີມຂະຫຍາຍການເປັນຄູ່ຮ່ວມມືແບບກວມລວມ ຂອງສອງປະເທດ ສປປ ລາວ ແລະ ສະຫະລັດ ອາເມຣິກາ ທີ່ການນຳສອງຝ່າຍໄດ້ລົງນາມໃນປີ 2016 ພ້ອມນັ້ນ ກໍຍັງເປັນໄລຍະທີ່ ສປປ ລາວ ເປັນປະທານອາຊຽນ ເຊິ່ງ ສະຫະລັດ ອາເມຣິກາ ກໍພ້ອມທີ່ໃຫ້ການສະໜັບສະໜູນ ເພື່ອສ້າງເງື່ອນໄຂດ້ານຕ່າງໆໃຫ້ກັບ ສປປ ລາວ ປະສົບຜົນສຳເລັດໃນການເປັນປະທານອາຊຽນ ແນເປັນການຍົກບົດບາດຂອງ ສປປ ລາວ ໃນປະຊາຄົມອາຊຽນ.
ທ່ານ ນາງ ແຮັດເຕີ ວາເຣຍອາວາ ກ່າວວ່າ: ອາຊຽນ ແມ່ນເປັນປັດໄຈຫຼັກ ໃນການຮ່ວມມືລະຫວ່າງ ສະຫະລັດ ອາເມຣິກາ ແລະ ບັນດາປະເທດໃນພາກພື້ນ ດ້ວຍຈຳນວນປະກອນ ແລະ ເງື່ອນໄງດ້ານຕ່າງໆ ຈະເຮັດໃຫ້ ອາຊຽນ ເປັນກຳລັງຂັບເຄື່ອນດ້ານເສດຖະກິດທີ່ສຳຄັນ ທີ່ຈະສ້າງຄວາມສົມບູນພູນສຸກໃຫ້ກັບພາກພື້ນ ຈາກຄວາມສຳຄັນດັ່ງກ່າວ ສະຫະລັດ ອາເມຣິກາ ໄດ້ມີການຮ່ວມມືກັບ ອາຊຽນ ຫຼາຍໆຂົງເຂດເຊັ່ນ: ສິ່ງແວດລ້ອມ ເສດຖະກິດດີຈີຕອລ ການຊ່ວຍ ເຫຼືອດ້ານມະນຸດສະທຳ ແລະ ອື່ນໆ ເຊິ່ງການຮ່ວມມືດັ່ງກ່າວນັ້ນຈະສາມາດສ້າງຜົນປະໂຫຍກດ້ານຕ່າງໆ ເພື່ອສ້າງໃຫ້ ພາກພື້ນ ກໍຄື ບັນດາປະເທດສະມາຊິກໃຫ້ມີຄວາມເຂັ້ມແຂງ.
ສຳລັບການຮ່ວມມືໃນໄລຍະທີ່ ສປປ ລາວ ເປັນປະທານອາຊຽນ ທ່ານເອກອັກຄະລັດຖະທູດສະຫະລັດອາເມຣິກາ ກ່າວວ່າ: ການຮ່ວມມືໃນໄລຍະການເປັນປະທານອາຊຽນຂອງ ສປປ ລາວ ທາງ ສະຫະລັດ ອາເມຣິກາ ໄດ້ໃຫ້ການສະໜັບສະໜູນດ້ານຕ່າງໆ ທີ່ລວມເຖິງການສະໜອງຄອມພິວເຕີແລັບທ໋ອບ ແລະ ອຸປະກອນຕ່າງໆ ເພື່ອນຳໃຊ້ເຂົ້າໃນ ວຽກງານບໍລິຫານໃນໄລຍະການເປັນປະທານອາຊຽນ ພ້ອມນັ້ນກໍຈະມີການເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຂອງຄະນະຜູ້ແທນຂັ້ນຕ່າງໆຂອງ ສະຫະລັດ ອາເມຣິກາ ແລະ ຍັງຈະມີການຈັດກອງປະຊຸມຕ່າງໆລະຫວ່າງ ສອງຝ່າຍ ເພື່ອເປັນການເສີມຂະຫຍາຍການຮ່ວມມືລະຫວ່າງສອງປະເທດ.